ಕೊಪ್ಪಳ : ಕೊರೊನಾದಿಂದಾಗಿ ಕಳೆದ ಎರಡು ವರ್ಷದಿಂದ ಸರಳವಾಗಿ ನಡೆದಿದ್ದ ಶ್ರೀ ಗವಿಸಿದ್ದೇಶ್ವರ ಮಹಾರಥೋತ್ಸವವು ಭಾನುವಾರ ಸಂಜೆ ವೈಭವದಿಂದ ಕೋಟ್ಯಂತರ ಜನರ ಸಮ್ಮುಖದಲ್ಲಿ ಜರುಗಿತು. ದೇಶದಲ್ಲಿ ಅತಿ ಹೆಚ್ಚು ಜನರು ಒಂದೆಡೆ ಸೇರುವ ಧಾರ್ಮಿಕ ಸಮಾರಂಭಗಳಲ್ಲಿ ಮೊದಲ ಸ್ಥಾನ ಕುಂಭಮೇಳಕ್ಕಿದೆ. ಆದರೆ, ಕೊಪ್ಪಳದ ಗವಿಸಿದ್ಧೇಶ್ವರ ಜಾತ್ರೆ, ಮಠದ ಮುಂದಿನ ಬೃಹತ್ ಬಯಲಿನಲ್ಲಿ ನಡೆಯುವುದರಿಂದ, ಅತಿ ಹೆಚ್ಚು ಜನರನ್ನು ಒಂದೆಡೆ ಕಾಣುವ ಕಾರಣಕ್ಕಾಗಿ ದಕ್ಷಿಣ ಭಾರತದ ಕುಂಭಮೇಳ ಎಂದು ಇದು ಹೆಸರುವಾಸಿಯಾಗಿದೆ.
ಸದ್ಗುರು ಅವರಿಂದ ರಥೋತ್ಸವಕ್ಕೆ ಚಾಲನೆ : ಈ ಬಾರಿಯ ರಥೋತ್ಸವಕ್ಕೆ ಇಶಾ ಪೌಂಡೇಶನ್ನ ಸಂಸ್ಥಾಪಕ ಸದ್ಗುರು ಜಗ್ಗಿ ವಾಸುದೇವ್ ಚಾಲನೆ ನೀಡಿದರು. ಬಳಿಕ ನೆರೆದಿದ್ದ ಜನರನ್ನುದ್ದೇಶಿಸಿ ಮಾತನಾಡಿದ ಅವರು, ಜಾತ್ರೆಯಲ್ಲಿ ಭಕ್ತಿಯ ಸಾಗರವೇ ಹರಿದಿದೆ. ನದಿಯಂತೆ ಭಕ್ತರು ಹರಿದು ಬಂದಿದ್ದಾರೆ. ಎಷ್ಟೋ ಜನ ಸಾಧು ಸಂತರು ಈ ಭೂಮಿಯಲ್ಲಿ ತಮ್ಮ ಕೆಲಸ ಮುಗಿದ ಬಳಿಕ ತಮ್ಮ ಕಾಯ ಬಿಟ್ಟು ಹೋಗಿದ್ದಾರೆ. ಆದರೆ, 11ನೇ ಪೀಠದ ಗವಿಸಿದ್ದೇಶ್ವರ ಸ್ವಾಮಿಗಳು ತಾವು ಜೀವಂತವಿರುವಾಗಲೇ ತಮ್ಮ ಕಾಯವನ್ನು ನೂರಾರು ವರ್ಷಗಳ ಹಿಂದೆ ಬಿಟ್ಟು ಹೋಗಿದ್ದಾರೆ. ಅವರ ಜೀವಂತ ಸಮಾಧಿಯಾದ ದಿನದ ನೆನಪಿಗಾಗಿ ರಥೋತ್ಸವ ಆಚರಿಸುತ್ತಿರುವುದು ಹೆಮ್ಮೆಯ ವಿಚಾರ. ಈ ವಿಚಾರ ನನ್ನ ಹೃದಯ ಗೆದ್ದಿದೆ ಎಂದರು.
ಗವಿಸಿದ್ದೇಶರು ಬದುಕಿದ್ದಾರೆ ಎನ್ನುವುದಕ್ಕೆ ಇಲ್ಲಿ ಸೇರಿರುವ ಜನರೇ ಸಾಕ್ಷಿ: ಈ ಮಹಾರಥೋತ್ಸವಕ್ಕೆ ಇಷ್ಟೊಂದು ಜನರು ಸೇರಿರುವುದು ಗವಿಯಲ್ಲಿರುವ ಗವಿಸಿದ್ದೇಶರು ಇನ್ನು ಬದುಕಿದ್ದಾರೆ ಎನ್ನುವುದಕ್ಕೆ ಸಾಕ್ಷಿ ಎಂದು ಹೇಳಿದರು. ಇದು ದೇಶದ ಸಂಸ್ಕೃತಿ ಮತ್ತು ನಾಗರೀಕತೆಯನ್ನು ಪ್ರತಿ ಬಿಂಬಿಸುತ್ತದೆ. ಅವರು ಬದುಕಿದ್ದಾರೆ ಎನ್ನುವ ರೀತಿಯಲ್ಲಿ ಜನ ಸಂಭ್ರಮಿಸುತ್ತಿದ್ದಾರೆ. ಇಷ್ಟೊಂದು ಜನರನ್ನು ನಿರ್ವಹಣೆ ಮಾಡಲು ಸಾಧ್ಯವಿಲ್ಲ. ದೈವ ಭಕ್ತಿಯೊಂದರಿಂದ ಮಾತ್ರ ಇದು ಸಾಧ್ಯ. ಅವರ ಶಕ್ತಿಗೆ ಮತ್ತು ಜನರ ಭಕ್ತಿಗೆ ನಾನು ಮನಸೋತಿದ್ದೇನೆ. ಇಂದಿನ ಪೀಳಿಗೆಗೆ ದೈವೀ ಶಕ್ತಿಯ ಪ್ರೇರಣೆಯಾಗುತ್ತದೆ. ಇಂತಹ ಸಂಸ್ಕೃತಿ ಭಾರತ ದೇಶದಲ್ಲಿ ಕಾಣಲು ಮಾತ್ರ ಸಾಧ್ಯ ಎಂದು ಅಭಿಪ್ರಾಯಪಟ್ಟರು.
ಯೋಗ ವೈಜ್ಞಾನಿಕವಾದದ್ದು: ಶಿವ ಕೇವಲ ಇತಿಹಾಸ ಎಂದು ಭಾವಿಸಬೇಕಿಲ್ಲ. ಭವಿಷ್ಯವು ಹೌದು ಎಂಬುದನ್ನು ನಾವೆಲ್ಲರೂ ಅರ್ಥ ಮಾಡಿಕೊಳ್ಳಬೇಕು. ಜನ ಒಪ್ಪಿಕೊಳ್ಳಲು ತಯಾರಿದ್ದಾರೆ. ಹೀಗಾಗಿ ಯೋಗವನ್ನು ವೈಜ್ಞಾನಿಕ ಮಾದರಿ ಹಾಗೂ ಶಿಸ್ತು ಬದ್ಧ ಮಾದರಿಯಲ್ಲಿ ಜನರಿಗೆ ಮುಟ್ಟಿಸುವ ಕೆಲಸವಾಗಬೇಕಿದೆ ಎಂದು ಹೇಳಿದರು.
ಶಿವನನ್ನು ಹಲವು ರೂಪಗಳಲ್ಲಿ ಕಾಣುತ್ತಿದ್ದೇವೆ. ಅದರಲ್ಲಿ ಸಿದ್ದೇಶ್ವರ, ಯೋಗೇಶ್ವರ ಮೂಲಕವು ಭಕ್ತಿ ವ್ಯಕ್ತವಾಗುತ್ತದೆ. 21 ನೇ ಶತಮಾನದಲ್ಲಿ ಯೋಗೇಶ್ವರ ಅತ್ಯಂತ ಪ್ರಮುಖವಾದದ್ದು. ಯೋಗ ವೈಜ್ಞಾನಿಕವಾದದ್ದು. ಈ ಮೂಲಕ ಮೊದಲ ಬಾರಿಗೆ ಮಾನವ ಕುಲ ಎದುರಿಸುವ ಸಮಸ್ಯೆಗಳಿಗೆ ತಾರ್ಕಿಕ ಪರಿಹಾರಗಳನ್ನು ಹುಡುಕುವ ಪ್ರಯತ್ನ ಮಾಡುತ್ತಿದ್ದೇವೆ ಎಂದರು.
ಮೊದಲ ಯೋಗಿ ಆದಿಯೋಗಿ : ಯೋಗಿಯನ್ನು ಆರಾಧಿಸುವುದು ದೇಶದ ಭವಿಷ್ಯವು ಹೌದು. ಇಡೀ ಜಗತ್ತು ಭಾರತದಲ್ಲಿನ ಯೋಗದ ಕುರಿತು ತಿರುಗಿ ನೋಡುತ್ತಿದೆ. ಆದಿಯೋಗಿಯ 112 ಅಡಿ ಎತ್ತರದ ಮೂರ್ತಿಯನ್ನು ಚಿಕ್ಕಬಳ್ಳಾಪುರದಲ್ಲಿ ನಿರ್ಮಿಸಲಾಗುತ್ತಿದೆ. ಜ.15 ರಂದು ಈ ಮೂರ್ತಿಯ ಉದ್ಘಾಟನೆ ನಡೆಯಲಿದೆ ಎಂದರು. ಕೊಪ್ಪಳದ ಜಾತ್ರೆಗೆ ಬಂದ ಜನರ ಭಕ್ತಿ ಮತ್ತು ಶಿಸ್ತು ನನ್ನನ್ನು ಸ್ಪೂರ್ತಿಗೊಳಿಸಿದೆ. ಇಲ್ಲಿಯ ಜನಸಾಗರ ನೋಡಿ ನನ್ನ ಮನ ಸಂತೋಷವಾಗಿದೆ ಎಂದರು.
ಭಕ್ತಿಯಲ್ಲಿ ಮಿಂದೆದ್ದ ಜನಸಾಗರ : ಗವಿಸಿದ್ದೇಶ್ವರ ಮಹಾರಥೋತ್ಸವ ಕಣ್ತುಂಬಿಕೊಳ್ಳಲು ಸುಮಾರು 10 ಲಕ್ಷಕ್ಕೂ ಹೆಚ್ಚು ಜನರು ಆಗಮಿಸಿದ್ದರು. ಜಾತ್ರೆಯಲ್ಲಿ ಜೈ ಗವಿಸಿದ್ದೇಶ್ವರ ಎನ್ನುವ ಹರ್ಷೋದ್ಘಾರ ಎಲ್ಲೆಡೆ ಕೇಳಿಬಂತು. ರಥ ಎಳೆಯುವಾಗ ಭಕ್ತರು ಗವಿಸಿದ್ದೇಶ್ವರ ರಥಕ್ಕೆ ಉತ್ತತ್ತಿ, ಬಾಳೆಹಣ್ಣು ಸಮರ್ಪಿಸಿದರು.
ಜ್ಞಾನಯೋಗಿ ಸಿದ್ದೇಶ್ವರರಿಗೆ ಮೌನಾಚರಣೆ: ಅಭಿನವ ಗವಿಸಿದ್ದೇಶ್ವರ ಮಹಾಸ್ವಾಮೀಜಿ ನೇತೃತ್ವದಲ್ಲಿ ರಥೋತ್ಸವಕ್ಕೂ ಮುನ್ನ ಸಿದ್ದೇಶ್ವರ ಸ್ವಾಮೀಜಿಗಳಿಗೆ ಶ್ರದ್ಧಾಂಜಲಿ ಸಲ್ಲಿಸಲಾಯಿತು. ನಾಡಿಗೆ ಜ್ಞಾನದ ದೀಪವಾಗಿದ್ದ ಜ್ಞಾನ ಯೋಗಾಶ್ರಮದ ಸಿದ್ದೇಶ್ವರ ನಮ್ಮನ್ನಗಲಿದ್ದು, ಅವರಿಗಾಗಿ ಒಂದು ನಿಮಿಷ ಮೌನಾಚರಣೆ ಮಾಡಲಾಯಿತು.
ದಾಸೋಹ ಪರಂಪರೆ : ರಥೋತ್ಸವಕ್ಕೆ ಬಂದ ಭಕ್ತರಿಗೆ ವಿಶೇಷ ಭೋಜನ ವ್ಯವಸ್ಥೆಯನ್ನು ಮಾಡಲಾಗಿತ್ತು. ರೊಟ್ಟಿಗಳು, ಸಿಹಿ ಬೂಂದಿ,ಮಿರ್ಚಿಗಳು, ತುಪ್ಪ, ಚಟ್ನಿಪುಡಿ ಉಪ್ಪಿನಕಾಯಿ ವಿವಿಧ ಖಾದ್ಯಗಳಿದ್ದವು.
ಜ್ಞಾನದಾಸೋಹ : ಶ್ರೀ ಗವಿಸಿದ್ದೇಶ್ವರ ಜಾತ್ರೆಯಲ್ಲಿ ಅನ್ನದಾಸೋಹ ಅಷ್ಟೇ ಅಲ್ಲದೆ ಇಲ್ಲಿ ಜ್ಞಾನ ದಾಸೋವು ಜರುಗುತ್ತದೆ. ಜಾತ್ರೆಯ ದಿನದಿಂದ ಮೂರು ದಿನಗಳ ಕಾಲ, ಕಲ್ಲುಬೆಟ್ಟದ ಮೇಲಿರುವ ಕೈಲಾಸ ಮಂಪಟದಲ್ಲಿ ನಡೆಯುವ ಚಿಂತನ ಕಾರ್ಯಕ್ರಮಗಳು ಜಾತ್ರೆಯ ನಿಜವಾದ ಆಕರ್ಷಣೆ. ಆಗ ಇಡೀ ಕಲ್ಲುಬೆಟ್ಟವೇ ಜನಾವೃತವಾಗಿರುತ್ತದೆ. ನಾಡಿನ ಹಲವು ಗಣ್ಯರು, ವಿವಿಧ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿರುವ ಸಾಧಕರನ್ನು ಆಹ್ವಾನಿಸಿ ಅವರ ಮನದಾಳದ ಮಾತುಗಳನ್ನು ಹಂಚಿಕೊಳ್ಳಲು ಮುಕ್ತ ಅವಕಾಶ ನೀಡಲಾಗುತ್ತದೆ.
ಇದನ್ನೂ ಓದಿ :ಜನಜಾಗೃತಿಯೇ ಗವಿಸಿದ್ದೇಶ್ವರ ಜಾತ್ರೆಯ ಉದ್ದೇಶ: ಇಂದು ಮಹಾರಥೋತ್ಸವಕ್ಕೆ ಸದ್ಗುರು ಚಾಲನೆ
