ಮೈಸೂರು: ಕೊರೊನಾ ವೈರಸ್ ತಡೆಗಟ್ಟಲು ಒಂದು ತಿಂಗಳಿನಿಂದ ದೇಶಾದ್ಯಂತ ಲಾಕ್ಡೌನ್ ಘೋಷಣೆಯಾಗಿದೆ. ಇದರಿಂದ ಕೆಲ ಶಾಸಕರು ತಮ್ಮ ಕ್ಷೇತ್ರ ಬಿಟ್ಟು ಕದಲುತ್ತಿಲ್ಲ. ಆದರೆ, ಮೈಸೂರಿನ ಶಾಸಕರೊಬ್ಬರು ತಮ್ಮ ಕ್ಷೇತ್ರದತ್ತ ಎರಡು ತಿಂಗಳಿನಿಂದ ತಲೆ ಹಾಕಿಲ್ಲ.
ಹೌದು, ಫೆ.24 ರಂದು ಬೆಂಗಳೂರಿನಿಂದ ಮೈಸೂರಿಗೆ ಆಗಮಿಸಿದ ಎನ್.ಆರ್. ಕ್ಷೇತ್ರ ಶಾಸಕ ತನ್ವೀರ್ ಸೇಠ್, ತಮ್ಮ ಕ್ಷೇತ್ರ ಅಭಿವೃದ್ಧಿ ಬಗ್ಗೆ ಅಧಿಕಾರಿಗಳೊಂದಿಗೆ ಅಂದು ಸಭೆ ನಡೆಸಿ ವಾಪಸ್ ಬೆಂಗಳೂರಿಗೆ ತೆರಳಿದವರು ಇತ್ತ ಸುಳಿದಿಲ್ಲ. ಆಹಾರ ಕಿಟ್, ಸರ್ಕಾರದಿಂದ ಸಿಗುವ ಪಡಿತರಕ್ಕಾಗಿ ಇಲ್ಲಿನ ಜನರ ಬವಣೆ ತಪ್ಪುತ್ತಿಲ್ಲ. ಈ ಕ್ಷೇತ್ರದಲ್ಲಿ ಶೇ. 40ರಷ್ಟು ಸ್ಲಂ ನಿವಾಸಿಗಳೇ ವಾಸವಾಗಿದ್ದು, ಮೊದಲೇ ಬಡತನ ಹೊದ್ದು ಮಲಗಿರುವ ಹೊತ್ತಲ್ಲೇ ಕೊರೊನಾ ಭಯದೊಂದಿಗೆ ಹಸಿವಿನ ಚಿಂತೆ ಹೆಚ್ಚಾಗುವಂತೆ ಮಾಡಿದೆ.
ಮೈಸೂರಿನ 11 ಕ್ಷೇತ್ರಗಳಲ್ಲಿ 10 ಕ್ಷೇತ್ರಗಳಲ್ಲಿ ಶಾಸಕರು ಫುಲ್ ಆಕ್ಟಿವ್ ಆಗಿ ಕೆಲಸ ಮಾಡುತ್ತಿದ್ದು, ಜನರ ಕಷ್ಟಕ್ಕೆ ಸ್ಪಂದಿಸಿ, ಅಧಿಕಾರಿಗಳ ಸಲಹೆಗಳನ್ನು ಪಡೆದು ಕ್ಷೇತ್ರಗಳತ್ತ ಜನಪ್ರತಿನಿಧಿಗಳ ನಿಗಾ ಇಟ್ಟಿದ್ದಾರೆ.
2019ರ ನವೆಂಬರ್ 17ರ ಭಾನುವಾರ ರಾತ್ರಿ ಶಾಸಕ ತನ್ವೀರ್ ಸೇಠ್ ಮೇಲೆ ಹಲ್ಲೆಯಾಗಿತ್ತು. ಆಸ್ಪತ್ತೆಯಲ್ಲಿ ಚೇತರಿಸಿಕೊಂಡಿರುವ ತನ್ವೀರ್ ಸೇಠ್ ಅವರು ಲಾಕ್ಡೌನ್ ಸಂದರ್ಭದಲ್ಲೂ ತಮ್ಮ ಕ್ಷೇತ್ರದ ಜನರ ಕಷ್ಟಗಳನ್ನು ಕೇಳಲು ಬಾರದೇ ಇರುವುದು, ಅಲ್ಲದೇ ಕೆಪಿಸಿಸಿ ಟಾಸ್ಕ್ ಫೋಸ್೯ ತಂಡದಲ್ಲಿ ಮೈಸೂರು ನಗರ ಜವಾಬ್ದಾರಿವಹಿಸಲಾಗಿದೆ. ಆದರೂ ಅವರು ತಮ್ಮ ಕ್ಷೇತ್ರದ ಕಡೆ ಗಮನ ಹರಿಸದೇ ಇರುವುದು ಸಾರ್ವಜನಿಕರಲ್ಲಿ ಬೇಸರ ತಂದಿದೆ.
