ಯುಪಿಯಲ್ಲಿ 'ಜೈಲರ್​' ವಿಶೇಷ ಪ್ರದರ್ಶನ: ನಾಳೆ ಅಯೋಧ್ಯೆಗೆ ಸೂಪರ್​ಸ್ಟಾರ್​ ರಜನಿಕಾಂತ್​ ಭೇಟಿ

ದೇಶ ಮಾತ್ರವಲ್ಲದೇ, ವಿಶ್ವದಾದ್ಯಂತ ಅಪಾರ ಅಭಿಮಾನಿಗಳನ್ನು ಸಂಪಾದಿಸಿರುವ ಸೂಪರ್​ಸ್ಟಾರ್​ ರಜನಿಕಾಂತ್​ ಅಭಿನಯದ 'ಜೈಲರ್​' ಸಿನಿಮಾಗೆ ನಿರೀಕ್ಷೆಗೂ ಮೀರಿದ ಹಿಟ್​ ಸಿಕ್ಕಿದೆ. ಚಿತ್ರದ ಯಶಸ್ಸಿನ ಖುಷಿಯಲ್ಲಿರುವ ತಲೈವಾ ನಾಳೆ (ಭಾನುವಾರ) ಅಯೋಧ್ಯೆಗೆ ಭೇಟಿ ನೀಡಲಿದ್ದಾರೆ. ಭಗವಾನ್​ ಶ್ರೀರಾಮನ ಜನ್ಮಸ್ಥಳಕ್ಕೆ ತೆರಳಲು ರಜನಿ ಉತ್ಸುಕರಾಗಿದ್ದಾರೆ. ಈ ಬಗ್ಗೆ ಅವರೇ ಮಾಧ್ಯಮಕ್ಕೆ ಮಾಹಿತಿ ನೀಡಿದ್ದಾರೆ.

ಶನಿವಾರ ಉತ್ತರಪ್ರದೇಶದ ಲಕ್ನೋದಲ್ಲಿ 'ಜೈಲರ್'​ ಸಿನಿಮಾ ಪ್ರದರ್ಶನವನ್ನು ಆಯೋಜಿಸಲಾಗಿತ್ತು. ತಲೈವಾ ಶುಕ್ರವಾರ ರಾತ್ರಿ ಲಕ್ನೋ ತಲುಪಿದ್ದಾರೆ. ಯುಪಿ ಉಪಮುಖ್ಯಮಂತ್ರಿ ಕೇಶವ್​ ಪ್ರಸಾದ್​ ಮೌರ್ಯ ಚಿತ್ರದ ಸ್ಕ್ರೀನಿಂಗ್​ನಲ್ಲಿ ಭಾಗವಹಿಸಿದ್ದರು. ಈ ವೇಳೆ ರಜನಿಕಾಂತ್​, ತಮ್ಮ ಚಿತ್ರಕ್ಕೆ ಪ್ರೇಕ್ಷಕರಿಂದ ಸಿಗುತ್ತಿರುವ ಸಕಾರಾತ್ಮಕ ಪ್ರತಿಕ್ರಿಯೆ ಮತ್ತು ಚಿತ್ರದ ಯಶಸ್ಸಿನ ಬಗ್ಗೆ ಮಾಧ್ಯಮದೊಂದಿಗೆ ಮಾತನಾಡಿದರು.

ಇದಕ್ಕೂ ಮುನ್ನ ಶುಕ್ರವಾರ ರಜನಿ ಜಾರ್ಖಂಡ್​ನ ರಾಂಚಿಯಲ್ಲಿದ್ದರು. ರಾಜ್ಯದ ಪ್ರಸಿದ್ಧ ಚಿನ್ನಮಸ್ತ ದೇವಸ್ಥಾನಕ್ಕೆ ಭೇಟಿ ನೀಡಿ ಪೂಜೆ ಸಲ್ಲಿಸಿದ್ದರು. ಬಳಿಕ ರಾಂಚಿಯ 'ಯಾಗೋದ ಆಶ್ರಮ'ದಲ್ಲಿ ಒಂದು ಗಂಟೆ ಧ್ಯಾನ ಕೈಗೊಂಡಿದ್ದರು. ನಂತರ ಜಾರ್ಖಂಡ್​ನ ರಾಜ್ಯಪಾಲ ಸಿ.ಪಿ ರಾಧಾಕೃಷ್ಣನ್​ ಅವರನ್ನು ರಾಜಭವನದಲ್ಲಿ ಭೇಟಿಯಾಗಿದ್ದರು.

ಇದನ್ನೂ ಓದಿ: 'ಜೈಲರ್'​ಗೆ ಯಶಸ್ಸಿನ ಅಭಿಷೇಕ: ಎಂಟನೇ ದಿನವೂ ಉತ್ತಮ ಕಲೆಕ್ಷನ್​ ಮಾಡಿದ ರಜನಿ ಸಿನಿಮಾ