ಗಂಗಾವತಿ(ಕೊಪ್ಪಳ): ಕಳೆದ ವರ್ಷ ಹನುಮಾಲೆ ಧರಿಸಿಕೊಂಡು ಈ ಭಾಗದಲ್ಲಿ ಅಭಿವೃದ್ಧಿ ಮಾಡಲು ಅವಕಾಶ ಒದಗಿಸುವಂತೆ ದೇವರಲ್ಲಿ ಪಾರ್ಥನೆ ಮಾಡಿ ಸಂಕಲ್ಪ ತೊಟ್ಟಿದ್ದೆ. ಸಂಕಲ್ಪದ ಭಾಗವಾಗಿ ಮೊದಲ ಶುಭಸೂಚನೆ ಸಿಕ್ಕಿದ್ದು, ಜನ ನನ್ನನ್ನು ಈ ಕ್ಷೇತ್ರದಿಂದ ಆಯ್ಕೆ ಮಾಡಿದ್ದಾರೆ ಎಂದು ಶಾಸಕ ಜಿ. ಜನಾರ್ದನರೆಡ್ಡಿ ಹೇಳಿದರು.
ತಾಲೂಕಿನ ಪಂಪಾಸರೋವರದಲ್ಲಿ ಶುಕ್ರವಾರ ಹನುಮಾಲೆ ಧರಿಸಿದ ಬಳಿಕ ಮಾತನಾಡಿದ ಅವರು, ಮುಂದೊಂದು ದಿನ ನನ್ನ ಕನಸಿನ ಕರ್ನಾಟಕ ಅಭಿವೃದ್ಧಿಪಡಿಸಲು ಆಶೀರ್ವಾದ ಮಾಡು ಎಂದು ಪ್ರಾರ್ಥಿಸಿದ್ದೆ. ಮೊದಲ ಬೇಡಿಕೆಗೆ ದೇವರು ಆಶೀರ್ವಾದಿಸಿದ್ದಾನೆ. ಕಿಷ್ಕಿಂಧೆಯನ್ನು ಇಡೀ ದೇಶ ನೋಡುವಂತೆ ಅಭಿವೃದ್ಧಿ ಮಾಡಲು ಆಂಜನೇಯ ಸ್ವಾಮಿ ಆಶೀರ್ವಾದ ಮಾಡಬೇಕು ಎಂದರು.
ಲೋಕಸಭೆ ಚುನಾವಣೆಗಾಗಿ ಸಮಾವೇಶ: ಕಲ್ಯಾಣ ರಾಜ್ಯ ಪ್ರಗತಿ ಪಕ್ಷದಿಂದ ಲೋಕಸಭಾ ಚುನಾವಣೆಗೆ ಅಭ್ಯರ್ಥಿಗಳನ್ನು ಅಖಾಡಕ್ಕೆ ಇಳಿಸುವ ವಿಚಾರ ಕುರಿತು ಮಾತನಾಡಿದ ಅವರು, 2024ರ ಜನವರಿ 11ನೇ ತಾರೀಖು ಕೊಪ್ಪಳದಲ್ಲಿ ದೊಡ್ಡ ಪ್ರಮಾಣದಲ್ಲಿ ಸಮಾವೇಶ ಮಾಡುವೆ. ಈ ಸಮಾವೇಶದಲ್ಲಿ ಆರು ಜಿಲ್ಲೆಯ ಕಾರ್ಯಕರ್ತರು, ಪಕ್ಷದ ಪ್ರಮುಖರು, ನನ್ನ ಅಭಿಮಾನಿಗಳು ಭಾಗವಹಿಸುವರು. ಲೋಕಸಭೆಗೆ ನಾಲ್ಕರಿಂದ ಆರು ಕ್ಷೇತ್ರದಲ್ಲಿ ಅಭ್ಯರ್ಥಿಗಳನ್ನು ಹಾಕುವೆ. ಅಭ್ಯರ್ಥಿಗಳನ್ನು ಗೆಲ್ಲಿಸಲು ರಾತ್ರಿ ಹಗಲು ಕೆಲಸ ಮಾಡುವೆ ಎಂದು ತಿಳಿಸಿದರು.
ಯಾವ ಪಕ್ಷದೊಂದಿಗೆ ಹೊಂದಾಣಿಕೆ ಇಲ್ಲ: ಕಳೆದ ವಿಧಾನಸಭಾ ಚುನಾವಣೆಯಲ್ಲಿ ನಾನಾ ಪಕ್ಷಗಳ ಪ್ರಮುಖರು ನನ್ನೊಂದಿಗೆ ಹೊಂದಾಣಿಕೆ ಮಾಡಿಕೊಳ್ಳಲು ಸಾಕಷ್ಟು ಯತ್ನ ಮಾಡಿದ್ದರು. ಆದರೆ, ಇದಕ್ಕೆ ನಾನು ಸ್ಪಂದಿಸಲಿಲ್ಲ. ಪರಿಣಾಮ ಬಿಜೆಪಿಗೆ ನನ್ನ ಪಕ್ಷದಿಂದ ದೊಡ್ಡಮಟ್ಟದ ನಷ್ಟ ಉಂಟಾಯಿತು. ಈ ಬಾರಿಯೂ ಅಷ್ಟೆ, ಲೋಕಸಭಾ ಚುನಾವಣೆಯಲ್ಲಿ ಯಾರೊಂದಿಗೂ ಹೊಂದಾಣಿಕೆ ಮಾಡಿಕೊಳ್ಳುವುದಿಲ್ಲ. ನನ್ನ ಪಕ್ಷದ ಇತಿಮಿತಿ ಒಳಗೆ ಚುನಾವಣೆ ಎದುರಿಸುತ್ತೇವೆ. ಹೊಂದಾಣಿಕೆಗೆ ಯಾರೇ ಪ್ರಯತ್ನ ಮಾಡಿದರೂ ಹೊಂದಾಣಿಕೆಯ ಪ್ರಶ್ನೆಯೇ ಇಲ್ಲ ಎಂದು ಸ್ಪಷ್ಟಪಡಿಸಿದರು.
ಲೋಕಸಭಾ ಚುನಾವಣೆಗೆ ಮತ್ತೆ ನಿಮ್ಮ ಕುಟುಂಬದ ಸದಸ್ಯರು ಸ್ಪರ್ಧಿಸುತ್ತಾರೆಯೇ ಎಂಬ ವಿಚಾರಕ್ಕೆ ಪ್ರತಿಕ್ರಿಯಿಸಿದ ರೆಡ್ಡಿ, ಈ ಚುನಾವಣೆಗೆ ಕುಟುಂಬದಿಂದ ಯಾರೂ ಸ್ಪರ್ಧೆ ಮಾಡಲ್ಲ ಎಂದರು.
ಇದನ್ನೂಓದಿ:ಅರಮನೆ ಫಲಪುಷ್ಪ ಪ್ರದರ್ಶನಕ್ಕೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಚಾಲನೆ
