ರಾಮನಗರ: ಕೋವಿಡ್ ರೋಗಿಗಳಿಗೆ ಸರ್ಕಾರದಿಂದ 75,000 ರೂ. ಸಹಾಯಧನ ಕೊಡಿಸುವುದಾಗಿ ನಂಬಿಸಿ ಹತ್ತಾರು ಮಂದಿಯಿಂದ ಹಣ ಪಡೆದು ವಂಚಿಸಿರುವ ಪ್ರಕರಣ ಬೆಳಕಿಗೆ ಬಂದಿದೆ. ಮಾಗಡಿ ತಾಲ್ಲೂಕಿನ ಗೇರಹಳ್ಳಿ ಗ್ರಾಮ ಮೂಲದ, ಪ್ರಸ್ತುತ ರಾಮನಗರದ ವಾರ್ಡ್ ನಂ.27ರ ರಾಯರದೊಡ್ಡಿಯಲ್ಲಿ ವಾಸವಿರುವ ಪಿ.ಭರತ್ ವಿರುದ್ಧ ಗ್ರಾಮಾಂತರ ಠಾಣೆಯಲ್ಲಿ ವಂಚನೆ ಪ್ರಕರಣ ದಾಖಲಾಗಿದೆ.
ಕೋವಿಡ್ ಪಾಸಿಟಿವ್ ಬಂದು ಚಿಕಿತ್ಸೆ ಪಡೆದಿರುವ ರೋಗಿಗಳಿಗೆ ಸರ್ಕಾರ 75 ಸಾವಿರ ರೂ ಸಹಾಯಧನ ನೀಡುತ್ತಿದ್ದು, ಅದನ್ನು ಕೊಡಿಸುವುದಾಗಿ ನಂಬಿಸಿ ಸೋಂಕು ಪರೀಕ್ಷೆ, ಚಿಕಿತ್ಸೆಗೆ ಸಂಬಂಧಿಸಿದ ಆಸ್ಪತ್ರೆ ದಾಖಲೆಗಳನ್ನು ಪಡೆದು ಫೋನ್ ಪೇ ಮೂಲಕ 5 ಸಾವಿರ ರೂ ಪಡೆದಿದ್ದಾನೆ. ನಂತರ ಸಹಾಯಧನವೂ ಇಲ್ಲ, ಕೊಟ್ಟ ಕಾಸು ವಾಪಸ್ ಬಾರದ ಕಾರಣ ವಂಚನೆಯ ಅರಿವಾಗಿ ಕೂಟಗಲ್ ಗ್ರಾಮದ ಕೀರ್ತಿಗೌಡ ಎಂಬುವರು ದೂರು ದಾಖಲಿಸಿದ್ದರು. ಪ್ರಕರಣದ ತನಿಖೆ ವೇಳೆ ಹಲವು ಮಂದಿಗೆ ಇದೇ ರೀತಿ ವಂಚಿಸಿರುವುದು ಕಂಡುಬಂದಿದೆ.
ಜಿಲ್ಲಾಸ್ಪತ್ರೆಯಲ್ಲಿ ಲ್ಯಾಬ್ ಟೆಕ್ನೀಷಿಯನ್, ಸಿ.ಟಿ ಟೆಕ್ನೀಷಿಯನ್ ಹಾಗೂ ಬಿಬಿಎಂಪಿಯಲ್ಲಿ ಕೆಲಸ ಕೊಡಿಸುವುದಾಗಿ ಐವರಿಂದ ತಲಾ 50,000 ರೂ.ಗಳನ್ನು ಫೋನ್ ಪೇ ಹಾಗೂ ನಗದು ರೂಪದಲ್ಲಿ ಪಡೆದು ಮೋಸಗೊಳಿಸಿದ್ದಾನೆ. ಆರೋಗ್ಯ ಇಲಾಖೆ ಸಿಬ್ಬಂದಿಯೊಂದಿಗೆ ಒಡನಾಟ ಹೊಂದಿದ್ದ ಈತ ಕೋವಿಡ್ ಸಂದರ್ಭದಲ್ಲಿ ರೋಗಿಗಳ ಪರಿಚಯ ಮಾಡಿಕೊಂಡು ದುಷ್ಕೃತ್ಯ ಎಸಗಿದ್ದಾನೆ.
ಕೋವಿಡ್ ಸೋಂಕು ತಗುಲಿದ್ದ ಹತ್ತಾರು ಮಂದಿಯಿಂದ 8, 10, 15, 12 ಸಾವಿರ ರೂ.. ಹೀಗೆ ಮನಬಂದಂತೆ ಹಣ ಪಡೆದು ವಂಚನೆ ಮಾಡಿರುವ ಮಾಹಿತಿ ದೊರೆತಿದ್ದು, ಕಠಿಣ ಕಾನೂನು ಕ್ರಮ ಕೈಗೊಳ್ಳುವಂತೆ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಕೀರ್ತಿಗೌಡ ದೂರು ದಾಖಲಿಸಿದ್ದಾರೆ.
ಇದನ್ನೂ ಓದಿ: ಪೊಲೀಸ್ ಸಬ್‌ಇನ್ಸ್‌ಪೆಕ್ಟರ್‌ ಹೆಸರಲ್ಲೇ ನಕಲಿ ಇನ್‌ಸ್ಟಾಗ್ರಾಂ ಖಾತೆ, ಹಣಕ್ಕೆ ಬೇಡಿಕೆ
