ಬಂಗಾಳ ಎಲೆಕ್ಷನ್​: ಕೊನೆಯ ದಿನವೂ ಬಾಂಬ್​ ಸಿಡಿಸಿದ ದುಷ್ಕರ್ಮಿಗಳು

ಕೋಲ್ಕತ್ತಾ: ಪಶ್ಚಿಮ ಬಂಗಾಳದಲ್ಲಿಂದು 8ನೇ ಹಾಗೂ ಅಂತಿಮ ಹಂತದ ಮತದಾನ ನಡೆಯುತ್ತಿದ್ದು, ಚುನಾವಣೆ ಆರಂಭದಿಂದಲೂ ರಾಜ್ಯವು ಹಿಂಸಾಚಾರಗಳಿಗೆ ಸಾಕ್ಷಿಯಾಗಿದೆ. ಇಂದು ಜೋರಸಂಕೊ ಕ್ಷೇತ್ರದ ಮಹಾಜತಿ ಸದನ್ ಸಭಾಂಗಣದ ಎದುರು ದುಷ್ಕರ್ಮಿಗಳು ಕಚ್ಛಾ ಬಾಂಬ್​ ಸಿಡಿಸಿದ್ದು, ಕೇಂದ್ರ ಭದ್ರತಾ ಪಡೆ ಮತ್ತು ಕೋಲ್ಕತ್ತಾ ವಿಶೇಷ ಪೊಲೀಸರ ಪಡೆಗಳು ಸ್ಥಳದಲ್ಲಿ ಬೀಡುಬಿಟ್ಟಿವೆ. ಘಟನೆಯ ಹಿಂದೆ ಬಿಜೆಪಿ ಕೈವಾಡವಿದೆ ಎಂದು ಜೋರಸಂಕೊ ಕ್ಷೇತ್ರದ ಟಿಎಂಸಿ​ ಅಭ್ಯರ್ಥಿ ವಿವೇಕ್ ಗುಪ್ತಾ ಆರೋಪಿಸಿದ್ದಾರೆ. ಇನ್ನು ಘಟನೆ ಬಗ್ಗೆ ವಿವರ ನೀಡುವಂತೆ ಚುನಾವಣಾ ಆಯೋಗ ಕೇಳಿದೆ.