ಕಲಬುರಗಿ: ಬಿಸಿಲಿನಿಂದಲೇ ಗುರುತಿಸಿಕೊಂಡ ಕಲಬುರಗಿಯಲ್ಲಿ ಉತ್ತಮ ಮಳೆ ಆಗಿದೆ. ಜಿಲ್ಲೆಯಲ್ಲಿ ಬೇಸಿಗೆ ಕಾಲದಲ್ಲಿ ಮಾತ್ರವಲ್ಲ, ವರ್ಷದ ಬಹುತೇಕ ತಿಂಗಳು ನೀರಿನ ಕೊರತೆ ಎದುರಾಗುತ್ತದೆ. ಆದರೆ, ಈ ಗ್ರಾಮದಲ್ಲಿ ಮಾತ್ರ ನೀರು ಸದಾ ಉಕ್ಕಿ ಹರಿಯುತ್ತಿರುತ್ತದೆ.
ನಗರದಿಂದ ಕೂಗಳತೆ ದೂರದ ಹೀರಾಪುರ ಗ್ರಾಮದ ಕೊಳವೆ ಬಾವಿಯೊಂದರಲ್ಲಿ ದಿನದ 24 ಗಂಟೆಗಳ ಕಾಲ ಜಲಧಾರೆ ಸುರಿಯುತ್ತಿದೆ. ಇಲ್ಲಿನ ಮುಖ್ಯ ರಸ್ತೆಯ ವೀರಣ್ಣ ಎಂಬುವವರ ಮನೆ ಎದುರು ಇರುವ ಸುಮಾರು 250 ಅಡಿ ಆಳದ ಬೋರ್ ವೆಲ್ ಇದಾಗಿದೆ. ಕಳೆದ 15 ದಿನಗಳಿಂದ ತನ್ನಷ್ಟಕ್ಕೆ ತಾನೇ ನೀರು ಹೋರ ಚಿಮ್ಮುತ್ತಿದೆ.
ಗ್ರಾಮದ ಬಡಾವಣೆಗಳಿಗೆ ನೀರು ಸರಬರಾಜು ಕೂಡ ಇದೇ ಬೋರ್ ವೆಲ್ ಮೂಲಕ ಆಗುತ್ತದೆ. ಬೆಳಗ್ಗೆ, ಸಂಜೆ ದಿನಕ್ಕೆ ಎರಡು ಬಾರಿ ನೀರು ಸರಬರಾಜು ಮಾಡಲಾಗುತ್ತಿದೆ. ಆದರೂ ನೀರು ಉಕ್ಕುವುದು ಕಡಿಮೆಯಾಗಿಲ್ಲ.
ಸುಮಾರು 25 ವರ್ಷಗಳ ಹಿಂದೆ ಈ ಬೋರವೆಲ್ ಹಾಕಲಾಗಿದೆ. ಅಂದಿನಿಂದ ಗ್ರಾಮದಲ್ಲಿ ನೀರಿನ ಕೊರತೆ ಇಲ್ಲವಾಗಿದೆ. ಈ ಬಾರಿ ಉತ್ತಮ ಮಳೆಯಾಗಿದ್ದು, ಅಂತರ್ಜಲ ಮಟ್ಟ ಹೆಚ್ಚಾಗಿದೆ. ಇದು ಖುಷಿ ತಂದಿದೆ ಎನ್ನುತ್ತಾರೆ ಗ್ರಾಮಸ್ಥರು.
