ನೀವೂ ಹೀಗೇ ಮಾಡಿ... ಆಂಬುಲೆನ್ಸ್​​ಗೆ ದಾರಿ ಬಿಟ್ಟು ಮಾದರಿಯಾದ ಗಣೇಶ ಭಕ್ತಗಣ!

ಪುಣೆ: ದೇಶದ ಹಲವೆಡೆ ಗುರುವಾರ ಗಣೇಶ ನಿಮಜ್ಜನದ ಸಂಭ್ರಮ ಮನೆ ಮಾಡಿತ್ತು. ಈ ಸಂಭ್ರಮ ಮಹಾರಾಷ್ಟ್ರದಲ್ಲೂ ಮೇಳೈಸಿತ್ತು. ಪುಣೆಯಲ್ಲಿ ಲಕ್ಷಾಂತರ ಭಕ್ತರ ಮೆರವಣಿಗೆ ನಡುವೆ ಗಣೇಶನಿಗೆ ವಿದಾಯ​ ಹೇಳಲಾಯಿತು. ಗಣೇಶನ ನಿಮಜ್ಜನಕ್ಕೆ ಲಕ್ಷ ಲಕ್ಷ ಸಂಖ್ಯೆಯಲ್ಲಿ ಜನ ಸೇರಿದ್ದರು. ಈ ವೇಳೆ ಆಗಮಿಸಿದ ಆಂಬುಲೆನ್ಸ್​ ಒಂದಕ್ಕೆ ಪುಣೆಯ ಜನರು ಶಿಸ್ತಿನಿಂದ ದಾರಿ ಮಾಡಿಕೊಟ್ಟರು. ಹೀಗೆ ಅನಾರೋಗ್ಯಕ್ಕೊಳಗಾದ ವ್ಯಕ್ತಿಯೊಬ್ಬರನ್ನು ಕರೆದುಕೊಂಡು ಹೋಗುತ್ತಿದ್ದ ಆಂಬುಲೆನ್ಸ್​ಗೆ ಗಣೇಶ ಭಕ್ತರು ಸ್ವಯಂ ಆಗಿ ತಾವೇ ದಾರಿ ಮಾಡಿಕೊಟ್ಟು, ಇತರರಿಗೆ ಮಾದರಿಯಾದರು. ಕಿಕ್ಕಿರಿದು ಸೇರಿದ್ದ ಜನಸಂದಣಿ ನಡುವೆ ಆಂಬುಲೆನ್ಸ್​ಗೆ ದಾರಿ ಮಾಡಿಕೊಟ್ಟ ವಿಡಿಯೋ ಈಗ ಎಲ್ಲರ ಗಮನ ಸೆಳೆಯುತ್ತಿದೆ. ಭಕ್ತರ ಮಾದರಿ ನಡೆಗೆ ಉತ್ತಮ ಪ್ರಶಂಸೆ ವ್ಯಕ್ತವಾಗಿದೆ.