ಭೀಮಾ ನದಿ ಪ್ರವಾಹಕ್ಕೆ ಕೊಚ್ಚಿ ಹೋದ ದೋಣಿ ಹಿಡಿಯಲು ಯುವಕರ ದುಸ್ಸಾಹಸ - ವಿಡಿಯೋ

ಪ್ರವಾಹದಿಂದ ಅಪಾಯಮಟ್ಟ ಮೀರಿ ಹರಿಯುತ್ತಿರುವ ಭೀಮಾ ನದಿಯಲ್ಲಿ ಕೊಚ್ಚಿ ಹೋಗುತ್ತಿದ್ದ ದೋಣಿಯನ್ನು ಹಿಡಿಯಲು ಯುವಕರ ಗುಂಪೊಂದು ದುಸ್ಸಾಹಸ ಪ್ರದರ್ಶಿಸಿರುವ ವಿಡಿಯೋ ಒಂದು ವೈರಲ್​ ಆಗಿದೆ.

ವಿಜಯಪುರ: ತುಂಬಿ ಹರಿಯುತ್ತಿರುವ ಭೀಮಾ ನದಿಯಲ್ಲಿ ಕೊಚ್ಚಿ ಹೋಗುತ್ತಿದ್ದ ದೋಣಿ ಹಿಡಿಯಲು ಭೀಮಾತೀರದ ಯುವಕರು ದುಸ್ಸಾಹಸ ಮೆರೆದಿರುವ ವಿಡಿಯೋ ವೈರಲ್ ಆಗಿದೆ.

ಸೊಂಟಕ್ಕೆ ಗಾಳಿ ತುಂಬಿದ ಟ್ಯೂಬ್​ಗಳನ್ನು ಕಟ್ಟಿಕೊಂಡು ನದಿಗೆ ಇಳಿದ ಯುವಕರು ದೋಣಿ ಹಿಡಿಯಲು ಪರಸ್ಪರ ಸ್ಪರ್ಧೆ ನಡೆಸಿದ್ದಾರೆ. ಜಿಲ್ಲೆಯ ಇಂಡಿ ತಾಲೂಕಿನ ಬರಗುಡಿ ಗ್ರಾಮದಲ್ಲಿ ಈ ಘಟನೆ ನಡೆದಿದೆ ಎನ್ನಲಾಗಿದೆ.

ಗ್ರಾಮದಲ್ಲಿ ನದಿ ದಾಟಲು ಇದ್ದ ದೋಣಿ ಭೀಮಾ ನದಿಯಲ್ಲಿ ಕೊಚ್ಚಿ ಹೋಗಿತ್ತು. ದೋಣಿ ತರಲು ಪ್ರಾಣ ಒತ್ತೆ ಇಟ್ಟು ಭೀಮೆಗೆ ಯುವಕರ ಗುಂಪು ಹಾರಿದೆ. 9 ಜನ ಯುವಕರ ಗುಂಪು ಈ ದುಸ್ಸಾಹಸಕ್ಕೆ ಕೈಹಾಕಿತ್ತು. ಯುವಕರ ಈ ನಡೆಗೆ ಬರಗುಡಿ ಗ್ರಾಮಸ್ಥರು ತಬ್ಬಿಬ್ಬಾಗಿದ್ದಾರೆ.