ನವದೆಹಲಿ: ಚಳಿಗಾಲದ ತೀವ್ರತೆ ಹೆಚ್ಚಿದ್ದು, ಇದು ಹೃದಯಾಘಾತದಂಥ ಪ್ರಕರಣಗಳ ಹೆಚ್ಚಳಕ್ಕೂ ಕಾರಣವಾಗಬಹುದು ಎಂದು ತಜ್ಞರು ಎಚ್ಚರಿಸಿದ್ದಾರೆ. ಅಲ್ಲದೇ ಈ ಅವಧಿಯಲ್ಲಿ ಕಣ್ಣಿನ ಆರೈಕೆಗೂ ಹೆಚ್ಚಿನ ಗಮನ ನೀಡಬೇಕು ಎಂದು ಒತ್ತಿ ಹೇಳಿದ್ದಾರೆ.
ಇತ್ತೀಚಿನ ಅಧ್ಯಯನಗಳು ಚಳಿಗಾಲದಲ್ಲಿ ಹೃದಯಾಘಾತದ ಪ್ರಕರಣ ಹೆಚ್ಚಳವಾಗುವ ಕುರಿತು ತಿಳಿಸಿವೆ. ಈ ಹಿನ್ನೆಲೆಯಲ್ಲಿ ತಜ್ಞರು, ಮೈ ಕೊರೆಯುವ ಚಳಿ ಮತ್ತು ವಿಶಿಷ್ಟ ಋತುಮಾನದ ಅಂಶಗಳು ಹೃದಯ ರಕ್ತನಾಳ ಮತ್ತು ಕಣ್ಣಿನ ಸಂಬಂಧಿ ಸಮಸ್ಯೆಗೆ ಕಾರಣವಾಗಲಿದೆ ಎಂದಿದ್ದಾರೆ. ಚಳಿ ತಾಪಮಾನ ರಕ್ತನಾಳವನ್ನು ಸಂಕುಚಿತಗೊಳಿಸುತ್ತದೆ ಮತ್ತು ರಕ್ತದೊತ್ತಡವನ್ನು ಹೆಚ್ಚಿಸುತ್ತದೆ. ಇವು ಹೃದಯಾಘಾತವನ್ನು ಪ್ರೇರೇಪಿಸುತ್ತದೆ. ವಿಶೇಷವಾಗಿ ಈಗಾಗಲೇ ಹೃದಯ ರಕ್ತನಾಳ ಸಮಸ್ಯೆ ಹೊಂದಿರುವವರಲ್ಲಿ ಇದು ಜಾಸ್ತಿ ಎಂದು ವೈದ್ಯರು ತಿಳಿಸಿದ್ದಾರೆ.
ಈ ಹಿನ್ನೆಲೆಯಲ್ಲಿ ಜನರು ಚಳಿಗಾಲದ ಸಂದರ್ಭದಲ್ಲಿ ಹೃದಯದ ಆರೋಗ್ಯದ ಬಗ್ಗೆ ಜಾಗ್ರತೆಯಿಂದ ಇರಬೇಕು. ನಿಯಮಿತ ವ್ಯಾಯಾಮ ರೂಢಿಸಿಕೊಳ್ಳಬೇಕು. ಹೃದಯದ ಆರೋಗ್ಯ ಡಯಟ್ ಮತ್ತು ಬೆಚ್ಚಗಿರಬೇಕು ಎಂದು ಸಲಹೆ ನೀಡಿದ್ದಾರೆ. ಚಳಿಗಾಲದ ಅವಧಿಯಲ್ಲಿ ಹೃದಯಾಘಾತದ ಅಪಾಯ ಹೆಚ್ಚಿದ್ದು, ಇದಕ್ಕೆ ಋತುಮಾನದ ಅಂಶಗಳು ಕೊಡುಗೆ ನೀಡುತ್ತವೆ ಎಂದು ಉಜಾಲಾ ಸಿಗ್ನಸ್ ಗ್ರೂಪ್ ಆಫ್ ಹಾಸ್ಪಿಟಲ್ಸ್‌ನ ಹೃದಯತಜ್ಞ ಡಾ.ವಿಜಯ್ ಕುಮಾರ್ ಹೇಳುತ್ತಾರೆ.
ತಾಪಮಾನದ ಕುಸಿತ ಹೃದಯದ ಮೇಲೆ ಹೆಚ್ಚಿನ ಭಾರ ಹಾಕುತ್ತದೆ. ಇದು ಪ್ರತಿಯೊಬ್ಬರಲ್ಲೂ ಹೃದಯದ ಸಮಸ್ಯೆಗೆ ಕಾರಣವಾಗಬಹುದು. ಅದರಲ್ಲೂ ಅಧಿಕ ರಕ್ತದೊತ್ತಡ ರೋಗಿಗಳಲ್ಲಿ ಚಳಿಗಾಲದ ತಾಪಮಾನ ರಕ್ತದನಾಳದ ಮೇಲೆ ಗಮನಾರ್ಹ ಅಪಾಯ ಹೊಂದಿರುತ್ತದೆ. ಇದು ಬ್ರೈನ್ ಸ್ಟ್ರೋಕ್ಗೂ ಕಾರಣವಾಗಬಹುದು ಎಂದಿದ್ದಾರೆ ಕಾನ್ಫುರ್ ರೆಗೆನ್ಸಿ ಆಸ್ಪತ್ರೆಯ ಡಾ.ಅಬಿನಿತ್ ಗುಪ್ತಾ.
ಬೇಸಿಗೆ ಕಾಲಕ್ಕೆ ಹೋಲಿಸಿದಾಗ ಚಳಿಗಾಲದಲ್ಲಿ ಹೃದಯಾಘಾತದ ಸಾವು ಅಧಿಕ ಎಂಬುದನ್ನು ದತ್ತಾಂಶಗಳು ತಿಳಿಸಿವೆ. ಆದಾಗ್ಯೂ ಕೆಲವು ಜೀವನಶೈಲಿಯಲ್ಲಿನ ಬದಲಾವಣೆಯನ್ನು ಅಳವಡಿಸಿಕೊಳ್ಳುವ ಮೂಲಕ ಇದರ ಅಪಾಯವನ್ನು ಕಡಿಮೆ ಮಾಡಬಹುದು. ನಿಯಮಿತ ವ್ಯಾಯಾಮ, ಸುಧಾರಿತ ಆಹಾರ ಪದ್ಧತಿ, ಬೆಚ್ಚಗಿನ ನೀರು ಸೇವನೆಯೊಂದಿಗಿನ ಹೈಡ್ರೇಷನ್ ಪ್ರಮುಖ ಪಾತ್ರ ವಹಿಸುತ್ತದೆ ಎಂದು ಗುಪ್ತಾ ಸಲಹೆ ನೀಡಿದ್ದಾರೆ.
ಕಣ್ಣಿನ ಬಗ್ಗೆಯೂ ಇರಲಿ ಕಾಳಜಿ: ಚಳಿಗಾಲದಲ್ಲಿ ಕಣ್ಣಿನ ಸಮಸ್ಯೆಗಳು ಗಮನಾರ್ಹವಾಗಿ ಹೆಚ್ಚುವ ಹಿನ್ನೆಲೆಯಲ್ಲಿ ಅವುಗಳ ನಿರ್ವಹಣೆ ಕೂಡಾ ಅವಶ್ಯಕ. ಚಳಿಗಾಲದಲ್ಲಿ ಕಣ್ಣಿನ ಆರೋಗ್ಯದ ಬಗ್ಗೆ ಅನೇಕ ಸವಾಲುಗಳು ಏಳುತ್ತವೆ. ಒಣ ಗಾಳಿ, ಒಳಾಂಗಣದಲ್ಲಿನ ಹೀಟಿಂಗ್ ಮತ್ತು ಜೋರಾದ ಗಾಳಿ ಕಣ್ಣಿನ ಶುಷ್ಕತೆಗೆ ಕಾರಣವಾಗುತ್ತವೆ. ಇದು ಕಣ್ಣಿಗೆ ಕಿರಿಕಿರಿಯಂತಹ ಅನೇಕ ಗಂಭೀರ ಸಮಸ್ಯೆಗಳಿಗೂ ಕಾರಣವಾಗುತ್ತದೆ.
ಹೀಗಾಗಿ ಹೈಡ್ರೇಟ್ ಆಗಿರುವುದು, ಬೀಸುವ ತಣ್ಣನೆಯ ಜೋರು ಗಾಳಿಯಿಂದ ಕಣ್ಣನ್ನು ರಕ್ಷಿಸಿಕೊಳ್ಳುವ ಮೂಲಕ ಕಣ್ಣಿನ ಆರೋಗ್ಯ ಕಾಪಾಡಬಹುದು ಎನ್ನುತ್ತಾರೆ ಆರ್ಬೀಸ್ ಇಂಟರ್ನ್ಯಾಷನಲ್ ಕಂಟ್ರಿ ನಿರ್ದೇಶಕ ಡಾ.ರಿಶಿ ರಾಜ್ ಬೋರ್ಹಾ.(ಪಿಟಿಐ)
ಇದನ್ನೂ ಓದಿ: ಫಿಟ್ ಆಗಿರುವ ಜನರನ್ನೂ ಕಾಡುತ್ತಿದೆ ಹೃದಯಾಘಾತ; ಉತ್ತರ ಹುಡುಕಾಟದಲ್ಲಿ ತಜ್ಞರು
