ಮಂಡ್ಯ: ಜಿಲ್ಲೆಯಲ್ಲೂ ರೆಮ್ಡಿಸಿವಿರ್ ಚುಚ್ಚುಮದ್ದು ಕಾಳ ಸಂತೆಯಲ್ಲಿ ಮಾರಾಟವಾಗುತ್ತಿರುವ ಪ್ರಕರಣ ತಡವಾಗಿ ಬೆಳಕಿಗೆ ಬಂದಿದೆ.
ಜಿಲ್ಲೆಯ ನಾಗಮಂಗಲ ಪಟ್ಟಣದ ಸಾರ್ವಜನಿಕ ಆಸ್ಪತ್ರೆಯೇ ಅಕ್ರಮ ದಂಧೆಯ ಹಾಟ್ ಸ್ಪಾಟ್ ಆಗಿದೆ ಎನ್ನುವ ಆರೋಪಗಳು ಕೇಳಿ ಬಂದಿವೆ. ರೋಗಿಗಳಿಗೆ ಹಾಕುವ ರೆಮ್ಡಿಸಿವಿರ್ ಇಂಜೆಕ್ಷನ್ ಕಾಳಸಂತೆಯಲ್ಲಿ ಮಾರಾಟವಾಗುತ್ತಿದ್ದು, ಸೋಂಕಿತನ ಕುಟುಂಬ ಸದಸ್ಯನಿಂದ ವೈದ್ಯರ ರೆಮ್ಡಿಸಿವಿರ್ ಇಂಜೆಕ್ಷನ್ ದಂಧೆ ಬಯಲಾಗಿದೆ ಎನ್ನಲಾಗ್ತಿದೆ.
ಸೋಂಕಿತನಿಗೆ 3 ದಿನಗಳಿಂದ ಇಂಜೆಕ್ಷನ್ ಹಾಕಿರುವುದಾಗಿ ರಿಜಿಸ್ಟರ್ನಲ್ಲಿ ಆಸ್ಪತ್ರೆ ಸಿಬ್ಬಂದಿ ಎಂಟ್ರಿ ಮಾಡಿದ್ದಾರೆ. ಆದ್ರೆ 3 ದಿನಗಳಿಂದ ಯಾವುದೇ ಇಂಜೆಕ್ಷನ್ ಕೊಟ್ಟಿಲ್ಲವೆಂದು ಸಾರ್ವಜನಿಕ ಆಸ್ಪತ್ರೆ ವೈದ್ಯ ಡಾ. ತ್ಯಾಗರಾಜ್ ವಿರುದ್ಧ ಸೋಂಕಿತರ ಸಂಬಂಧಿವೋರ್ವ ಗಂಭೀರ ಆರೋಪ ಮಾಡಿದ್ದಾರೆ.
ಇದನ್ನು ಸೋಂಕಿತ ವ್ಯಕ್ತಿಯ ಸಂಬಂಧಿಕ ಪ್ರಶ್ನಿಸಿದಕ್ಕೆ ವೈದ್ಯ ಆಕ್ರೋಶಗೊಂಡಿದ್ದಾನೆ. ಈ ವಿಚಾರವಾಗಿ ಆಸ್ಪತ್ರೆಯಲ್ಲಿ ಸೋಂಕಿತನ ಸಂಬಂಧಿಕ ರಂಪಾಟ ಮಾಡಿದ್ದಾನೆ. ಈ ವೇಳೆ ಆತನಿಗೆ ಇಂಜೆಕ್ಷನ್ ಕೊಟ್ಟಿದ್ದೇನೆಂದು ಹೇಳಿದ್ದ ವೈದ್ಯ ತಪ್ಪಿಸಿಕೊಳ್ಳಲು ಮುಂದಾಗಿದ್ದಾನೆ. ಸೋಂಕಿತ ವ್ಯಕ್ತಿ ವೈದ್ಯರ ಮುಂದೆಯೇ ಇಂಜೆಕ್ಷನ್ ಕೊಟ್ಟಿಲ್ಲವೆಂದು ಹೇಳಿದ್ದು, ಪರಿಸ್ಥಿತಿ ವಿಕೋಪಕ್ಕೆ ಹೋಗುತ್ತಿದ್ದಂತೆ ಪೊಲೀಸರು ಆಗಮಿಸಿದ್ದಾರೆ.
ಪೊಲೀಸರು ಬಂದ ನಂತರ ಸೋಂಕಿತನಿಗೆ ವೈದ್ಯ ರೆಮ್ಡಿಸಿವಿರ್ ಇಂಜೆಕ್ಷನ್ ಕೊಟ್ಟಿದ್ದಾನೆ. ಆದ್ರೆ ವೈದ್ಯ ಇಂಜೆಕ್ಷನ್ ಕೊಟ್ಟಿದ್ದು ನಿಜವಾದರೆ, ಮತ್ತೊಮ್ಮೆ ಪೊಲೀಸ್ ಸಮ್ಮುಖದಲ್ಲಿ ಇಂಜೆಕ್ಷನ್ ಕೊಟ್ಟಿದ್ದು ಯಾಕೆ? ಎಂದು ಸಂಬಂಧಿಕ ಪ್ರಶ್ನಿಸಿದ್ದಾನೆ. ಅಲ್ಲದೇ ವೈದ್ಯನ ಈ ನಡೆ ಅವರ ಅಕ್ರಮವನ್ನು ತೋರ್ಪಡಿಸಿದೆ ಎಂದು ಸಂಬಂಧಿಕ ಹೇಳಿದ್ದಾರೆ.
ರೋಗಿಗಳಿಗೆ ಇಂಜೆಕ್ಷನ್ ಹಾಕಿರುವುದಾಗಿ ನೋಂದಣಿ ಮಾಡಿ ಕಾಳಸಂತೆಯಲ್ಲಿ ಮಾರಾಟ ಮಾಡುತ್ತಿದ್ದಾರಾ ವೈದ್ಯರು? ಎಂಬ ಪ್ರಶ್ನೆ ಮೂಡಿದ್ದು, ಸಾಯೋ ಉದ್ದೇಶದಿಂದ ಈ ಆಸ್ಪತ್ರೆಗೆ ಸೇರಿಸಬೇಕಾ? ಎಂದು ಮಾಧ್ಯಮಗಳ ಮುಂದೆ ಸೋಂಕಿತನ ಸಂಬಂಧಿಕ ಅಳಲು ತೋಡಿಕೊಂಡಿದ್ದಾನೆ.
ಇದನ್ನೂ ಓದಿ: ಅಂದು ದೇಗುಲ-ಇಂದು ಆಸ್ಪತ್ರೆ.. ಕೊರೊನಾ ವಾರಿಯರ್ಗಳಾದ್ರು ಮಲೆಮಹದೇಶ್ವರ ಬೆಟ್ಟದ 100 ಸಿಬ್ಬಂದಿ
ವಿಷಯ ಎಲ್ಲರಿಗೂ ತಿಳಿಯುತ್ತಿದ್ದಂತೆ ಆಸ್ಪತ್ರೆಯಿಂದ ವೈದ್ಯ ಕಾಲ್ಕಿತ್ತಿದ್ದು, ವೈದ್ಯನ ರೆಮ್ಡಿಸಿವಿರ್ ದಂಧೆ ಬಗ್ಗೆ ತನಿಖೆ ನಡೆಸುವಂತೆ ಸಾರ್ವಜನಿಕರು ಒತ್ತಾಯಿಸಿದ್ದಾರೆ. ವೈದ್ಯನ ಅಸಲಿಯತ್ತು ಬೆಳಕಿಗೆ ಬರಲಿ ಹಾಗೂ ಆಸ್ಪತ್ರೆಯಲ್ಲಿ ದಾಖಲಾಗಿರುವ ಇತರೆ ರೋಗಿಗಳಿಗೆ ಅನ್ಯಾಯವಾಗದಿರಲಿ ಎಂದು ಸೋಂಕಿತನ ಸಂಬಂಧಿಕ ಕಣ್ಣೀರಿಟ್ಟಿದ್ದಾನೆ.
