IND vs SA T20: ಚೊಚ್ಚಲ ಶತಕ ಸಿಡಿಸಿ ದಾಖಲೆ ಬರೆದ ತಿಲಕ್​ ವರ್ಮಾ: ಈ ಸಾಧನೆ ಮಾಡಿದ 4ನೇ ಭಾರತೀಯ!

ದಕ್ಷಿಣ ಆಫ್ರಿಕಾ ವಿರುದ್ಧ ನಡೆದ 3ನೇ ಟಿ20 ಪಂದ್ಯದಲ್ಲಿ ಭಾರತ ರೋಚಕ ಗೆಲುವು ಸಾಧಿಸಿದೆ. ಇದರೊಂದಿಗೆ ಯುವ ಬ್ಯಾಟರ್​ ತಿಲಕ್​ ವರ್ಮಾ ಹೊಸ ದಾಖಲೆ ಬರೆದರು.

IND vs SA 3rd T20 Highlights: ದಕ್ಷಿಣ ಆಫ್ರಿಕಾ ವಿರುದ್ಧ ಬುಧವಾರ ನಡೆದ 4 ಪಂದ್ಯಗಳ ಟಿ20 ಸರಣಿ (T20 Series)ಯ 3ನೇ ಪಂದ್ಯದಲ್ಲಿ ಟೀಂ ಇಂಡಿಯಾ ರೋಚಕ ಗೆಲುವು ಸಾಧಿಸಿತು. ಇದರೊಂದಿಗೆ ತಂಡ ಸರಣಿಯಲ್ಲಿ 2-1ರ ಮುನ್ನಡೆ ಪಡೆಯಿತು.

ಸೂಪರ್​ಸ್ಪೋರ್ಟ್​ ಪಾರ್ಕ್​ ಮೈದಾನದಲ್ಲಿ ನಡೆದ ಈ ಪಂದ್ಯದಲ್ಲಿ ಟಾಸ್​ ಸೋತು ಮೊದಲು ಬ್ಯಾಟ್​ ಮಾಡಿದ ಭಾರತ, ತಿಲಕ್​ ವರ್ಮಾ (107*) ಮತ್ತು ಅಭಿಷೇಕ್​ ಶರ್ಮಾ (50) ಸ್ಫೋಟಕ ಬ್ಯಾಟಿಂಗ್​ ಬಲದಿಂದ ನಿಗದಿತ 20 ಓವರ್​ಗಳಲ್ಲಿ 6 ವಿಕೆಟ್​ ನಷ್ಟಕ್ಕೆ 219 ರನ್​ ಪೇರಿಸಿತು.

ಈ ಗುರಿ ಬೆನ್ನತ್ತಿದ ದಕ್ಷಿಣ ಆಫ್ರಿಕಾ ಕೂಡ ಕಠಿಣ ಪ್ರತಿರೋಧ ತೋರಿತು. ಆರಂಭಿಕ ಎರಡು ಓವರ್‌ಗಳಲ್ಲಿ ಅಬ್ಬರಿಸಿ 27 ರನ್​ ಕಲೆ ಹಾಕಿದರು. ಈ ವೇಳೆ ಎದುರಾಳಿ ತಂಡದ ಓಟಕ್ಕೆ ಅರ್ಷದೀಪ್​ ಸಿಂಗ್​ ಕಡಿವಾಣ​ ಹಾಕಿದರು. 20 ರನ್​ ಗಳಿಸಿದ್ದ ರಿಕಲ್​ಟನ್​ ವಿಕೆಟ್​ ಉರುಳಿಸಿದರು. ಪವರ್​ ಪ್ಲೇ ಮುಕ್ತಾಯಕ್ಕೆ 3 ಓವರ್​ ಬಾಕಿ ಇದ್ದಾಗ ವರುಣ್​ ಚಕ್ರವರ್ತಿ ರಿಝ್​ ಹೆಂಡ್ರಿಕ್ಸ್​ (21) ಅವರ ವಿಕೆಟ್​ ಪಡೆದರು. ಉಳಿದ ಬ್ಯಾಟರ್​ಗಳ ಪೈಕಿ ಕ್ಲಾಸೇನ್​ (41), ಮಾರ್ಕೋ ಜಾನ್​ಸೆನ್​ (54) ಉತ್ತಮ ಪ್ರದರ್ಶನ ತೋರಿದರೂ ತಂಡವನ್ನು ಗೆಲುವಿನ ದಡ ಸೇರಿಸಲು ಸಾಧ್ಯವಾಗಲಿಲ್ಲ ಮಿಕ್ಕ ಬ್ಯಾಟರ್​ಗಳ ಸಹಾಯದಿಂದ ದಕ್ಷಿಣ ಆಫ್ರಿಕಾ 208/7 ಗಳಿಸಲಷ್ಟೇ ಶಕ್ತವಾಯಿತು. ಭಾರತ 11 ರನ್​ಗಳ ರೋಚಕ ಗೆಲುವು ಸಾಧಿಸಿತು.

For his match-winning Maiden T20I Century, Tilak Varma is adjudged the Player of the Match 👏👏

Scorecard - https://t.co/JBwOUChxmG#TeamIndia | #SAvIND | @TilakV9 pic.twitter.com/kvVhaYwOG7

— BCCI (@BCCI) November 13, 2024

ತಿಲಕ್​ ವರ್ಮಾ ಶತಕದ ಸೊಗಸು: ತಿಲಕ್​ ವರ್ಮಾ ಅಜೇಯ ಶತಕಸಮೇತ 107 ರನ್​ ಕಲೆ ಹಾಕುವ ಮೂಲಕ ಹೊಸ ದಾಖಲೆ ಬರೆದರು. ತೆಲುಗು ಬ್ಯಾಟರ್​ ಅಂತಾರಾಷ್ಟ್ರೀಯ ಟಿ20ಯಲ್ಲಿ ಶತಕ ಸಿಡಿಸಿದ 12ನೇ ಭಾರತೀಯ ಎನಿಸಿಕೊಂಡರು. ಜೊತೆಗೆ ಯಶಸ್ವಿ ಜೈಸ್ವಾಲ್​ (Yashasvi Jaiswal) ನಂತರ T20Iನಲ್ಲಿ ಶತಕ ಸಿಡಿಸಿದ ಕಿರಿಯ ಬ್ಯಾಟರ್​ ಎನಿಸಿಕೊಂಡರು.

ಚೊಚ್ಚಲ ಶತಕ ಸಿಡಿಸಿದ ಕಿರಿಯ ಬ್ಯಾಟರ್‌ಗಳು:​

• ಯಶಸ್ವಿ ಜೈಸ್ವಾಲ್​ ಅವರು ನೇಪಾಳ ವಿರುದ್ಧ 2023ರಲ್ಲಿ ನಡೆದ ಟಿ20 ಪಂದ್ಯದಲ್ಲಿ ಚೊಚ್ಚಲ ಶತಕ ಸಿಡಿಸಿದ್ದರು. ಈ ವೇಳೆ ಅವರಿಗೆ 21 ವರ್ಷ 279 ದಿನ ವಯಸ್ಸಾಗಿತ್ತು.
• ಇದೀಗ ತಿಲಕ್​ ವರ್ಮಾ ಈ ಸಾಧನೆ ಮಾಡಿದ 2ನೇ ಬ್ಯಾಟರ್​ ಆಗಿದ್ದಾರೆ. ಇವರು 22 ವರ್ಷ 5ನೇ ದಿನದಂದು ಶತಕ ಸಿಡಿಸಿ ಅತ್ಯಂತ ಕಿರಿಯ ಆಟಗಾರ ಎನಿಸಿಕೊಂಡಿದ್ದಾರೆ.
• ಮೂರನೇ ಸ್ಥಾನದಲ್ಲಿ ಶುಭಮನ್​ ಗಿಲ್​ ಇದ್ದಾರೆ. ಇವರು 23 ವರ್ಷ 146ನೇ ದಿನದಂದು ಅಂತಾರಾಷ್ಟ್ರೀಯ ಟಿ20 ಪಂದ್ಯದಲ್ಲಿ ಚೊಚ್ಚಲ ಶತಕ ಬಾರಿಸಿದ್ದರು. 2023ರಲ್ಲಿ ಅಹಮದಾಬಾದ್‌ನಲ್ಲಿ ನ್ಯೂಜಿಲೆಂಡ್​ ವಿರುದ್ಧ ನಡೆದ ಪಂದ್ಯದಲ್ಲಿ ಈ ದಾಖಲೆ ಬರೆದಿದ್ದರು.
• ಈ ಪಟ್ಟಿಯಲ್ಲಿ ಮಾಜಿ ಆಲ್​ರೌಂಡರ್​ ಸುರೇಶ್​ ರೈನಾ ಕೂಡ ಇದ್ದಾರೆ. ಇವರು ದಕ್ಷಿಣ ಆಫ್ರಿಕಾ ವಿರುದ್ಧ 2010ರಲ್ಲಿ ನಡೆದ ಪಂದ್ಯದಲ್ಲಿ ಮೊದಲ ಶತಕ ಸಿಡಿಸಿದ್ದರು. ಈ ವೇಳೆ ಅವರಿಗೆ 23 ವರ್ಷ 156 ದಿನ ವಯಸ್ಸಾಗಿತ್ತು.

ಮುಂದಿನ ಪಂದ್ಯ: ನಾಲ್ಕನೇ ಮತ್ತು ಕೊನೆಯ ಟಿ20 ಪಂದ್ಯ ನ.15ರಂದು ಜೋಹ್​ನ್ಸ್‌ಬರ್ಗ್​ನಲ್ಲಿ ನಡೆಯಲಿದೆ.

ಇದನ್ನೂ ಓದಿ: ಗೊಯೆಂಕಾ ವಿಷಯ ಅಲ್ಲವೇ ಅಲ್ಲ, ಆ 2 ಕಾರಣಕ್ಕೆ ನಾನು ಲಕ್ನೋ ತೊರೆದೆ: ಕೆ.ಎಲ್.ರಾಹುಲ್