ಚಂಡೀಗಢ: ಪಂಜಾಬ್ನಲ್ಲಿ ತಾಯಂದಿರ ಸಾವಿನ ಪ್ರಮಾಣದಲ್ಲಿ ದಿಢೀರ್ ಏರಿಕೆಯಾಗಿದ್ದು, ಈ ಅಂಕಿ ಅಂಶಗಳು ಆರೋಗ್ಯ ಇಲಾಖೆಗೆ ಹೊಸ ಸವಾಲು ಜೊತೆಗೆ ಆತಂಕ ಮೂಡಿಸಿದೆ. ಅಂಕಿ - ಅಂಶಗಳ ಪ್ರಕಾರ, ಕಳೆದ ಮೂರು ತಿಂಗಳಿನಿಂದ 87ರಷ್ಟು ತಾಯಂದಿರು ಸಾವನ್ನಪ್ಪಿದ್ದು, ಇದರಲ್ಲಿ ಒಬ್ಬರು ಅಪ್ರಾಪ್ತರಾಗಿದ್ದಾರೆ. ಪಂಜಾನ್ನ ನಾಲ್ಕು ಜಿಲ್ಲೆಗಳಲ್ಲಿ ಈ ಸಾವಿನ ಪ್ರಕರಣ ಹೆಚ್ಚಾಗಿದ್ದು, ಇದನ್ನು ತಡೆಟ್ಟುವ ಕ್ರಮ ಇನ್ನೂ ಪಂಜಾಬ್ ಆರೋಗ್ಯ ವ್ಯವಸ್ಥೆಯಿಂದ ಆಗಿಲ್ಲ. ಪಂಜಾಬ್ ಸರ್ಕಾರ ಆರೋಗ್ಯ ವಲಯಕ್ಕೆ ಹೆಚ್ಚಿನ ಪ್ರಾಮುಖ್ಯತೆ ನೀಡಿರುವುದಾಗಿ ತಿಳಿಸಿದರೂ ಗರ್ಭಿಣಿಯರ ಸಾವಿನ ಸಂಖ್ಯೆಯಲ್ಲಿ ಇಳಿಕೆ ಕಂಡಿಲ್ಲ.
ಅಮೃತ್ಸರದಲ್ಲಿ ಹೆಚ್ಚಿನ ಸಾವು: ರಾಜ್ಯದ ಅಮೃತಸರ ಜಿಲ್ಲೆಯಲ್ಲಿ ಅತಿ ಹೆಚ್ಚು ತಾಯಂದಿರ ಸಾವು ವರದಿಯಾಗಿದೆ. ಮೇಲಿನ ಅಂಕಿ - ಅಂಶದಲ್ಲಿ 13 ಸಾವು ಇಲ್ಲಿ ದಾಖಲಾಗಿದ್ದು, 10 ತರ್ನ್ ತರನ್ ದಾಖಲಾದರೆ, 7 ಗರ್ಭಿಣಿಯರು ಫಿರೋಜ್ಪುರ್ ಮತ್ತು ಗುರುದಾಸ್ಪುರ್ನಲ್ಲಿ ಮೃತಪಟ್ಟಿದ್ದಾರೆ ಎಂದು ದಾಖಲಾಗಿದೆ. ಈ ಎರಡು ಜಿಲ್ಲೆಗಳು ಗಡಿ ಜಿಲ್ಲೆಗಳಾಗಿದ್ದು, ಇಲ್ಲಿನ ಆರೋಗ್ಯ ವ್ಯವಸ್ಥೆ ಬಗ್ಗೆ ಪ್ರಶ್ನೆ ಮೂಡಿಸುತ್ತಿದೆ. ಈ ಅಂಕಿ - ಅಂಶಗಳು ಇದೀಗ ಸರ್ಕಾರಕ್ಕೆ ಎಚ್ಚರಿಕೆ ಗಂಟೆಯನ್ನು ಬಾರಿಸಿವೆ.
ಸರ್ಕಾರಿ- ಖಾಸಗಿ ಆಸ್ಪತ್ರೆಗಳೆರಡರಲ್ಲೂ ಸಾವು: 87 ಸಾವುಗಳಲ್ಲಿ ಒಂದು ಸಾವು 17 ವರ್ಷದ ಅಪ್ರಾಪ್ತೆಯಾದ್ದಾಗಿದ್ದು, ದೊಡ್ಡ ಪ್ರಶ್ನೆ ಮೂಡಿಸಿದೆ. ಸರ್ಕಾರಿ ಮತ್ತು ಖಾಸಗಿ ಆಸ್ಪತ್ರೆಗಳಲ್ಲಿ ಎರಡರಲ್ಲೂ ಈ ಸಾವಿನ ವರದಿ ಆಗಿದೆ. ಅಮೃತ್ಸರದ ಮೆಡಿಕಲ್ ಕಾಲೇಜಿನಲ್ಲಿ 16 ಸಾವು ಸಂಭವಿಸಿದೆ, ಇದರಲ್ಲಿ 8 ಮಂದಿ ಪ್ರಸವದ ಬಳಿಕ ಸಾವನ್ನಪ್ಪಿದರೆ, 8 ಮಂದಿ ಪ್ರಸವದ ವೇಳೆ ಸಾವನ್ನಪ್ಪಿದ್ದಾರೆ
ಅನೇಕ ಕಾರಣಗಳು: ತಾಯಂದಿರ ಸಾವಿನ ಪ್ರಮುಖ ಕಾರಣವನ್ನು ಆಯಾ ಆಸ್ಪತ್ರೆಗಳೇ ಸ್ಪಷ್ಟಪಡಿಸಬೇಕಿದೆ. ಆದಾಗ್ಯೂ, ಪ್ರಾಥಮಿಕ ಮಾಹಿತಿ ಅನುಸಾರ, ಈ ಸಾವಿಗೆ ಪ್ರಮುಖ ಕಾರಣ, ರಕ್ತದ ಕೊರತೆ, ಕಡಿಮೆ ರಕ್ತ ಸ್ರಾವ, ಹೃದಯಾಘಾತ ಮತ್ತು ಸ್ತನ ಕ್ಯಾನ್ಸರ್ ಆಗಿದೆ. ಈ ಅಂಕಿ ಅಂಶಗಳು 2023ರ ಏಪ್ರಿಲ್ನಿಂದ ಜೂನ್ 2023ರ ನಡುವೆ ನಡೆದ ಅಂಕಿ ಅಂಶವಾಗಿದೆ.
ಆರೋಗ್ಯ ಇಲಾಖೆ ಹೇಳುವುದೇನು: ಈಟಿವಿ ಭಾರತದೊಂದಿಗೆ ಈ ಕುರಿತು ಮಾತನಾಡಿರುವ, ಪಂಜಾಬ್ನ ತಾಯಿ ಮತ್ತು ಮಕ್ಕಳ ಆರೋಗ್ಯ ಸೇವೆಯ ಸಹಾಯಕ ನಿರ್ದೇಶಕರಾದ ಡಾ ವಿನೀತ್ ನಗ್ಪಾಲ್, ಮೂರು ತಿಂಗಳಲ್ಲಿ ಆದ ಈ 87 ಸಾವು ಕಾಳಜಿ ಮೂಡಿಸಿದೆ. ಈ ನಿಟ್ಟಿನಲ್ಲಿ ಆರೋಗ್ಯ ಇಲಾಖೆ ಸಂಬಂಧಿಸಿದ ತಜ್ಞರು ಮತ್ತು ಸೂಚಕರಿಂದ ವರದಿ ಕೇಳಿದೆ. ಪಂಜಾಬ್ನಲ್ಲಿ ತಾಯಂದಿರ ಮತ್ತು ಮಕ್ಕಳ ಸಾವಿನ ಸಂಖ್ಯೆ ಇಳಿಕೆಗೆ ಅನೇಕ ಕಾರ್ಯಕ್ರಮಗಳನ್ನು ಜಾರಿಗೆ ತರಲಾಗಿದೆ.
ಇದರ ಅಡಿ 34 ಆಸ್ಪತ್ರೆಗಳನ್ನು ತಾಯಿ ಮತ್ತು ಮಕ್ಕಳಿಗೆ ಮೀಸಲಿಡಲಾಗಿದೆ. ಅನಿಮಿಯಾ ಫ್ರೀ ಇಂಡಿಯಾ, ಜನನಿ ಸುರಕ್ಷಾ ಕಾರ್ಯಕ್ರಮ, ಜನನಿ ಸುರಕ್ಷಾ ಯೋಜನಾ ಮತ್ತು ಪ್ರಧಾನ ಮಂತ್ರಿ ಸುರಕ್ಷಾ ಮಾತೃತ್ವ ಅಭಿಯಾನದಂತಹ ಯೋಜನೆಗಳನ್ನು ಅಳವಡಿಸಿಕೊಳ್ಳಲಾಗಿದೆ. ತಾಯಿ ಮತ್ತು ಮಗುವಿನ ಕಾಳಜಿ ಮತ್ತು ಆರೋಗ್ಯ ಅಭಿವೃದ್ಧಿಗೆ ಕಾರ್ಯ ನಿರ್ವಹಿಸಲಾಗುತ್ತಿದೆ ಎಂದರು.
ಇದನ್ನೂ ಓದಿ: ಜಗತ್ತಿನ ಯಾವುದೇ ದೇಶವೂ ಸಂಪೂರ್ಣ ಲಿಂಗ ಸಮಾನತೆ ಸಾಧಿಸಿಲ್ಲ: ವಿಶ್ವಸಂಸ್ಥೆ
