ಶಿರಸಿ (ಉತ್ತರಕನ್ನಡ): ಕಾಂಗ್ರೆಸ್ ಪಕ್ಷ ಯಾರನ್ನೋ ಓಲೈಕೆ ಮಾಡಲು, ಎಡಪಂಥೀಯ ವಿಚಾರಧಾರೆಯನ್ನು ಓಲೈಕೆ ಮಾಡಲು ಶಿಕ್ಷಣವನ್ನು ಸಮಸ್ಯಾತ್ಮಕವಾಗಿ ಮಾಡಬಾರದು ಎಂದು ಮಾಜಿ ಸಭಾಧ್ಯಕ್ಷ ವಿಶ್ವೇಶ್ವರ ಹೆಗಡೆ ಕಾಗೇರಿ ಹೇಳಿದರು. ಶಿರಸಿಯಲ್ಲಿನ ರಾಘವೇಂದ್ರ ಸರ್ಕಲ್ನಲ್ಲಿರುವ ಕಚೇರಿಯಲ್ಲಿ ಮಾಧ್ಯಮಗೋಷ್ಟಿ ನಡೆಸಿ ಮಾತನಾಡಿದ ಅವರು, ದೇಶದ ನೈಜ ಪರಿಸ್ಥಿತಿ ತಿಳಿಸುವ ವಿಷಯ ಇಂದಿನ ಪಠ್ಯ ಪುಸ್ತಕದಲ್ಲಿದೆ. ಆದರೆ ಕಾಂಗ್ರೆಸ್ ರಾಜಕೀಯ ಸಿದ್ಧಾಂತದಲ್ಲಿ ಯೋಚಿಸಿ, ಎಡಪಂಥೀಯ ಕೈಗೊಂಬೆಯಾಗಿ ಮುಖ್ಯಮಂತ್ರಿಯೂ ವರ್ತಿಸುತ್ತಿದ್ದಾರೆ. ಇದೇ ಕಾರಣದಿಂದ ಈಗ ಪಠ್ಯ ಪುಸ್ತಕ ಪುನರ್ ರಚನೆಯ ಬಗ್ಗೆ ಮಾತನಾಡುತ್ತಿದ್ದಾರೆ ಎಂದು ಟೀಕಿಸಿದರು.
ಖಾತೆ ಹಂಚಿಕೆ ಮಾಡಿ ಇನ್ನೂ ಒಂದು ತಿಂಗಳೂ ಆಗಿಲ್ಲ. ಪ್ರಾಥಮಿಕ, ಪ್ರೌಢ ಶಿಕ್ಷಣ ಮತ್ತು ಉನ್ನತ ಶಿಕ್ಷಣ ಸಚಿವರು ಮೊದಲು ಇಲಾಖೆಯ ಬಗ್ಗೆ ತಿಳಿದುಕೊಳ್ಳಲಿ. ಇಲಾಖೆಯ ಮಹತ್ವ, ವ್ಯಾಪ್ತಿ ತಿಳಿದುಕೊಳ್ಳಲಿ. ಈಗಾಗಲೇ ವಿದ್ಯಾರ್ಥಿಗಳಿಗೆ ಪುಸ್ತಕ ಹಂಚಿಕೆಯಾಗಿದೆ. ಶೈಕ್ಷಣಿಕ ತರಗತಿ ಆರಂಭವಾಗಿದೆ. ಈಗ ಗೊಂದಲ ಉಂಟು ಮಾಡುವುದು ಸರಿಯಲ್ಲ ಎಂದು ಹೇಳಿದರು. ಗುಲಾಮಿತನದ ಮನಸ್ಥಿತಿ ತರಲು ಕಾಂಗ್ರೆಸ್ ಪಠ್ಯ ಪುಸ್ತಕ ಬದಲಾವಣೆಗೆ ಚಿಂತನೆ ನಡೆಸಿದೆ. ಆದರೆ ಬಿಜೆಪಿ ಉತ್ತಮ ಜೀವನ ರೂಪಿಸಲು ಜಾರಿಗೆ ತಂದಿರುವ ಶಿಕ್ಷಣ ನೀತಿಯನ್ನು, ಪುಸ್ತಕಗಳನ್ನು ಮುಂದುವರೆಸಬೇಕು. ಇಲ್ಲದಿದ್ದಲ್ಲಿ ಖಂಡಿತ ಹೋರಾಟ ಮಾಡುತ್ತೇವೆ ಎಂದರು.
ಬೆಳೆಯುವ ಸಿರಿ ಮೊಳಕೆಯಲ್ಲಿ ಎಂಬಂತೆ ಈಗ ಆರಂಭ ಆಗಿರುವ ಕಾಂಗ್ರೆಸ್ ಸರ್ಕಾರ ರಾಜ್ಯದ ನಿರೀಕ್ಷೆಯನ್ನು ಹುಸಿಗೊಳಿಸುತ್ತಿದ್ದಾರೆ. ಆಡಳಿತವನ್ನು ಗೊಂದಲದ ಗೂಡು ಮಾಡಿದ್ದಾರೆ. ಸಚಿವರು ಖಾತೆ ತಿಳಿದುಕೊಳ್ಳುವ ಮೊದಲು ಗೊಂದಲದಲ್ಲಿ ಮುಳುಗಿರುವ ಸ್ಥಿತಿ ಬಂದಿದೆ. ವಿಶೇಷವಾಗಿ ಗ್ಯಾರಂಟಿ ಗೊಂದಲದಲ್ಲಿ ಆಡಳಿತ ನಡೆಸಲು ಆಗುತ್ತದೆಯೇ ಇಲ್ಲವೇ ಎಂದಾಗಿದೆ. ಕಾಂಗ್ರೆಸ್ ಅಭಿವೃದ್ಧಿ ಮಾಡಲು ಆಗದಾಗ ಗೊಂದಲ ಸೃಷ್ಟಿ ಮಾಡಿ ಜನರ ಮನಸ್ಸನ್ನು ಬೇರೆಡೆಗೆ ತಿರುಗಿಸುತ್ತದೆ. ಅಭಿವೃದ್ಧಿ ಮರೆಮಾಚುವ ಕಾರಣದಿಂದ ಗೊಂದಲದತ್ತ ಜನರು ಮುಖ ಮಾಡುವಂತೆ ಮಾಡಿದೆ ಎಂದು ಆರೋಪಿಸಿದರು.
ಹರೀಶ್ ಪೂಂಜಾ, ಅಶ್ವತ್ಥನಾರಾಯಣ್ ಸೇರಿದಂತೆ ಬಿಜೆಪಿ ಕಾರ್ಯಕರ್ತರ ಮೇಲೆ ಪ್ರಕರಣ ದಾಖಲಿಸಿ ಸ್ವತಃ ಮುಖ್ಯಮಂತ್ರಿಯಿಂದಲೇ ದ್ವೇಷದ ರಾಜಕಾರಣ ಪಸರಿಸುತ್ತಿದೆ. ಇಂತಹ ಸ್ಥಿತಿ ವ್ಯವಸ್ಥೆಗೆ ಅಪಾಯಕಾರಿ. ಹಿಂದಿನ ಬಿಜೆಪಿ ಸರ್ಕಾರ ಮಂಜೂರು ಮಾಡಿದ ಕೆಲಸಕ್ಕೆ ತಡೆ ನೀಡಿದ್ದಾರೆ. ಇದರಿಂದ ಅಭಿವೃದ್ಧಿ ವಿರೋಧಿ ಎಂದು ಸಾಬೀತು ಮಾಡಿದ್ದಾರೆ. ಇದನ್ನು ತೆರವುಗೊಳಿಸಬೇಕು ಎಂದರು. ಇದೆಲ್ಲವೂ ಜನರ ಗಮನವನ್ನು ಬೇರೆಡೆಗೆ ತೆಗೆದುಕೊಂಡು ಹೋಗುವ ಕಾಂಗ್ರೆಸ್ನ ಕುತಂತ್ರ ಎಂದು ವಾಗ್ದಾಳಿ ನಡೆಸಿದರು.
ಚುನಾವಣೆ ಪೂರ್ವದಲ್ಲಿ ಕಾಂಗ್ರೆಸ್ ಏನು ಹೇಳಿದೆಯೋ ಅದನ್ನು ಮಾಡಲಿ ಎಂಬುದು ಬಿಜೆಪಿ ಆಗ್ರಹವಾಗಿದೆ. ಅಧಿಕಾರಕ್ಕೆ ಬಂದ ಮೇಲೆ ಏನು ಮಾಡಿದರೂ ನಡೆಯುತ್ತದೆ ಎಂಬ ಧೋರಣೆ ಖಂಡನೀಯ. ಇದು ಜನರಿಗೆ ಮಾಡುವ ಮೋಸ. ಕಾರಣ ಕಂಡಿಷನ್ ಹಾಕುವುದನ್ನು ಬಿಟ್ಟು, ಭರವಸೆ ನೀಡಿದಂತೆ ಎಲ್ಲರಿಗೂ ನೀಡಲಿ. ಇದೇ ರೀತಿ ಮುಂದುವರೆದಲ್ಲಿ ಮುಂದೆ ಕಾಂಗ್ರೆಸ್ ಪರಿಣಾಮ ಎದುರಿಸಲಿದೆ ಎಂದು ಕಾಗೇರಿ ಹೇಳಿದರು. ಗ್ಯಾರಂಟಿ ಗೊಂದಲದ ಗೂಡಾಗಿದೆ. ಚುನಾವಣೆ ಮೊದಲು ಹೇಳಿದಂತೆ ಜಾರಿಗೆ ತರಲಿ ಎಂದು ಆಗ್ರಹಿಸಿದರು. ಈ ವೇಳೆ ಪ್ರಮುಖರಾದ ನರಸಿಂಹ ಹೆಗಡೆ, ಉಷಾ ಹೆಗಡೆ, ರಾಜೇಶ ಶೆಟ್ಟಿ ಮತ್ತಿತರರು ಇದ್ದರು.
ಇದನ್ನೂ ಓದಿ : ಮನುವಾದಿ ಮನಸ್ಸಿನವರಿಂದ ಕಾಂಗ್ರೆಸ್ ನ ಶಕ್ತಿ ಯೋಜನೆ ವ್ಯಂಗ್ಯ : ಸಚಿವ ಎಚ್ ಸಿ ಮಹಾದೇವಪ್ಪ
