ಕುಷ್ಟಗಿ (ಕೊಪ್ಪಳ) : ಈಕೆಗೆ ಅಂದಾಜು 65 ರಿಂದ 70 ವಯಸ್ಸಾಗಿರಬಹುದು. ತಲೆಯ ಮೇಲೊಂದು ಸ್ವಂತದ ಸೂರು ಈಕೆಗಿಲ್ಲ. ಕಾಳಜಿಗೆ ತನ್ನವರೆಂಬ ಬಂಧುಗಳಿಲ್ಲ. ಆದ್ರೆ ಈ ವೃದ್ಧೆಯ ಸಾಮಾಜಿಕ ಕಾಳಜಿ ಮತ್ತು ನಗರ ಸ್ವಚ್ಛ ಮಾಡುವ ಕೆಲಸ ಎಲ್ಲರ ಗಮನ ಸೆಳೆದಿದೆ.
ಕುಷ್ಟಗಿ ಪೊಲೀಸ್ ಠಾಣೆಯಿಂದ ಸಿಂಡಿಕೇಟ್ ಬ್ಯಾಂಕ್ವರೆಗೂ ಅಂದಾಜು ನೂರು ಮೀಟರ್ವರೆಗೂ ಈ ಮುಖ್ಯ ರಸ್ತೆ ಸದಾ ಸ್ವಚ್ಛವಾಗಿರುತ್ತದೆ. ಇದು ಪುರಸಭೆ ಪೌರ ಕಾರ್ಮಿಕರಿಂದಾದ ಸ್ವಚ್ಛತೆಯಲ್ಲ. ವೃದ್ಧೆ ಹನುಮಕ್ಕನ ಕೆಲಸ.
ಹಲವು ವರ್ಷಗಳಿಂದ ಪೊಲೀಸ್ ಠಾಣೆಯ ಎದುರಿನ ತುರಾಯಿ ಕಾಂಪ್ಲೆಕ್ಸ್ ಈಕೆಗೆ ಮನೆಯಂತಾಗಿದೆ. ಹೊದ್ದು ಕೊಳ್ಳುವ ಹಾಸಿಗೆ ಬಟ್ಟೆ ಗಂಟಿನೊಂದಿಗೆ ಈಕೆ ಇಲ್ಲಿ ವಾಸವಾಗಿದ್ದಾಳೆ. ಹನುಮಕ್ಕ ಈ ಪ್ರದೇಶ ಬಿಟ್ಟು ಕದಲುವುದಿಲ್ಲವಂತೆ. ಈ ರಸ್ತೆಯಲ್ಲಿನ ಅಂಗಡಿಗಳ ಪ್ರದೇಶದಲ್ಲಿ ಕಸ ಬೀಳುತ್ತಿದ್ದಂತೆ ಅದನ್ನೆತ್ತಿಕೊಂಡು ಒಂದೆಡೆ ಸಂಗ್ರಹಿಸಿ ಬೆಂಕಿ ಹಚ್ಚುವುದು ಈಕೆಯ ನಿತ್ಯದ ಕಾಯಕ.
ದಿನವೂ ಹಗಲು ರಾತ್ರಿ, ಚಳಿ, ಮಳೆ, ಬಿಸಿಲು ಲೆಕ್ಕಿಸದೇ ಜವಾಬ್ದಾರಿ ಎನ್ನುವಂತೆ ಸದ್ದಿಲ್ಲದೆ ಈ ಸೇವೆ ಸಲ್ಲಿಸುತ್ತಿದ್ದಾಳೆ. ಈಕೆಯ ಕಸ ಹೆಕ್ಕುವ ಕಾಯಕಕ್ಕೆ ಅಂಗಡಿ ಮಾಲೀಕರು ಉಪಾಹಾರ, ಊಟ, ಚಹಾ ನೀಡಿ ಉಪಚರಿಸುತ್ತಿದ್ದಾರೆ. ಠಾಣೆಯ ಪೊಲೀಸ್ ಮಹಾಂತೇಶ ಚಿಟ್ಟಿ ಸೀರೆ, ರವಿಕೆ ನೀಡುತ್ತಾರಂತೆ.
