ಮೈಸೂರು: ಉಪ ಚುನಾವಣೆಗೆ 15 ಕೋಟಿ ಹಣ ಕೊಟ್ಟಿದ್ದು ನಿಮಗೆ ಹೇಗೆ ಗೊತ್ತು, ನಿಮ್ಮ ಬಳಿ ಲೆಕ್ಕ ಇದೆಯೇ. ನಿಮ್ಮ ಚುನಾವಣೆಗೆ ಪಾರ್ಟಿ ಹಣ ಕೊಟ್ಟಿಲ್ಲವೇ ನೀವು ಗಲ್ಲಿ ರೌಡಿ ರೀತಿ ಮಾತನಾಡಬೇಡಿ ಎಂದು ವಿಧಾನ ಪರಿಷತ್ ಸದಸ್ಯ ಹೆಚ್ ವಿಶ್ವನಾಥ್ ಶ್ರೀನಿವಾಸ್ ಪ್ರಸಾದ್ ಹೇಳಿಕೆಗೆ ಗರಂ ಆಗಿಯೇ ಹೇಳಿಕೆ ನೀಡಿದ್ದಾರೆ
ಇಂದು ಮಾಧ್ಯಮಗಳ ಜೊತೆ ಮಾತನಾಡಿದ ವಿಧಾನ ಪರಿಷತ್ ಸದಸ್ಯ ಹೆಚ್ ವಿಶ್ವನಾಥ್ ಶ್ರೀನಿವಾಸ್ ಪ್ರಸಾದ್ ಹೇಳಿಕೆಗೆ ತಿರುಗೇಟು ನೀಡಿ ನನ್ನನ್ನು ಬೊಗಳೋ ನಾಯಿ, ಕಚ್ಚೋ ನಾಯಿ ಎಂಬ ಹೇಳಿಕೆಗಳು ನಿಮ್ಮ ಹಿರಿತನಕ್ಕೆ ಸರಿ ಅಲ್ಲ. ನಾನು ಜೆಡಿಎಸ್ ಬಿಟ್ಟು ಕಾಂಗ್ರೆಸ್ ಸೇರುತ್ತೇನೆ ಎಂದಾಗ ನೀವೇ ಬೇಡ ಯಡಿಯೂರಪ್ಪ ಅವರನ್ನ ಸಿಎಂ ಮಾಡೋಣ ಬಿಜೆಪಿ ಸೇರು ಎಂದು ಹೇಳಿದ್ದೀರಿ, ಇದನ್ನ ತಾವು ನೆನಪಿಸಿಕೊಳ್ಳಬೇಕು.
ನಾನು ಉಪ ಚುನಾವಣೆಯಲ್ಲಿ 15 ಕೋಟಿ ಹಣ ಪಡೆದಿದ್ದೆ ಎಂಬ ಹೇಳಿಕೆ ಸರಿ ಅಲ್ಲ, ನನಗೆ 15 ಕೋಟಿ ಹಣ ಕೊಟ್ಟಿದ್ದು ನಿಮಗೆ ಹೇಗೆ ಗೊತ್ತು ಹತ್ತಿರ ದಾಖಲೆಗಳು ಇವೆಯೇ ಎಂದು ಪ್ರಶ್ನಿಸಿದ್ದಾರೆ.
ಪ್ರತಾಪ್ ಸಿಂಹ ಯಾರು?: ನನ್ನನ್ನು ಪಕ್ಷ ಬಿಡು ಎಂದು ಹೇಳಲು ಪ್ರತಾಪ್ ಸಿಂಹ ಯಾರು ಅವನು ಬಿಜೆಪಿ ರಾಜ್ಯಾಧ್ಯಕ್ಷನೇ, ನನ್ನನ್ನು ಕೇಳಲು ಸಿಂಹ ಯಾರು. ಯಾರೋ ಮಾಡಿದ ಕೆಲಸವನ್ನ ನನ್ನದು ನನ್ನದು ಎಂದು ಹೇಳಿಕೊಂಡು ತಿರುಗಾಡುವವನು ಇವನು, ಇವನೇನು ಮಾಡಿದ್ದಾನೆ ಎಂಬುದನ್ನ ಮುಂದಿನ ದಿನಗಳಲ್ಲಿ ದಾಖಲೆ ಸಮೇತ ಮಾತನಾಡುತ್ತೇನೆ ಎಂದು ಪ್ರತಾಪ್ ಸಿಂಹನಿಗೆ ತಿರುಗೇಟು ನೀಡಿದರು.
ಕಾಂಗ್ರೆಸ್ ಪಕ್ಷವನ್ನು ಬ್ಯಾನ್ ಮಾಡಬೇಕು ಎಂಬ ಈಶ್ವರಪ್ಪ ಹೇಳಿಕೆಗೆ ತಿರುಗೇಟು ನೀಡಿದ ವಿಶ್ವನಾಥ್ ಈಶ್ವರಪ್ಪನಿಗೆ ಏನಾದರೂ ಮರ್ಯಾದೆ ಇದೆಯೇ? ಅವರಿಗೆ ಕೊಟ್ಟ ಇಲಾಖೆಯನ್ನ ಸರಿಯಾಗಿ ನಡೆಸಲು ಬರುವುದಿಲ್ಲ ಅವನು ಏನು ಹೇಳುತ್ತಾನೆ ಎಂದು ಕಿಡಿಕಾರಿದರು.
ನಿಜವಾಗಿಯೂ ಇಂದಿರಾ ಗಾಂಧಿ ದೇಶ ಭಕ್ತರು ಎಂದ ವಿಶ್ವನಾಥ್ ಅವರು ಕಾಂಗ್ರೆಸ್ಗೆ ಹೋಗುತ್ತೇನೆ ಎಂಬ ಪ್ರಶ್ನೆಗೆ ಹೋಗುವ ಸಂದರ್ಭ ಬಂದರೆ ಹೋಗುತ್ತೇನೆ ಎಂದು ಹೇಳಿದರು.
ಡಿಕೆಶಿ ಹೇಳಿದ್ದರಲ್ಲಿ ಏನಿದೆ: ಡಿ.ಕೆ ಶಿವಕುಮಾರ್ ಹೇಳಿದ್ದರಲ್ಲಿ ತಪ್ಪೇನಿದೆ ಮತದಾರರ ಪಟ್ಟಿಯಲ್ಲಿ ಹೆಸರುಗಳೇ ನಾಪತ್ತೆಯಾಗಿದ್ದು, ಈ ಸಂದರ್ಭದಲ್ಲಿ ಈ ವಿಷಯವನ್ನು ಡೈವರ್ಟ್ ಮಾಡಲು ಈ ವಿಚಾರವನ್ನ ತಂದಿದ್ದಾರೆ. ಸಿಎಂ ಸೇರಿದಂತೆ ಎಲ್ಲರು ಸುಳ್ಳನ್ನೇ ಹೇಳುತ್ತಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಯಾವತ್ತೂ ಅಲ್ಪಸಂಖ್ಯಾತರ, ಮುಸ್ಲಿಮರ ಧರ್ಮದ ಬಗ್ಗೆ ಮಾತನಾಡುವುದಿಲ್ಲ.
ಆದರೆ, ಕರ್ನಾಟಕದಲ್ಲಿ ನಡೆಯುತ್ತಿರುವುದು ಏನು. ಕರ್ನಾಟಕದ ಬಿಜೆಪಿಯವರು ಪ್ರಧಾನಿ ನರೇಂದ್ರ ಮೋದಿಯವರ ದ್ವೇಷಿಗಳು ಎಂದು ವಿಧಾನ ಪರಿಷತ್ ಸದಸ್ಯ ಎಚ್. ವಿಶ್ವನಾಥ್ ಕಿಡಿಕಾರಿದರು.
ಇದನ್ನೂ ಓದಿ: ಪ್ರಿಯಾಂಕ್ ಈ ಮೊದಲು ಬಿಡುಗಡೆ ಮಾಡಿದ್ದ ಆಡಿಯೋಗೆ ಸ್ಪಷ್ಟನೆ ಕೊಟ್ಟಿಲ್ಲ: ಸಿಎಂ ಬೊಮ್ಮಾಯಿ
