ಬ್ರಿಟನ್ ಕೊರೊನಾ ಸೋಂಕು ಆತಂಕ: ಧಾರವಾಡದಲ್ಲಿ ಮತ್ತೆ ಮೂವರು ನಾಪತ್ತೆ

ಬ್ರಿಟನ್ ಮೂಲದ ರೂಪಾಂತರ ಕೊರೊನಾ ವೈರಸ್ ಆತಂಕದ ನಡುವೆ ಇದೇ ಸೋಂಕು ಹೊಂದಿರುವ ಮತ್ತೆ ಮೂವರು ಧಾರವಾಡದ್ಲಲಿ ನಾಪತ್ತೆಯಾಗಿದ್ದಾರೆ.

ಧಾರವಾಡ: ಬ್ರಿಟನ್ ರೂಪಾಂತರ ಕೊರೊನಾ ವೈರಸ್ ಹೊಂದಿರುವ ಮೂವರು ಧಾರವಾಡದಲ್ಲಿ ನಾಪತ್ತೆಯಾಗಿದ್ದಾರೆ ಎಂದು‌ ಜಿಲ್ಲಾಧಿಕಾರಿ ನಿತೇಶ ಪಾಟೀಲ್ ತಿಳಿಸಿದ್ದಾರೆ.

ಮಾಧ್ಯಮ ಪ್ರತಿನಿಧಿಗಳ ಜೊತೆ ಮಾತನಾಡಿದ ಅವರು, ನಿನ್ನೆ ಬ್ರಿಟನ್ ಸೇರಿದಂತೆ ವಿದೇಶದಿಂದ ಬಂದಿರುವ ಒಟ್ಟು 10 ಜನರ ಪೈಕಿ 7 ಜನರನ್ನು ತಪಾಸಣೆಗೆ ಒಳಪಡಿಸಲಾಗಿದೆ. ಇವರಲ್ಲಿ ಮೂವರು ನಾಪತ್ತೆಯಾಗಿದ್ದಾರೆ.

ವೈದ್ಯಕೀಯ ಪರೀಕ್ಷೆಯಲ್ಲಿ ಪಾಲ್ಗೊಳ್ಳದ ಇವರು ತಾವು ನೀಡಿದ ವಿಳಾಸದಲ್ಲಿ ಇಲ್ಲದಿರುವ ಕಾರಣ ನಾಪತ್ತೆಯಾಗಿದ್ದಾರೆಂದು ಪರಿಗಣಿಸಿ ಮೂವರನ್ನು ಹುಡುಕಲು ಜಿಲ್ಲಾಡಳಿತ ಪ್ರಯತ್ನಿಸುತ್ತಿದೆ. ಇತ್ತ ತಪಾಸಣೆಯಾದ ಏಳು ಜನರ ವರದಿ ಬರಲು ಇನ್ನೂ ಕೈಸೇರಿಲ್ಲ.

ನಿನ್ನೆಯವರೆಗೆ ಆಗಮಿಸಿದ್ದ 37 ಜನರ ಪೈಕಿ ನಾಪತ್ತೆಯಾಗಿದ್ದ ಒಬ್ಬ ಕಲಬುರಗಿಯಲ್ಲಿ ಪತ್ತೆಯಾಗಿದ್ದಾರೆ. ಅವರ ತಪಾಸಣೆ ಮುಗಿದಿದೆ. ಇವರ ವರದಿ ಬರಬೇಕಿದೆ ಎಂದು ಜಿಲ್ಲಾಧಿಕಾರಿ ನಿತೇಶ ಪಾಟೀಲ ಮಾಹಿತಿ ನೀಡಿದರು.