ಕಲಬುರಗಿ: ಲಾಕ್ಡೌನ್ ಜಾರಿಯಾಗಿರುವುದರಿಂದ ಯಾರೂ ಸಹ ಮನೆಯಿಂದ ಹೊರ ಬರಬಾರದು ಎಂದು ಆದೇಶ ಹೊರಡಿಸಲಾಗಿದೆ. ಆದರೆ ಈ ಆದೇಶ ಗಾಳಿಗೆ ತೂರಿ ಕೆಲವರು ಮನೆಯಿಂದ ಹೊರ ಬರುವುದು ವರದಿಯಾಗುತ್ತಿದೆ.
ಈ ನಡುವೆ ಕಲಬುರಗಿಯಲ್ಲಿ ಜಾತ್ರೆಯ ನಿಮಿತ್ತ ನೂರಾರು ಮಂದಿ ಒಟ್ಟಿಗೆ ಸೇರಿರುವ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ. ಕಲಬುರಗಿ ತಾಲೂಕಿನ ಸಾವಳಗಿಯಲ್ಲಿ ಏಪ್ರಿಲ್ 8ರ ಮಧ್ಯರಾತ್ರಿ ಶಿವಲಿಂಗೇಶ್ವರ ರಥೋತ್ಸವ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ.
ಲಾಕ್ಡೌನ್ ಹಿನ್ನೆಲೆಯಲ್ಲಿ ಗ್ರಾಮಸ್ಥರು ಬೇಡವೆಂದರೂ ಕೇಳದ ಮಠಾಧೀಶರು, ಗುರುನಾಥ ಸ್ವಾಮಿ ಎಂಬುವರ ನೇತೃತ್ವದಲ್ಲಿ ನಡುರಾತ್ರಿ ರಥೋತ್ಸವ ನಡೆಸಿರುವ ಆರೋಪ ಕೇಳಿ ಬಂದಿದೆ. ಇನ್ನು ನಿಷೇಧದ ನಡುವೆ ಗುಂಪು ಗುಂಪಾಗಿ ಸಾಮಾಜಿಕ ಅಂತರ ಕಾಯ್ದುಕೊಳ್ಳದೆ ರಥೋತ್ಸವ ಮಾಡಲಾಗಿದೆ ಎನ್ನಲಾಗಿದೆ.
ಜಿಲ್ಲೆಯಲ್ಲಿ 144 ಸೆಕ್ಷನ್ ಜಾರಿ ಮಾಡಿ ಯಾವುದೇ ತರಹದ ಸಭೆ ಸಮಾರಂಭ, ಉರುಸ್, ಜಾತ್ರೆ ನಡೆದಂತೆ ಕಟ್ಟುನಿಟ್ಟಿನ ಕ್ರಮ ಜಾರಿಗೆ ತರಲಾಗಿದೆ. ಈ ನಡುವೆಯೂ ಜಾತ್ರೆ ತಡೆಯುವಲ್ಲಿ ಅಧಿಕಾರಿಗಳು ಸಂಪೂರ್ಣ ವಿಫಲರಾಗಿದ್ದಾರೆ. ಜಾತ್ರೆ ಮಾಡಿದ ಜನರ ಬಗ್ಗೆ ಹಾಗೂ ತಡೆಯುವಲ್ಲಿ ವಿಫಲರಾದ ಅಧಿಕಾರಿಗಳ ವಿರುದ್ಧ ಆಕ್ರೋಶ ವ್ಯಕ್ತವಾಗಿದೆ. ಇನ್ನು ಕೊರೊನಾ ಭೀತಿ ನಡುವೆ ರಥೋತ್ಸವ ನಡೆಸಿರುವುದು ಜಿಲ್ಲಾಡಳಿತಕ್ಕೆ ತಲೆಬಿಸಿಯಾಗಿ ಪರಿಣಮಿಸಿದೆ.
