ಶಿರಸಿ : ಉತ್ತರ ಕನ್ನಡದ ಮುಂಡಗೋಡ ಪಟ್ಟಣದ ಹೊರ ವಲಯದಲ್ಲಿರುವ ಅಮ್ಮಾಜಿ ಕೆರೆಯಲ್ಲಿ ಹಾರುವ ಪಕ್ಷಿಯಂತೆ ರೆಕ್ಕೆ ಹಾಗೂ ಮುಳ್ಳು ಇರುವ ವಿಚಿತ್ರ ಆಕಾರದ ಮೀನು ಸಿಕ್ಕಿದ್ದು, ಜನರಲ್ಲಿ ಆಶ್ಚರ್ಯ ಮೂಡಿಸಿದೆ.
ವ್ಯಾಪಾರಸ್ಥರು ಸಾಮಾನ್ಯವಾಗಿ ಅಮ್ಮಾಜಿ ಕೆರೆಯಿಂದ ಕಟ್ಲಾ, ಕಾಂಡಿ, ಗೌರಿ ಸೇರಿದಂತೆ ಕೆರೆಯಲ್ಲಿ ಸಿಗುವ ವಿವಿಧ ಜಾತಿಯ ಮೀನು ತರುತ್ತಾರೆ. ಆದರೆ ಈ ಎಲ್ಲಾ ಮೀನುಗಳ ಮಧ್ಯೆ ಏಕೈಕ ವಿಶೇಷ ಆಕಾರವುಳ್ಳ ಮೀನು ಸಿಕ್ಕಿದೆ.
ನೋಡುಗರ ಕಣ್ಮನ ಸೆಳೆಯುವಂತಿದ್ದ ಈ ಮೀನು ಪಟ್ಟಣ ಮೀನು ಮಾರುಕಟ್ಟೆಯಲ್ಲಿ ಒಂದು ಪ್ರದರ್ಶನದ ವಸ್ತುವಾಗಿತ್ತಲ್ಲದೇ ದಿನವಿಡೀ ಈ ಮೀನಿನದ್ದೇ ಚರ್ಚೆಯಾಗಿತ್ತು. ಆದರೆ ಜೀವ ಉಳ್ಳ ಈ ಮೀನನ್ನು ಯಾರು ಕೂಡ ಖರೀದಿಸಲು ಮುಂದಾಗದೇ ಇದ್ದಾಗ ಕೊನೆಯಲ್ಲಿ ಅದೇ ಕೆರೆಗೆ ತೆಗೆದುಕೊಂಡು ಹೋಗಿ ಬಿಡಲಾಯಿತು.
