ಮಗಳಿಗಾಗಿ ಹುಡುಕಾಟ: ಠಾಣೆ ಎದುರೇ ಆತ್ಮಹತ್ಯೆಗೆ ಯತ್ನಿಸಿದ ನೊಂದ ತಂದೆ

ಧಾರವಾಡ ಮಹಿಳಾ ಪೊಲೀಸ್ ಠಾಣೆ ಎದುರು ತಂದೆಯೊಬ್ಬರು ತನ್ನ ಮಗಳನ್ನು ಹುಡುಕಿಕೊಡುವಂತೆ ನಿನ್ನೆಯಿಂದ ಗೋಳಾಟ ನಡೆಸುತ್ತಿದ್ದಾರೆ. ಇಂದು ಅವರು ಆತ್ಮಹತ್ಯೆ ಮಾಡಿಕೊಳ್ಳಲು ಯತ್ನಿಸಿದ್ದಾರೆ.

ಧಾರವಾಡ: ತನ್ನ ಮಗಳನ್ನು ಹುಡುಕಿಕೊಡುವಂತೆ ತಂದೆಯೊಬ್ಬರು ಮಹಿಳಾ ಪೊಲೀಸ್​ ಠಾಣೆ ಎದುರು ನೊಂದು ಗೋಳಾಡುತ್ತ ಆತ್ಮಹತ್ಯೆಗೆ ಯತ್ನಿಸಿದ ಘಟನೆ ಧಾರವಾಡದಲ್ಲಿ ನಡೆದಿದೆ.

ತಾಲೂಕಿನ ಮರೇವಾಡ ಗ್ರಾಮದ ಮುದ್ದಪ್ಪ ಜಂಗಳಿ ಎಂಬವರು ಪೊಲೀಸ್​ ಠಾಣೆ ಎದುರು ಆತ್ಮಹತ್ಯೆಗೆ ಯತ್ನಿಸಿದ ವ್ಯಕ್ತಿ. ನಿನ್ನೆ ಮಧ್ಯಾಹ್ನದಿಂದ ಠಾಣೆಯ ಎದುರು ಕುಳಿತಿರು ಇವರು, ಮಗಳನ್ನು ಹುಡುಕಿಕೊಡುವಂತೆ ಪೊಲೀಸ್​ ಠಾಣೆ ಎದುರು ಮನವಿ ಮಾಡುತ್ತಿದ್ದಾರೆ.

ಜುಲೈ 23 ರಂದು ಮುದ್ದಪ್ಪ ಜಂಗಳಿಯವರ ಮಗಳು ಕಾಣೆಯಾಗಿದ್ದಾಳೆ. ಹಾಗಾಗಿ, ಮಗಳನ್ನು ಹುಡುಕಿ ಕೊಡುವಂತೆ ಠಾಣೆಗೆ ಅಲೆದಾಟ ನಡೆಸಿದ್ದಾರೆ. ತಮ್ಮ ದೂರಿಗೆ ಪೊಲೀಸರು ಸ್ಪಂದಿಸಿಲ್ಲ, ಇದರಿಂದ ಬೇಸತ್ತ ಮುದ್ದಣ್ಣ ನೇಣು ಹಾಕಿಕೊಳ್ಳುವ ಯತ್ನ ಮಾಡಿದ್ದಾರೆ. ಅಷ್ಟೇ ಅಲ್ಲದೆ, ತನ್ನ ಮಗಳನ್ನು ಬೆಳಗಾವಿ ಜಿಲ್ಲೆಯ ಬೈಲಹೊಂಗಲ ತಾಲೂಕಿನ ಮಡ್ಡಿಗಿರಿಯಾಲ ಗ್ರಾಮದ ಗಂಗಪ್ಪ ಚುರಮರಿ ಎಂಬ ಯುವಕ ಅಪಹರಿಸಿದ್ಧಾನೆೆ ಎಂದು ಆರೋಪಿಸಿದ್ದಾರೆ.