ಹೈದರಾಬಾದ್: ಒತ್ತಡ ಮತ್ತು ನಿದ್ರೆ ಹೀನತೆ ಮತ್ತು ಹಾರ್ಮೋನ್ ಅಸಮತೋಲನಗಳಿಂದ ಕಣ್ಣಿನ ಕೆಳಗೆ ಕಪ್ಪು ವರ್ತುಲಗಳು ಕಾಡುವುದು ಸಾಮಾನ್ಯ. ಈ ಕಪ್ಪು ವರ್ತುಲಗಳಿಂದ ಮುಖದ ಸೌಂದರ್ಯ ಹಾಳಾಗುವುದು ಸುಳ್ಳಲ್ಲ. ಈ ಕಾರಣಕ್ಕೆ ಆರಂಭದಿಂದಲೇ ಈ ಕಪ್ಪು ವರ್ತುಲಗಳ ನಿವಾರಣೆಗೆ ಕ್ರಮವಹಿಸಬೇಕು. ಕಪ್ಪು ವರ್ತುಲಗಳಿಗೆ ಮನೆಯಲ್ಲಿಯೇ ಸಿಗುವ ಕೆಲವು ಔಷಧಗಳು ರಾಮಬಾಣವಾಗಿದ್ದು, ಇವುಗಳ ಬಳಕೆ ಮೂಲಕ ಇದಕ್ಕೆ ಪರಿಹಾರ ಕಂಡು ಕೊಳ್ಳಬಹುದಾಗಿದೆ.
ಆಲೂಗಡ್ಡೆ: ಆಲೂಗಡ್ಡಿಯಲ್ಲಿ ಆ್ಯಂಟಿ ಆಕ್ಸಿಡೆಂಟ್ ಇದ್ದು, ಇವು ಚರ್ಮಕ್ಕೆ ಉತ್ತಮವಾಗಿದೆ. ಇದು ಕಣ್ಣಿನ ಕೆಳಗೆ ಮೂಡುವ ಕಪ್ಪು ವರ್ತುಲವನ್ನು ತಗ್ಗಿಸುತ್ತದೆ. ಆಲೂಗಡ್ಡೆಯನ್ನು ಸಣ್ಣದಾಗಿ ವೃತ್ತಾಕಾರವಾಗಿ ಕತ್ತರಿಸಿ, 10 ನಿಮಿಷ ಕಣ್ಣ ಕೆಳಗೆ ಇಡಿ. ಬಳಿಕ ಮುಖವನ್ನು ತಣ್ಣೀರಿನಿಂದ ತೊಳೆಯಿರಿ. ಪ್ರತಿನಿತ್ಯ ಈ ರೀತಿ ಮಾಡುವುದರಿಂದ ಉತ್ತಮ ಫಲಿತಾಂಶವನ್ನು ಪಡೆಯಬಹುದು.
ಪುದಿನಾ: ಪುದಿನಾ ಎಲೆಗಳಲ್ಲಿ ಮೆತನೊಲ್ ಇದ್ದು, ಇವು ಚರ್ಮವನ್ನು ಪುನರ್ಜೀವನಗೊಳಿಸುವ ಅಂಶವನ್ನು ಹೊಂದಿರುತ್ತದೆ. ಇದು ಕೂಡ ಕಣ್ಣಿನ ಕಪ್ಪು ವರ್ತುಲ ಮತ್ತು ನೆರಿಗೆಯನ್ನು ತಡೆಯಲು ಸಹಾಯ ಮಾಡುತ್ತದೆ. ಪುದಿನಾ ಎಲೆಗಳನ್ನು ಚೆನ್ನಾಗಿ ಜಜ್ಜಿ ಅದನ್ನು ಕಪ್ಪು ವರ್ತುಲದಲ್ಲಿ ಹಚ್ಚಿ ಐದು ನಿಮಿಷ ಬಿಟ್ಟು ತೊಳೆಯಬಹುದು.
ಅರಿಶಿಣ: ಇದರಲ್ಲಿ ಕ್ಯೂರಿಕ್ಯುಮಿನ್ ಎಂಬ ವಿಶೇಷ ರಾಸಾಯನಿಕ ಹೊಂದಿದೆ. ಇದು ಚರ್ಮದ ಹೊಳಪಿಗೆ ಸಹಾಯ ಮಾಡುತ್ತದೆ. ಇದು ಮೊಡವೆ, ಕಪ್ಪು ವರ್ತುಲ ಸಮಸ್ಯೆಗೆ ರಾಮಬಾಣ. ಬಾದಾಮಿ ಎಣ್ಣೆಗೆ ಅರ್ಧ ಸ್ಪೂನ್ ಅರಿಶಿಣ ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿ ಹಚ್ಚಿ. ಒಂದು ಗಂಟೆ ಬಳಿಕ ತೊಳೆಯಬೇಕು. ವಾರದಲ್ಲಿ ಮೂರು ದಿನ ಈ ರೀತಿ ಮಾಡಿ ಬಳಿಕ ನೋಡಿ. ಕಪ್ಪು ವರ್ತುಲ ಕಡಿಮೆ ಮಾಡುತ್ತದೆ.
ಹಾಲು: ಹಾಲಿನಲ್ಲಿನ ಲ್ಯಾಕ್ಟಿಕ್ ಆಮ್ಲವೂ ತ್ವಚೆಗೆ ಉತ್ತಮವಾಗಿ ಕಾರ್ಯ ನಿರ್ವಹಿಸುತ್ತದೆ. ಇದು ಕೂಡ ಕಣ್ಣಿನ ಕಪ್ಪು ವರ್ತುಲ ಮತ್ತು ನೆರಿಗೆ ಕಡಿಮೆ ಮಾಡುತ್ತದೆ. ಹಾಲನ್ನು ಹತ್ತಿ ಬಟ್ಟೆಯಲ್ಲಿ ಅದ್ದಿ ಚೆನ್ನಾಗಿ ಸವರಿ. 15 ನಿಮಿಷದ ಬಳಿಕ ತಣ್ಣೀರಿನಿಂದ ತೊಳೆಯಿರಿ.
ಐ ಪ್ಯಾಕ್: ಇದು ಕೂಡ ಡಾರ್ಕ್ ಸರ್ಕಲ್ ಕಡಿಮೆ ಮಾಡುವಲ್ಲಿ ಸಹಾಯಕಾರಿ. ಈ ಪ್ಯಾಕ್ ಮಾಡಲು ನಾಲ್ಕ ಹನಿ ನಿಂಬೆ ಹಣ್ಣಿನ ರಸ, ಅರ್ಧ ಸ್ಪೂನ್ ತೆಂಗಿನ ಎಣ್ಣೆ, ಒಂದು ಚಮಚ ಸೌತೆಕಾಯಿ ರಸ ಹಾಕಿ ಚೆನ್ನಾಗಿ ಕಲಸಿ ಅದನ್ನು ಕಣ್ಣಿಗೆ ಹಚ್ಚಿ, ಮಸಾಜ್ ಮಾಡಿ. 10 ನಿಮಿಷ ಬಿಟ್ಟು ತಣ್ಣೀರಿನಿಂದ ತೊಳೆಯಿರಿ. ವಾರದಲ್ಲಿ ಕನಿಷ್ಠ ಒಂದು ದಿನ ಈ ಪ್ಯಾಕ್ ಹಾಕುವುದರಿಂದ ಉತ್ತಮ ಫಲಿತಾಂಶ ಪಡೆಯಬಹುದು.
ಇದನ್ನೂ ಓದಿ: ನಿಮ್ಮ ಡಯಟ್ನಲ್ಲಿ ಸೇರಿಸಿ ಮೆಂತ್ಯೆ ಕಾಳಿನ ರಸ; ಆಮೇಲೆ ನೋಡಿ ಮ್ಯಾಜಿಕ್
