ಮೈಸೂರು: ವೈದ್ಯನನ್ನು ಅಪಹರಿಸಿ, ದಾಖಲೆ ಪತ್ರಗಳು ಹಾಗೂ ನಗದು ದೋಚಿ ಪರಾರಿಯಾಗಿದ್ದ ಆರೋಪಿಯನ್ನು 10 ವರ್ಷಗಳ ನಂತರ ಕುವೆಂಪುನಗರ ಪೊಲೀಸರು ಗುರುವಾರ ಬಂಧಿಸಿದ್ದಾರೆ. ಕುವೆಂಪುನಗರದ ನಿವಾಸಿಯಾಗಿದ್ದ ವೈದ್ಯ ಡಾ.ಎಂ.ಕೆ.ಮಹೇಶ್ ಅಪಹರಣಕ್ಕೊಳಗಾಗಿದ್ದರು. ಇದೀಗ ಪ್ರಕರಣದ ಆರೋಪಿ ಫಣಿರಾಜ್ ಗೌಡ ಎಂಬಾತನನ್ನು ಬಂಧಿಸಲಾಗಿದೆ.
ಘಟನೆಯ ಸಂಪೂರ್ಣ ವಿವರ: ದಟ್ಟಗಳ್ಳಿಯ ನಿವಾಸಿ ಫಣಿರಾಜ್ ಗೌಡ 2014 ಆಗಸ್ಟ್ 8ರಂದು ರಾತ್ರಿ ಡಾ.ಎಂ.ಕೆ.ಮಹೇಶ್ ಅವರನ್ನು ಅವರ ಮನೆಯಿಂದಲೇ ಅಪಹರಿಸಿ ತನ್ನ ಸ್ನೇಹಿತ ರಾಮಚಂದ್ರ ಹೆಗ್ಡೆ ಮನೆಯಲ್ಲಿ ಕೂಡಿಹಾಕಿದ್ದ. ಅಲ್ಲಿ ಮಹೇಶ್ ಅವರಿಂದ ಕೆಲವು ದಾಖಲೆಗಳಿಗೆ ಫಣಿರಾಜ್ ಬಲವಂತವಾಗಿ ಸಹಿ ಹಾಕಿಸಿದ್ದಲ್ಲದೇ, ರಾಮಚಂದ್ರ ಹೆಗ್ಡೆಯ ಖಾತೆಗೆ 20 ಸಾವಿರ ಹಣ ಹಾಕಿಸಿಕೊಂಡಿದ್ದಾನೆ. ಮಹೇಶ್ ಮೊಬೈಲ್ನಿಂದ ಅವರ ಸಂಬಂಧಿಕರಿಗೆ ಕರೆ ಮಾಡಿಸಿ 2 ಲಕ್ಷ ರೂ ಹಣವನ್ನೂ ಖಾತೆಗೆ ಹಾಕಿಸಿಕೊಂಡಿದ್ದ. ಬಳಿಕ ಕಾರಿನಲ್ಲಿ ಮೈಸೂರಿನಿಂದ ಉತ್ತರ ಕನ್ನಡ ಜಿಲ್ಲೆಯ ಅಂಕೋಲಾಗೆ ಕರೆದುಕೊಂಡು ಹೋಗಿ ಅಲ್ಲಿಂದ ಮಹೇಶ್ ಮೊಬೈಲ್ನಿಂದಲೇ ಅವರ ತಂದೆಗೆ ಕರೆ ಮಾಡಿಸಿ ಮತ್ತೆ 3 ಲಕ್ಷ ಹಣವನ್ನು ತನ್ನ ಖಾತೆಗೆ ಹಾಕಿಸಿಕೊಂಡಿದ್ದ. ಈ ಕುರಿತು ಪೊಲೀಸರಿಗೆ ಮಾಹಿತಿ ನೀಡಿದರೆ ಕೊಲೆ ಮಾಡುವುದಾಗಿ ಬೆದರಿಕೆ ಹಾಕಿ ಮಹೇಶ್ ಅವರನ್ನು ಬಿಡುಗಡೆ ಮಾಡಿದ್ದ.
ನಂತರ ಮೈಸೂರಿಗೆ ಬಂದ ಡಾ.ಮಹೇಶ್ ಕುವೆಂಪು ನಗರ ಠಾಣೆಯಲ್ಲಿ ಫಣಿರಾಜೇ ಗೌಡನ ಮೇಲೆ ದೂರು ದಾಖಲಿಸಿದ್ದರು. ಪೊಲೀಸರು ಭಾರತೀಯ ದಂಡ ಸಂಹಿತೆ 426, 468, 469, 471, 120, 34 ರಡಿ ಪ್ರಕರಣ ದಾಖಲಿಸಿಕೊಂಡಿದ್ದರು. ಇದೀಗ ಕುವೆಂಪು ನಗರ ಇನ್ಸ್ಪೆಕ್ಟರ್ ಅರುಣ್ ನೇತೃತ್ವದಲ್ಲಿ ವಿಶೇಷ ತಂಡ ರಚಿಸಿ, ಆರೋಪಿ ಫಣಿರಾಜ್ ಗೌಡನನ್ನು ಬಂಧಿಸಲಾಗಿದೆ. ಆರೋಪಿ ನ್ಯಾಯಾಂಗ ಬಂಧನದಲ್ಲಿದ್ದಾನೆ.
ಹಲವು ಠಾಣೆಗಳಲ್ಲಿ ವಂಚನೆ ಪ್ರಕರಣ: ಫಣಿರಾಜ್ ಗೌಡನನ್ನು ಬಂಧಿಸಿ, ತನಿಖೆ ಕೈಗೊಂಡ ವೇಳೆ ರಾಜ್ಯದ ಹಲವು ಪೊಲೀಸ್ ಠಾಣೆಗಳಲ್ಲಿ ಆತನ ವಿರುದ್ಧ ವಂಚನೆ ಪ್ರಕರಣಗಳು ದಾಖಲಾಗಿರುವುದು ತಿಳಿದು ಬಂದಿದೆ. ಚಾಮರಾಜನಗರ ಪಟ್ಟಣದಲ್ಲಿ ನಿಷ್ಕಾ ವಿವಿಧೋದ್ದೇಶ ಸೌಹಾರ್ದ ಸಂಘ ಎಂಬ ಹೆಸರಿನಲ್ಲಿ ಸಂಘವನ್ನು ಸ್ಥಾಪನೆ ಮಾಡಿಕೊಂಡಿದ್ದ ಈತ, ಅಲ್ಲಿನ ಆನೇಕ ಜನರಿಂದ ಹಣ ಪಡೆದು ವಂಚಿಸಿದ್ದ. ಈ ಸಂಬಂಧ ಅಲ್ಲಿನ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಮೈಸೂರಿನ ಆಲನಹಳ್ಳಿ, ಕೃಷ್ಣ ರಾಜ, ಸರಸ್ವತಿ ಪುರಂ, ಮಂಡ್ಯ ಜಿಲ್ಲೆಯ ಪಾಂಡವಪುರ, ತುಮಕೂರು ಟೌನ್, ಬೆಂಗಳೂರಿನ ಚನ್ನಮ್ಮ ಕೆರೆ ಪೊಲೀಸ್ ಠಾಣೆಗಳಲ್ಲಿ ಪ್ರಕರಣಗಳು ದಾಖಲಾಗಿವೆ.
ಹೆಚ್ಚಿನ ಬಡ್ಡಿ ಆಮಿಷವೊಡ್ಡಿ ಜನರಿಂದ ಹಣ ಪಡೆದು ವಂಚಿಸುತ್ತಿದ್ದ. ಕೆಲವು ಪ್ರಕರಣಗಳಲ್ಲಿ ಜಾಮೀನು ಪಡೆದು ನ್ಯಾಯಾಲಯಕ್ಕೆ ಹಾಜರಾಗದೇ ಇರುವ ವಾರೆಂಟ್ಗಳು ಈತನ ಮೇಲಿವೆ. ಇದೇ ಕಾರಣಕ್ಕಾಗಿ ಫಣಿರಾಜ್ ಗೌಡ ಒಂದೆ ಸ್ಥಳದಲ್ಲಿ ಇರದೇ, ಹಲವು ಕಡೆ ಸಂಚರಿಸುತ್ತಿದ್ದ, ಜಾಗ ಬದಲಾವಣೆ ಮಾಡುತ್ತಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.
ಇದನ್ನೂ ಓದಿ: ಪತ್ನಿ ಜೊತೆಗಿನ ಖಾಸಗಿ ಕ್ಷಣಗಳ ವಿಡಿಯೋ ಮಾಡಿ ಬ್ಲ್ಯಾಕ್ಮೇಲ್: ಬೆಳಗಾವಿಯಲ್ಲಿ ಪತಿ ಬಂಧನ
