ಪಾನೀಯದಲ್ಲಿ ವಿಷ ಬೆರಸಿ ಕುಡಿದ ಕುಟುಂಬ... ಮೂವರ ಸಾವು, ಬದುಕುಳಿದ ಮಗ!

ಕುಟಂಬವೊಂದು ತಂಪುಪಾನೀಯದಲ್ಲಿ ವಿಷ ಬೆರಸಿ ಕುಡಿದು ಆತ್ಮಹತ್ಯೆಗೆ ಶರಣಾದ ಘಟನೆ ಆಂಧ್ರಪ್ರದೇಶದಲ್ಲಿ ನಡೆದಿದೆ. ಹೀಗೆ ವಿಷ ಸೇವಿಸಿ ಆತ್ಮಹತ್ಯೆಗೆ ಶರಣಾದ ಕುಟುಂಬದಲ್ಲಿ ಮೂವರು ಸಾವನ್ನಪ್ಪಿದರೆ ಮಗ ಬದುಕುಳಿದಿದ್ದಾನೆ. ಚಿತ್ತೂರಿನ ಓಬನಪಲ್ಲೆ ಹೌಸಿಂಗ್​ ಕಾಲೋನಿಯಲ್ಲಿ ಈ ದಾರುಣ ಘಟನೆ  ನಡೆದಿದೆ.  ಲಾರಿ ಡ್ರೈವರ್​ ರವಿ ಕುಟುಂಬ ಕಲಹದಿಂದ ಬೇಸತ್ತು ತಂಪು ಪಾನಿಯದಲ್ಲಿ ವಿಷ ಬೆರಸಿದ್ದಾನೆ. ಆ ವಿಷ ಬೆರಸಿದ ಕೂಲ್ಡ್ರಿಂಕ್ಸ್ ಅ​ನ್ನು ರವಿ ಸೇರಿದಂತೆ ಪತ್ನಿ ಭುವನೇಶ್ವರಿ, 9 ವರ್ಷದ ಮಗಳು ಗಾಯತ್ರಿ ಮತ್ತು ಏಳು ವರ್ಷದ ಮಗ ಸಾಯಿಗೆ ಕುಡಿಸಿದ್ದಾನೆ.  ತಂದೆ ರವಿ, ತಾಯಿ ಭುವನೇಶ್ವರಿ ಮತ್ತು ಸಹೋದರಿ ಗಾಯತ್ರಿ ಸಾವನ್ನಪ್ಪಿದ್ದು, ಸಹೋದರ ಸಾಯಿ ಬದುಕುಳಿದಿದ್ದಾನೆ. ಕುಟುಂಬದ ಕಲಹವೇ ಇದಕ್ಕೆ ಕಾರಣ ಎಂದು ಸಂಬಂಧಿಕರು ಮತ್ತು ನೆರೆಹೊರೆಯವರು ಮಾತನಾಡಿಕೊಳ್ಳುತ್ತಿದ್ದಾರೆ.  ಈ ಘಟನೆ ಕುರಿತು ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಮುಂದಿನ ಕ್ರಮ ಕೈಗೊಂಡಿದ್ದಾರೆ.