ಬಾಲಕಿಯನ್ನ ಅಪಹರಿಸಿ ಮದುವೆಯಾದ ಯುವಕ... ಅಪ್ರಾಪ್ತೆ ಮೇಲೆ ಅತ್ಯಾಚಾರವೆಸಗಿದ ಕಾಮುಕ!

ಯುವಕನೊಬ್ಬ ಬಾಲಕಿಯೊಬ್ಬಳನ್ನು ಅಪಹರಿಸಿ ಮದುವೆ ಮಾಡಿಕೊಂಡಿದ್ದಲ್ಲದೇ ಆಕೆ ಮೇಲೆ ಅತ್ಯಾಚಾರವೆಸಗಿರುವ ಘಟನೆ ಕೊಪ್ಪಳ ಜಿಲ್ಲೆಯಲ್ಲಿ ನಡೆದಿದೆ.

ಗಂಗಾವತಿ (ಕೊಪ್ಪಳ): ಬಾಲಕಿಯೊಬ್ಬಳನ್ನು ಯುವಕ ಅಪಹರಿಸಿ ಆಕೆಯ ವಿರೋಧದ ನಡುವೆಯೂ ಮದುವೆಯಾಗಿದ್ದಾನೆ. ಅಲ್ಲದೆ, ಆಕೆಯ ಮೇಲೆ ಅತ್ಯಾಚಾರವೆಸಗಿರುವ ಘಟನೆ ಕನಕಗಿರಿ ಪೊಲೀಸ್ ಠಾಣೆ ವ್ಯಾಪ್ತಿಯ ಗೋಡಿನಾಳ ಗ್ರಾಮದಲ್ಲಿ ನಡೆದಿದೆ.

ಗ್ರಾಮದ 14 ವರ್ಷದ ಬಾಲಕಿಯನ್ನು ಹೊಸಪೇಟೆ ತಾಲೂಕಿನ ಕಲ್ಲಹಳ್ಳಿ ಗ್ರಾಮದ ಯುವಕ ಸುರೇಶ್​ ತಿಮ್ಮಾರೆಡ್ಡಿ ಕುರುಬರ್ ಎಂಬಾತ ಅಪಹರಿಸಿದ್ದ. ಬಳಿಕ ಆಕೆಯ ವಿರೋಧದ ನಡುವೆಯೂ ಹೊಸೂರು ಗ್ರಾಮದ ಮಾಗಣಿ ಈಶ್ವರ ದೇವಸ್ಥಾನಕ್ಕೆ ಕರೊದೊಯ್ದು ಮದುವೆಯಾಗಿದ್ದಾನೆ. ಇಷ್ಟಕ್ಕೆ ಸುಮ್ಮನಾಗದ ಆರೋಪಿ ಸುರೇಶನು ಆಕೆಯ ಮೇಲೆ ಅತ್ಯಾಚಾರವೆಸಗಿ ಅಟ್ಟಹಾಸ ಮೆರೆದಿದ್ದಾನೆ.

'ನನ್ನನ್ನು ಅಪಹರಿಸಿ, ಮದುವೆಯಾಗಿದ್ದಲ್ಲದೇ ನನ್ನ ಮೇಲೆ ಅತ್ಯಾಚಾರವೆಸಗಿದ್ದಾನೆ ಎಂದು ಸಂತ್ರಸ್ತ ಬಾಲಕಿ ಪೊಲೀಸರಿಗೆ ದೂರು ನೀಡಿದ್ದಾಳೆ. ತಾನು ಮತ್ತು ತನ್ನ ತಂದೆ ಹಾಸನ ಜಿಲ್ಲೆಯ ಸಕಲೇಶಪುರಕ್ಕೆ ದುಡಿಯಲು ಹೋದಾಗ ಆರೋಪಿ ಸುರೇಶ್​ ಪರಿಚಯವಾಗಿದ್ದ' ಎಂದು ಬಾಲಕಿ ದೂರಿನಲ್ಲಿ ವಿವರಿಸಿದ್ದಾಳೆ.

ಈ ಘಟನೆ ಕುರಿತು ಪ್ರಕರಣ ದಾಖಲಾಗಿದ್ದು, ಪೊಲೀಸರು ಮುಂದಿನ ಕ್ರಮ ಕೈಗೊಂಡಿದ್ದಾರೆ.