ಪಿಎಫ್​ಐ ಕಾರ್ಯಕರ್ತರ ಪರೇಡ್​​ಗೆ ಖಂಡನೆ: ಕೆ ಆರ್ ಪೇಟೆಯಲ್ಲಿ ಬಂದ್​

ಪಿಎಫ್​ಐ ಕಾರ್ಯಕರ್ತರ ಪೆರೇಡ್ ಖಂಡಿಸಿ ಹಾಗೂ ಅವರ ಮೇಲೆ ಕಾನೂನು ಅಡಿ ತನಿಖೆ ನಡೆಸುವಂತೆ ಒತ್ತಾಯಿಸಿ ಇಂದು ಹಿಂದೂಪರ ಸಂಘಟನೆಗಳು ಕೆ.ಆರ್.ಪೇಟೆ ಬಂದ್ ನಡೆಸಿದವು

ಮಂಡ್ಯ: ಪಿಎಫ್​ಐ ಕಾರ್ಯಕರ್ತರ ಪೆರೇಡ್ ಖಂಡಿಸಿ ಇಂದು ಕೆ.ಆರ್.ಪೇಟೆಯಲ್ಲಿ ಬಂದ್ ಆಚರಣೆ ಮಾಡಲಾಗುತ್ತಿದೆ. ಬಂದ್ ಹಿನ್ನೆಲೆಯಲ್ಲಿ ಹಿಂದೂಪರ ಸಂಘಟನೆ ಮುಖಂಡರು ಪಟ್ಟಣದಲ್ಲಿ ಬೈಕ್ ರ‍್ಯಾಲಿ ಮಾಡಿದರು.

ಕಳೆದ ಭಾನುವಾರ ಕೆ.ಆರ್.ಪೇಟೆ ತಾಲೂಕಿನ ಆಲಂಬಾಡಿ ಕಾವಲ್ ಗ್ರಾಮದ ಹೊರ ವಲಯದಲ್ಲಿ ಪಿಎಫ್​ಐನ 16 ಮಂದಿ ಕಾರ್ಯಕರ್ತರು ಪರೇಡ್ ನಡೆಸಿದ್ದರು. ಅನುಮಾನಸ್ಪದವಾಗಿ ಪೆರೇಡ್ ಮಾಡಿದ ಹಿನ್ನೆಲೆಯಲ್ಲಿ ಪೊಲೀಸರು ಎಲ್ಲರನ್ನು ವಶಕ್ಕೆ ಪಡೆದು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದರು. ಪಿಎಫ್​ಐ ಕಾರ್ಯಕರ್ತರ ಪರೇಡ್ ಖಂಡಿಸಿ ಹಾಗೂ ಅವರ ಮೇಲೆ ಕಾನೂನು ರೀತ್ಯಾ ತನಿಖೆ ನಡೆಸುವಂತೆ ಒತ್ತಾಯಿಸಿ ಇಂದು ಹಿಂದೂಪರ ಸಂಘಟನೆಗಳು ಕೆ.ಆರ್.ಪೇಟೆ ಬಂದ್ ಆಚರಣೆ ಮಾಡಿವೆ.

ನಿನ್ನೆಯಷ್ಟೇ ಹಿಂದೂಪರ ಸಂಘಟನೆ ಮುಖಂಡರು ಅಂಗಡಿ ಮಾಲೀಕರ ಮನವೊಲಿಕೆ ಮಾಡಿದ್ದರು. ಪ್ರತಿಯೊಂದು ಅಂಗಡಿಗಳಿಗೂ ಕರಪತ್ರ ಹಂಚಿ ಬೆಂಬಲ ಕೋರಿದ್ದರು. ಇನ್ನು ಮುನ್ನೆಚ್ಚರಿಕಾ ಕ್ರಮವಾಗಿ ಶಾಲಾ-ಕಾಲೇಜುಗಳಿಗೆ ರಜೆ ಘೋಷಣೆ ಮಾಡಲಾಗಿದೆ.