ಕಾಂಗ್ರೆಸ್‌ನ ಗ್ಯಾರಂಟಿ ಕಾರ್ಡ್ ಹುಚ್ಚು ಹೊಳೆಯಲ್ಲಿ ಎಲ್ಲವೂ ಕೊಚ್ಚಿಹೋದವು: ಜಿ.ಟಿ.ದೇವೇಗೌಡ

ಜೆಡಿಎಸ್​ ಶಾಸಕ ಜಿ.ಟಿ.ದೇವೇಗೌಡ ಅವರಿಂದು ಚಾಮುಂಡೇಶ್ವರಿ ಕ್ಷೇತ್ರದಲ್ಲಿ ಧನ್ಯತಾ ಸಮಾಗಮಾ ಕಾರ್ಯಕ್ರಮವನ್ನು ಏರ್ಪಡಿಸಿದ್ದರು.

ಮೈಸೂರು: ಕಾಂಗ್ರೆಸ್‌ನ ಗ್ಯಾರಂಟಿ ಕಾರ್ಡ್ ಹುಚ್ಚು ಹೊಳೆಯಲ್ಲಿ ಎಲ್ಲವೂ ಕೊಚ್ಚಿಹೋದವು. ಇದು ಮೈಸೂರು ಜಿಲ್ಲೆಯಲ್ಲಿಯೂ ಸಹ ಆಗಿದೆ. ಜೆಡಿಎಸ್​ನ ಕಾರ್ಯಕರ್ತರು ಪಕ್ಷದ ಕೈ ಬಿಟ್ಟಿಲ್ಲ. ಆದರೆ, ನಮಗೆ ನಿರೀಕ್ಷಿತ ಮತ ಸಿಕ್ಕಿಲ್ಲ ಎಂದು ಜೆಡಿಎಸ್​​ ಶಾಸಕ ಜಿ.ಟಿ.ದೇವೇಗೌಡ ಹೇಳಿದರು.

ಚುನಾವಣೆಯಲ್ಲಿ ಗೆಲುವು ಸಾಧಿಸಿದ ಪ್ರಯುಕ್ತ ಮಂಗಳವಾರ ನಗರದಲ್ಲಿ ಏರ್ಪಡಿಸಿದ್ದ ಕ್ಷೇತ್ರದ ಧನ್ಯತಾ ಸಮಾಗಮಾ ಕಾರ್ಯಕ್ರಮವನ್ನು ಉದ್ಘಾಟಿಸಿದ ಮಾತನಾಡಿದ ಅವರು, ಕೆಲವರೂ ನನ್ನ ವಿರುದ್ದ ಏಕ ವಚನದಲ್ಲೇ ಮಾತನಾಡುತ್ತಾರೆ. ಚಾಮುಂಡೇಶ್ವರಿಯಲ್ಲಿ ಅಪ್ಪ ಮಗನನ್ನ ಸೋಲಿಸುವುದೇ ನನ್ನ ಗುರಿ ಎಂದು ಹೇಳಿದ್ದರು. ಈಗ ಕ್ಷೇತ್ರದ ಜನರೇ ಅವರಿಗೆ ತಕ್ಕ ಉತ್ತರ ನೀಡಿದ್ದಾರೆ ಎಂದು ಹೇಳಿದರು.

ಈ ಹಿಂದೆ ಸಿದ್ದರಾಮಯ್ಯ ಅವರು ಜೆಡಿಎಸ್​​ನಿಂದ ಸ್ಪರ್ಧೆ ಮಾಡಿದಾಗ ಅವರು ಜೇಬಿನಿಂದ ಒಂದು ರೂಪಾಯಿ ಹಾಕಿರಲಿಲ್ಲ. ನಾವುಗಳೇ ಕ್ಷೇತ್ರವನ್ನ ಹಂಚಿಕೊಂಡು ಪ್ರಚಾರ ಮಾಡಿ ಗೆಲ್ಲಿಸಿದ್ದೆವು. 2013ರಲ್ಲಿ ವರುಣಾದಿಂದ ನಿಂತು ಗೆದ್ದರು. ಆದರೆ, 2018ರಲ್ಲಿ ಅವರು ಯಾರದ್ದೋ ಮಾತು ಕೇಳಿ ಚಾಮುಂಡೇಶ್ವರಿಗೆ ಬಂದರು. ಆದರೆ, ಅಂದು ಅವರು ಚಾಮುಂಡೇಶ್ವರಿಗೆ ಬರದೇ ವರುಣಾದಲ್ಲೇ ನಿಂತಿದ್ದರೇ ಅವರೇ ಸಿಎಂ ಆಗುತ್ತಿದ್ದರು ಎಂದು ಹೇಳಿದರು.

ಚಾಮುಂಡೇಶ್ವರಿ ಕ್ಷೇತ್ರದಲ್ಲಿ ನನ್ನನ್ನು ಸೋಲಿಸಲು, ಬಿಜೆಪಿಯವರು ಕುತಂತ್ರ ಮಾಡಿದರು. ಬಿಜೆಪಿ ಜೊತೆ ಜೆಡಿಎಸ್ ಸೇರಲಿಲ್ಲ ಎಂದು ದ್ವೇಷದ ರಾಜಕೀಯಕ್ಕೆ ಮುಂದಾದರು, ಇದೆಲ್ಲ ಸಾಲದು ಎಂದು ಪ್ರಧಾನಿ, ಗೃಹ ಮಂತ್ರಿ, ನಾನಾ ನಾಯಕರು ಬಂದು ಹೋದರು. ಆದರೆ, ಇವರು ಗೆದ್ದಿದ್ದು ಮಾತ್ರ ಒಂದು ಕ್ಷೇತ್ರ. ಹಿಜಾಬ್, ಹಲಾಲ್ ಕಟ್ ಅದು ಇದು ಅಂತ ಎಷ್ಟು ಗೊಂದಲ ಸೃಷ್ಟಿ ಮಾಡಿದ್ರಿ?. ಈ ಗೊಂದಲಗಳಿಂದ ಅಭಿವೃದ್ಧಿ ಸಾಧ್ಯವಾ? ಮೊದಲು ಜನರ ಸೇವೆ ಮಾಡಿ ಎಂದು ಬಿಜೆಪಿ ವಿರುದ್ಧ ಕುಟುಕಿದರು.

ನಂತರ ಹುಣಸೂರು ಶಾಸಕ ಜಿ.ಡಿ.ಹರೀಶ್‌ಗೌಡ ಮಾತನಾಡಿ, ಈ ಚುನಾವಣೆಯಲ್ಲಿ ಚಾಮುಂಡೇಶ್ವರಿಯಲ್ಲಿ ಕಾಂಗ್ರೆಸ್ ಪರವಾದ ಅಲೆ ಇತ್ತು. ಆದರೆ, ಜನರು ಜಿ.ಟಿ.ದೇವೇಗೌಡರ ಕೈ ಹಿಡಿದರು. ಚಾಮುಂಡೇಶ್ವರಿ ಕ್ಷೇತ್ರದಲ್ಲಿ ಜೆಡಿಎಸ್ ಕಾರ್ಯಕರ್ತರು ಎಂದು ಕೈ ಬಿಟ್ಟಿಲ್ಲ. ಈ ಬಾರಿ ಚುನಾವಣೆ ಸಾಕಷ್ಟು ವಿಶೇಷವಾಗಿತ್ತು. ಅಕ್ಕಪಕ್ಕದ ಕ್ಷೇತ್ರಗಳನ್ನು ಗಮನಿಸಿದರೆ ಚಾಮುಂಡೇಶ್ವರಿ ಸಾಕಷ್ಟು ಅಭಿವೃದ್ಧಿಯಾಗಿದೆ ಎಂದರು

ಇದುವರೆಗೂ ಯಾವುದೇ ಶಾಸಕ ಮಾಡದ ಅಭಿವೃದ್ಧಿಯನ್ನ ಜಿಟಿಡಿಯವರು ಮಾಡಿದ್ದಾರೆ. ಕ್ಷೇತ್ರದಲ್ಲಿ ಶಾಶ್ವತವಾದ ಅಭಿವೃದ್ಧಿ ಯೋಜನೆಗಳನ್ನು ಜಿಟಿ ದೇವೇಗೌಡ ಅವರು ಮಾಡಿದ್ದಾರೆ. ನಾನು ಹುಣಸೂರು ಕ್ಷೇತ್ರದ ಶಾಸಕನಾಗಿರಬಹುದು. ಆದರೆ, ಚಾಮುಂಡೇಶ್ವರಿ ಹಾಗೂ ಹುಣಸೂರು ನಮ್ಮ ಕುಟುಂಬದ ಎರಡು ಕಣ್ಣುಗಳು ಇದ್ದ ಹಾಗೆ. ಯಾರೇ ಬಂದರೂ ಅವರಿಗೆ ನಾವು ಸ್ಪಂದನೆ ಮಾಡುತ್ತೇವೆ ಎಂದು ಹೇಳಿದರು.

ಕಾರ್ಯಕ್ರಮಕ್ಕೂ ಮುನ್ನ ಜಿ.ಟಿ.ದೇವೇಗೌಡ ಮಾಧ್ಯಮಗಳೊಂದಿಗೆ ಮಾತನಾಡಿ, ಈ ಬಾರಿಯೂ ಕ್ಷೇತ್ರದ ಜನ ನನ್ನ ಕೈ ಬಿಟ್ಟಿಲ್ಲ. ನನ್ನ ಗೆಲುವಿಗೆ ಸಾಕಷ್ಟು ಶ್ರಮಿಸಿದ್ದಾರೆ. ಈ ಬಾರಿ ನಾವು ನಿರೀಕ್ಷಿತ ಗೆಲುವು ಸಾಧಿಸಲು ಸಾಧ್ಯವಾಗಿಲ್ಲ. ಕುಮಾರಸ್ವಾಮಿ ಅವರು ಎಲ್ಲಾ ಕ್ಷೇತ್ರದಗಳಿಗೂ ಸಂಚರಿಸಿ ಪ್ರಚಾರ ಮಾಡಿದ್ದರು. ಆದರೂ, ಮತದಾರರು ನಮ್ಮ ಕೈ ಹಿಡಿಯಲಿಲ್ಲ ಎಂದು ಹೇಳಿದರು.

ಇದನ್ನೂ ಓದಿ: ಮಾಜಿ ಸಚಿವ ಅಶ್ವಥ್ ನಾರಾಯಣ ವಿರುದ್ಧದ ತನಿಖೆಗೆ ಹೈಕೋರ್ಟ್​ ತಡೆ