ಹುಬ್ಬಳ್ಳಿ: ಕೊರೊನಾ ವಿರುದ್ಧದ ಹೋರಾಟದಲ್ಲಿ ಮೊದಲ ಸ್ಥಾನದಲ್ಲಿರುವ ಕಿಮ್ಸ್ನ ಕೊರೊನಾ ಐಸಿಯು ವಾರ್ಡ್ ಈಗ ಅವ್ಯವಸ್ಥೆಯ ಆಗರವಾಗಿದೆ.
ಕೊರೊನಾ ಐಸಿಯು ವಾರ್ಡ್ ಅಂದ್ರೆ ಅಲ್ಲಿ ಯಾರೂ ಕೂಡ ಹೋಗಬಾರದು. ವೈದ್ಯರು, ನರ್ಸ್ಗಳು ಕೂಡ ಪಿಪಿಇ ಕಿಟ್ ಹಾಕಿಕೊಂಡು ರೋಗಿಗಳಿಗೆ ಚಿಕಿತ್ಸೆ ನೀಡುತ್ತಾರೆ. ಆದ್ರೆ ಕಿಮ್ಸ್ನ ಕೊರೊನಾ ಐಸಿಯು ವಾರ್ಡ್ ಯಾವುದೋ ಮದುವೆ ಛತ್ರದಂತೆ ಕಾಣುತ್ತಿರುವ ವಿಡಿಯೋವೊಂದು ವೈರಲ್ ಆಗಿದೆ.
ಕೊರೊನಾ ಐಸಿಯು ವಾರ್ಡ್ನದ್ದು ಎನ್ನಲಾದ ವಿಡಿಯೋದಲ್ಲಿ ಕೊರೊನಾ ಸೋಂಕಿತರ ಪಕ್ಕದಲ್ಲಿ ಅಟೆಂಡರ್ಸ್ ಹಾಗೂ ಸಂಬಂಧಿಗಳು ಮಲಗಿರುವ ದೃಶ್ಯ ಎಂಥವರನ್ನು ಭಯಭೀತಗೊಳಿಸುತ್ತದೆ. ಸೋಂಕಿತ ಅಂತಾ ಕೂಡ ನೋಡದೆ ರೋಗಿಯ ಜೊತೆ ಒಂದೇ ಬೆಡ್‌ನಲ್ಲಿ ಅಟೆಂಡರ್ ಹಾಗೂ ಸಂಬಂಧಿಗಳು ಮಲಗುತ್ತಾರೆ. ಕಾಟ್ ಖಾಲಿ ಇರದಿದ್ರೆ ಸಂಬಂಧಿಗಳು ನೆಲದ ಮೇಲೆ ಹಾಸಿಗೆ ಹಾಸಿಕೊಂಡೇ ನಿರ್ಭಯವಾಗಿ ಮಲಗುತ್ತಾರೆ.
ಐಸಿಯು ವಾರ್ಡ್ನಲ್ಲಿ ಸೋಂಕಿತರಿಗಿಂತ ಅಟೆಂಡರ್ಗಳೇ ಜಾಸ್ತಿ ಇದ್ದಾರೆ. ಯಾವುದೇ ಮಾಸ್ಕ್ ಇಲ್ಲ, ಸುರಕ್ಷತೆ‌ಯೂ ಇಲ್ಲಿ ಇಲ್ಲ. ಅಟೆಂಡರ್ಗಳಿಗೆ ವೈದ್ಯರು ಸಾಕಷ್ಟು ತಿಳಿ‌ಹೇಳಿ ಸುಸ್ತಾಗಿ ಹೋಗಿದ್ದಾರಂತೆ. ಆದ್ರೆ ಊಟ-ಉಪಹಾರ ನೀಡುವ ನೆಪದಲ್ಲಿ ಅಟೆಂಡರ್ಗಳು ಹಾಗೂ ಸಂಬಂಧಿಗಳು ಐಸಿಯುನಲ್ಲಿ ವಾಸ್ತವ್ಯ ಹೂಡುತ್ತಿದ್ದಾರೆ ಎನ್ನಲಾಗಿದೆ.
ಇದನ್ನೂ ಓದಿ: ಬೆಂಗಳೂರಿನಲ್ಲಿ 5,811 ಕೋವಿಡ್ ಕೇಸ್ ಪತ್ತೆ: 611 ಸೋಂಕಿತರು ನಾಪತ್ತೆ!
ಧಾರವಾಡ ಜಿಲ್ಲೆಯಲ್ಲಿ ದಿನೇ ದಿನೆ ಸೋಂಕಿತರ ಸಂಖ್ಯೆ ಹೆಚ್ಚಾಗುತ್ತಿದ್ದರೂ ಇಂತಹ ದೃಶ್ಯ ಕಂಡುಬಂದಿದೆ. ಹೀಗಾದ್ರೆ ಕೊರೊನಾ ಸೋಂಕು ಯಾವಾಗ ಕಡಿಮೆಯಾಗುವುದು ಎಂಬ ಅನುಮಾನ ಮೂಡಿದೆ.
