ಕಲಬುರಗಿ: ಗ್ರಾಮ ಪಂಚಾಯಿತಿಯ ಮೊದಲನೇ ಹಂತದ ಚುನಾವಣೆಗೆ ನಾಳೆ ಮತದಾನ ನಡೆಯಲಿದ್ದು, ದಿನದಿಂದ ದಿನಕ್ಕೆ ಹಳ್ಳಿ ರಾಜಕೀಯ ಕಾವೇರತೊಡಗಿದೆ. ಎಲ್ಲಿ ನೋಡಿದರು ಕುಟುಂಬ ರಾಜಕೀಯದ ಸದ್ದು ಕೇಳಿ ಬರುತ್ತಿದೆ.
ಗ್ರಾಮ ಪಂಚಾಯಿತಿ ಚುನಾವಣೆ ಪ್ರಾರಂಭವಾಗಿದ್ದರಿಂದ ಒಂದು ಕಡೆ ಗಂಡ-ಹೆಂಡತಿ, ಅಣ್ಣ-ತಮ್ಮಂದಿರು ಎದುರಾಳಿಗಳಾಗಿ ಸ್ಪರ್ಧಿಸಿದರೆ ಮತ್ತೊಂದು ಕಡೆ ಬೇರೆ ಬೇರೆ ವಾರ್ಡ್ಗಳಲ್ಲಿ ಒಂದೇ ಕುಟುಂಬದ ಸದಸ್ಯರು ಹೆಚ್ಚಾಗಿ ಸ್ಪರ್ಧಿಸುವುದು ಕಂಡು ಬರುತ್ತಿದೆ. ಇದೇ ರೀತಿ ಚಿತ್ತಾಪುರ ತಾಲೂಕಿನ ಇಂಗಳಗಿ ಗ್ರಾಮದಲ್ಲಿ ಅತ್ತೆ -ಸೊಸೆ ಇಬ್ಬರೂ ಗ್ರಾಮ ಪಂಚಾಯಿತಿ ಚುನಾವಣೆಗೆ ಸ್ಪರ್ಧಿಸಿ ಜಿಲ್ಲೆಯಲ್ಲಿ ಗಮನ ಸೆಳೆದಿದ್ದಾರೆ.
ರಮಾಬಾಯಿ ಈರಣ್ಣ ಹಾಗೂ ಮಂಜುಳಾ ಸಾಯಿಬಣ್ಣ ಗುಡುಬಾ ಈ ಬಾರಿ ಚುನಾವಣೆಯಲ್ಲಿ ಸ್ಪರ್ಧಿಸುತ್ತಿದ್ದಾರೆ. ಅತ್ತೆ ರಮಾಬಾಯಿ ಈರಣ್ಣ ಅವರು ವಾರ್ಡ್ ನಂ. 03 ರಲ್ಲಿ ಸ್ಪರ್ಧಿಸಿದರೆ. ಸೊಸೆ ಮಂಜುಳಾ ಸಾಯಿಬಣ್ಣ ಗುಡುಬಾ ಅವರು ವಾರ್ಡ್ ನಂ.04 ರಲ್ಲಿ ಕಣಕ್ಕಿಳಿದಿದ್ದಾರೆ. ಕಳೆದ ಬಾರಿ ವಾರ್ಡ್ ನಂಬರ್ 03 ರಿಂದ ರಮಾಬಾಯಿ ಈರಣ್ಣ ಅವರ ಮಗ ಸಾಯಿಬಣ್ಣ ಗುಡುಬಾ ಸ್ಪರ್ಧಿಸಿ ವಿಜಯ ಸಾಧಿಸಿದ್ದರು. ಈ ಬಾರಿ ಮಹಿಳಾ ಮೀಸಲಾತಿ ಬಂದಿರುವುದರಿಂದ ತಾಯಿಯನ್ನು ಕಣಕ್ಕಿಳಿಸಿದ್ದಾರೆ.
