ಸ್ಯಾನಿಟರಿ ಪ್ಯಾಡ್​​ ಜೊತೆ ಗೋವಾ ಮದ್ಯ ಸಾಗಾಟ... ಕಂಟೇನರ್​​ ಸಮೇತ ಚಾಲಕ ವಶಕ್ಕೆ

ಗೋವಾ-ಬೆಳಗಾವಿ ಮಾರ್ಗವಾಗಿ ಬಂದ ಕಂಟೇನರ್ ಲಾರಿಯನ್ನು ಕಾರವಾರದ ಅನಮೋಡ್ ಚೆಕ್ ಪೋಸ್ಟ್ ಬಳಿ ತಡೆದ ಅಬಕಾರಿ ಸಿಬ್ಬಂದಿ, ತಪಾಸಣೆ ನಡೆಸಿದಾಗ ಗೋವಾ ಮದ್ಯ ಇರುವುದು ಪತ್ತೆಯಾಗಿದೆ.

ಕಾರವಾರ: ಸ್ಯಾನಿಟರಿ ಪ್ಯಾಡ್ ಮಧ್ಯೆ ಗೋವಾ ಮದ್ಯ ಸಾಗಿಸುತ್ತಿದ್ದ ಕಂಟೇನರ್ ಲಾರಿ ಸಮೇತ ಚಾಲಕನನ್ನು ಅಬಕಾರಿ ಇಲಾಖೆ ಅಧಿಕಾರಿಗಳು ವಶಕ್ಕೆ ಪಡೆದಿರುವ ಘಟನೆ ಜೊಯಿಡಾ ತಾಲೂಕಿನ ಅನಮೋಡ್ ಚೆಕ್ ಪೋಸ್ಟ್ ಬಳಿ ಇಂದು ನಡೆದಿದೆ.

ಗೋವಾ-ಬೆಳಗಾವಿ ಮಾರ್ಗವಾಗಿ ಬಂದ ಕಂಟೇನರ್ ಲಾರಿಯನ್ನು ಅನಮೋಡ್ ಚೆಕ್ ಪೋಸ್ಟ್ ಬಳಿ ತಡೆದ ಅಬಕಾರಿ ಸಿಬ್ಬಂದಿ ತಪಾಸಣೆ ನಡೆಸಿದರು. ತಮಿಳುನಾಡು ನೋಂದಣಿಯ ಲಾರಿಯಲ್ಲಿ ವಿಸ್ಪರ್ ಕಂಪನಿಯ ಸ್ಯಾನಿಟರಿ ಪ್ಯಾಡ್​​ಗಳ ಬಾಕ್ಸ್​ಗಳು ಇದ್ದವು. ಇವುಗಳ ನಡುವೆಯೇ 43 ಸಾವಿರ ರೂ. ಮೌಲ್ಯದ ಗೋವಾ ಮದ್ಯ ಪತ್ತೆಯಾಗಿದೆ.

ಇದರಿಂದಾಗಿ ಅನುಮಾನಗೊಂಡ ಸಿಬ್ಬಂದಿ, ಸ್ಯಾನಿಟರಿ ಪ್ಯಾಡ್​ಗಳ ಬಿಲ್​ಗಳನ್ನು ಕೇಳಿದಾಗ ಇದಕ್ಕೂ ಯಾವುದೇ ದಾಖಲೆಗಳಿರಲಿಲ್ಲ. ಹೀಗಾಗಿ ಚಾಲಕ ತಮಿಳುನಾಡು ಕೊಯಮತ್ತೂರು ಮೂಲದ ಸುಂದರರಾಜ್ ರಾಮಸ್ವಾಮಿಯನ್ನು ವಶಕ್ಕೆ ಪಡೆದು ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ. ಲಾರಿಯಲ್ಲಿದ್ದ ಸ್ಯಾನಿಟರಿ ಪ್ಯಾಡ್​ಗಳ ಮೌಲ್ಯ 11.50 ಲಕ್ಷವಾಗಿದ್ದು, ಜಪ್ತಿಯಾದ ಲಾರಿಯ ಅಂದಾಜು ಮೌಲ್ಯ 18 ಲಕ್ಷವಾಗಿದೆ.

ಅಬಕಾರಿ ಸಬ್ ಇನ್ಸ್​​ಪೆಕ್ಟರ್​ ರೇಷ್ಮಾ ಬಾನಾವಳಿಕರ್, ರಕ್ಷಕರಾದ ಎಂ.ಕೆ.ಮೊಗೇರ, ಸದಾಶಿವ ರಾಠೋಡ, ಟಿ.ಬಿ.ಗೊಂಡ, ಉಳ್ಳಪ್ಪ ತಳಸೆ, ದೀಪಕ್ ಬಾರಾಮತಿ ಈ ವೇಳೆ ಇದ್ದರು.