ಹಾವೇರಿ: ಮೇ 25 ಮತ್ತು 26 ರಂದು ಥಾಯ್ಲೆಂಡ್‌ನಲ್ಲಿ ನಡೆಯಲಿರುವ ಅಂತರಾಷ್ಟ್ರೀಯ ಯೋಗ ಉತ್ಸವದಲ್ಲಿ ಹಾವೇರಿ ಜಿಲ್ಲೆಯ 8 ಯೋಗಪಟುಗಳು ಭಾಗವಹಿಸಲಿದ್ದಾರೆ.
ಈ ಯೋಗ ಉತ್ಸವದಲ್ಲಿ 500ಕ್ಕೂ ಅಧಿಕ ಯೋಗಪಟುಗಳು ವೀರಭದ್ರಾಸನ ಹಾಕುವ ಮೂಲಕ ವಿಶ್ವ ದಾಖಲೆ ಬರೆಯಲಿದ್ದಾರೆ. ಈ ಕಾರ್ಯಕ್ರಮದ ಸಾನಿಧ್ಯವನ್ನು ಹಾವೇರಿ ಹುಕ್ಕೇರಿಮಠದ ಸದಾಶಿವಶ್ರೀಗಳು ವಹಿಸುತ್ತಿರುವುದು ವಿಶೇಷವಾಗಿದೆ.
ಬೆಂಗಳೂರಿನ ಯೋಗ ತರಬೇತಿ ಕೇಂದ್ರ ಮತ್ತು ಥಾಯ್ಲೆಂಡ್‌ನ ಪ್ರವಾಸೋದ್ಯಮ ಮತ್ತು ಕ್ರೀಡಾ ಇಲಾಖೆ ಸಹಯೋಗದಲ್ಲಿ ನಡೆಯತ್ತಿರುವ ಈ ಉತ್ಸವಕ್ಕೆ ಹಲವು ದೇಶಗಳಿಂದ ಸುಮಾರು 500 ಕ್ಕೂ ಅಧಿಕ ಯೋಗಪಟುಗಳು ಆಗಮಿಸಲಿದ್ದಾರೆ.
ಈ ಸ್ಪರ್ಧೆಯಲ್ಲಿ ದೇಶದ 80 ಯೋಗಪಟುಗಳು ಭಾಗವಹಿಸುತ್ತಿದ್ದು, ಅದರಲ್ಲಿ ರಾಜ್ಯದಿಂದ 8 ಯೋಗಪಟುಗಳು ಅವಕಾಶ ಪಡೆದಿದ್ದಾರೆ. ಉತ್ಸವದಲ್ಲಿ ಪಾಲ್ಗೊಳ್ಳುತ್ತಿರುವ 8 ಯೋಗಪಟುಗಳು ಹಾವೇರಿ ಜಿಲ್ಲೆಯವರೇ ಆಗಿರುವುದು ಜಿಲ್ಲೆಗೆ ವಿಶೇಷ ಗರಿಮೆಯಾಗಿದೆ.
ಈ ಸ್ಪರ್ಧೆಯಲ್ಲಿ ಭಾಗವಹಿಸಲಿರುವ ಜಿಲ್ಲೆಯ ಯೋಗಪಟುಗಳು ಪ್ರತಿನಿತ್ಯ ಐದು ತಾಸಿಗೂ ಅಧಿಕ ಕಾಲ ಯೋಗಾಭ್ಯಾಸ ನಡೆಸುತ್ತಿದ್ದಾರೆ ಯೋಗಸ್ಪರ್ಧೆಯ ರಾಜ್ಯ ಸಂಚಾಲಕ ಪ್ರೇಮಕುಮಾರ್ ಮುದ್ದಿ ತಿಳಿಸಿದರು.
