ಹುಬ್ಬಳ್ಳಿ: ಜಿಲ್ಲೆಯ ಸಿದ್ದಾರೂಢ ಮಠದಲ್ಲಿ ನಾದ ಸೂಸುವ ತಂಬೂರಿ ಕಳೆದ 92 ವರ್ಷಗಳಿಂದ ನೆಲವನ್ನೇ ಸ್ಪರ್ಶಿಸಿಲ್ಲ. ಲಾಕ್ಡೌನ್ ಸಂದರ್ಭದಲ್ಲಿಯೂ ಕೂಡ ನಿತ್ಯ ಪೂಜೆ ಪುನಸ್ಕಾರಗಳ ಮೂಲಕ ತಂಬೂರಿ ನಾದ ಮೊಳಗುತ್ತಲೇ ಇದೆ.
ಒಟ್ಟು 12 ಜನ ಸಾಧುಗಳು ಈ ತಂಬೂರಿಯನ್ನು 24 ಗಂಟೆಗಳ ಕಾಲವೂ ನುಡಿಸುತ್ತಾರೆ. ಈ ತಂಬೂರಿಯನ್ನು ಪ್ರತಿಯೊಬ್ಬರು ಎರಡು ಗಂಟೆಗಳ ಕಾಲ ಒಬ್ಬರು ಪಾಳೆಯ ಮೂಲಕ ಭಜನೆ ಮಾಡುತ್ತ ತಂಬೂರಿ ನುಡಿಸಿ, ಕೆಳಗೆ ಇಡದೇ ಪುರಾತನ ಪದ್ಧತಿಯನ್ನು ಇಂದಿಗೂ ನಡೆಸಿಕೊಂಡು ಬರುತ್ತಿದ್ದಾರೆ. ಶ್ರೀ ಸಿದ್ದಾರೂಢ ಸ್ವಾಮೀಜಿ ಬ್ರಹ್ಮೈಕ್ಯ ಆಗುವ ಮುನ್ನ ಮಠಕ್ಕೆ ಈ ತಂಬೂರಿಯನ್ನು ನೀಡಲಾಗಿತ್ತು. ಅಲ್ಲಿಂದ ಇಲ್ಲಿಯವರೆಗೂ ಓಂ ನಮಃ ಶಿವಾಯ ಅನ್ನುವ ಮಂತ್ರದ ಮೂಲಕ ನಿತ್ಯ ಇದನ್ನು ಬಾರಿಸುತ್ತ ಭಕ್ತಿ ಸಮರ್ಪಿಸುತ್ತಿದ್ದಾರೆ.
ಇನ್ನು ಕೆಳಗೆ ಸಹ ತಂಬೂರಿಯನ್ನು ಇಡದೇ ಪ್ರತಿ ಗಂಟೆಗೂ ಒಬ್ಬೊಬ್ಬರು ಅದನ್ನು ಪೂಜ್ಯ ಭಾವನೆಯಿಂದ ಮೈಮೇಲೆ ಧರಿಸಿ ನುಡಿಸುತ್ತಾರೆ. ಸಿದ್ದಾರೂಢರು ನುಡಿಸಿದ ಈ ತಂಬೂರಿಯನ್ನು ಅಷ್ಟೇ ಪಾವಿತ್ರ್ಯತೆ ಮೂಲಕ ನೆಲಕ್ಕೆ ಮುಟ್ಟಿಸದೇ ದೈವೀ ಸ್ವರೂಪದಂತೆ ಕಾಣುತ್ತಿದ್ದಾರೆ.
