ತುಂಗಾ ಡ್ಯಾಂ ಬಳಿ ಸೆಲ್ಫಿ ತೆಗೆಯಲು ಹೋದ ಯುವಕ ನೀರಿಗೆ ಬಿದ್ದು ಸಾವು

ಶಿವಮೊಗ್ಗದ ವಿನಾಯಕ ನಗರದ ವಿನಾಯಕ ಎಂಬ ಯುವಕ ತುಂಗಾ ಡ್ಯಾಂ ಬಳಿ ಸೆಲ್ಫಿ ತೆಗೆಯಲು ಹೋಗಿದ್ದಾಗ ನದಿಗೆ ಬಿದ್ದು ಸಾವನ್ನಪ್ಪಿದ್ದಾನೆ. ಈ ಸಂಬಂಧ ತುಂಗಾನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಶಿವಮೊಗ್ಗ: ತುಂಗಾ ಡ್ಯಾಂ ಬಳಿ ಸೆಲ್ಫಿ ತೆಗೆಯಲು ಹೋಗಿದ್ದ ಯುವಕ ನದಿಗೆ ಬಿದ್ದು ಸಾವನ್ನಪ್ಪಿರುವ ಘಟನೆ ಗಾಜನೂರು ಬಳಿ ನಡೆದಿದೆ.

ಶಿವಮೊಗ್ಗದ ವಿನಾಯಕ ನಗರದ ವಿನಾಯಕ (22) ತನ್ನ ಕುಟುಂಬ ಹಾಗೂ ಸ್ನೇಹಿತರ ಜೊತೆ ಡ್ಯಾಂಗೆ ಹೋಗಿದ್ದ. ಡ್ಯಾಂನ ಮುಂಭಾಗ ಪವರ್ ಹೌಸ್​​ನಿಂದ ನೀರು ಹೋಗಲು ಇರುವ ಜಾಗದ ಬಳಿ ಸೆಲ್ಫಿ ಪಡೆಯಲು ಹೋಗಿದ್ದಾಗ ಈ ಅವಘಡ ಸಂಭವಿಸಿದೆ.

ಈ ವೇಳೆ ಮಣ್ಣು ಕುಸಿತವಾಗಿ ವಿನಾಯಕ ನೀರಿಗೆ ಬಿದ್ದಿದ್ದಾನೆ. ತಕ್ಷಣ ಕುಟುಂಬಸ್ಥರು ಹಾಗೂ ಸ್ನೇಹಿತರು ವಿನಾಯಕನನ್ನು ಬಚಾವ್ ಮಾಡಲು ಹೋಗಿದ್ರೂ ಪ್ರಯೋಜನವಾಗಿಲ್ಲ. ಅಗ್ನಿಶಾಮಕ ದಳದವರು ಆಗಮಿಸಿ ಸತತ ಮೂರು ಗಂಟೆ ಪ್ರಯತ್ನದ ನಂತರ ಶವ ಪತ್ತೆಯಾಗಿದೆ. ತುಂಗಾನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.