ಬೆಂಗಳೂರು ಕಂಬಳ: ಚಿನ್ನದ ಪದಕ ಪಡೆದ 'ಕಾಂತಾರ ಕೋಣಗಳು'

ಅರಮನೆ ಅಂಗಳದಲ್ಲಿ ''ಬೆಂಗಳೂರು ಕಂಬಳ 2023'' ಜರುಗುತ್ತಿದೆ. ಅಂತಿಮ ವಿಜೇತ ಕೋಣಗಳ ಹೆಸರು ಇನ್ನಷ್ಟೇ ಘೋಷಣೆ ಆಗಬೇಕಿದೆ. ಆದ್ರೆ, ವಿಭಾಗವೊಂದರಲ್ಲಿ 'ಕಾಂತಾರ ಕೋಣಗಳು' ಗೆದ್ದು ಬೀಗಿವೆ. ಹೌದು, ಬೊಳಂಬಳ್ಳಿ ಪರಮೇಶ್ವರ್ ಭಟ್ಟರ ಅಪ್ಪು - ಕುಟ್ಟಿ (ಕಾಂತಾರ ಖ್ಯಾತಿಯ ಕೋಣಗಳು) ಎಂಬ ಕೋಣಗಳು 6.5 ಕೋಲು ನೀರು ಚಿಮ್ಮಿಸಿ ಕೆನೆ ಹಲಗೆ ವಿಭಾಗದಲ್ಲಿ ಮೊದಲ ಚಿನ್ನದ ಪದಕ ಪಡೆದಿದೆ. ಈ ಕೋಣಗಳನ್ನು ಕನ್ನಡ ಚಿತ್ರರಂಗ ಕೀರ್ತಿ ಹೆಚ್ಚಿಸಿದ ಕಾಂತಾರ ಸಿನಿಮಾದಲ್ಲಿ ಬಳಸಿಕೊಳ್ಳಲಾಗಿತ್ತು. ಇದೀಗ ಬೆಂಗಳೂರಿನಲ್ಲಿ ನಡೆಯುತ್ತಿರುವ ಕಂಬಳ ಉತ್ಸವದಲ್ಲಿ ಈ ಕೋಣಗಳು ಪ್ರೇಕ್ಷಕರ ಗಮನ ಸೆಳೆದಿವೆ.

ರಾಷ್ಟ್ರಮಟ್ಟದಲ್ಲಿ ಕರಾವಳಿಯ ಸಂಸ್ಕೃತಿ ಪರಿಚಯಿಸುವ ನಿಟ್ಟಿನಲ್ಲಿ ಎರಡು ದಿನಗಳ ಕಂಬಳ ಉತ್ಸವ ನಡೆದಿದೆ. ಇಂದು ಈ ಕಾರ್ಯಕ್ರಮ ಪೂರ್ಣಗೊಳ್ಳಲಿದೆ. ಅಂತಿಮ ವಿಜೇತ ಕೋಣಗಳ ಹೆಸರು ಇನ್ನೇನು ಕೆಲವೇ ಕ್ಷಣಗಳಲ್ಲಿ ಘೋಷಣೆ ಆಗಲಿದೆ. ಇನ್ನು, ರಿಷಬ್​ ಶೆಟ್ಟಿ ಮತ್ತು ಹೊಂಬಾಳೆ ಫಿಲ್ಮ್ಸ್​ನ ವಿಜಯ್​ ಕಿರಗಂದೂರ್ ಸಾರಥ್ಯದಲ್ಲಿ 'ಕಾಂತಾರ' ಪ್ರೀಕ್ವೆಲ್​ ನಿರ್ಮಾಣವಾಗಲಿರೋ ವಿಚಾರ ನಿಮಗೆ ತಿಳಿದೇ ಇದೆ. ನಾಳೆ(ಸೋಮವಾರ) ಮಧ್ಯಾಹ್ನದ ಹೊತ್ತಿಗೆ 'ಕಾಂತಾರ' ಪ್ರೀಕ್ವೆಲ್​ನ ಫಸ್ಟ್ ಲುಕ್ ಅನಾವರಣಗೊಳ್ಳಲಿದೆ. 

ಇದನ್ನೂ ಓದಿ: 7 ಭಾಷೆಗಳಲ್ಲಿ 'ಕಾಂತಾರ' ದರ್ಶನ: 100 ಕೋಟಿ ಬಜೆಟ್​ ಸಿನಿಮಾದ ಫಸ್ಟ್ ಲುಕ್​ ರಿಲೀಸ್​ಗೆ ಕಾತರ