ದಾವಣಗೆರೆ: ಜೂನ್ ತಿಂಗಳಾಂತ್ಯ ಬಂದರೂ ರಾಜ್ಯದಲ್ಲಿನ್ನೂ ಮುಂಗಾರು ಮಳೆ ಚುರುಕುಕೊಂಡಿಲ್ಲ. ವರುಣ ದೇವನ ಕೃಪೆಗಾಗಿ ನಗರ ದೇವತೆ ಶ್ರೀ ದುರ್ಗಾಂಬಿಕಾ ದೇವಿಗೆ ಭಕ್ತರು ಎಡೆ ಜಾತ್ರೆ ಸಮರ್ಪಿಸುವ ಮೂಲಕ ವಿಶೇಷ ಪೂಜೆ ಸಲ್ಲಿಸಿದರು. ಸಕಾಲಕ್ಕೆ ಸರಿಯಾಗಿ ಮಳೆಯಾಗದೆ ಇರುವುದರಿಂದ ರೈತರು ಕಂಗಲಾಗಿದ್ದಾರೆ. ಈಗಾಗಲೇ ಗೊಬ್ಬರ, ಬೀತ್ತನೆ ಬೀಜ ಖರೀದಿಸಿರುವ ರೈತರು ಭೂಮಿ ಹದಗೊಳಿಸಿ ವರುಣಾಗಮನಕ್ಕೆ ಕಾಯುತ್ತಿದ್ದಾರೆ. ಆದರೆ ರಾಜ್ಯ ಮುಂಗಾರು ಪ್ರವೇಶ ವಿಳಂಬವಾಗಿದೆ. ಹೀಗಾಗಿ ಜನರು ಮಳೆಗಾಗಿ ಪ್ರಾರ್ಥಿಸಿ ನಗರ ದೇವತೆ ಶ್ರೀ ದುರ್ಗಾಂಬಿಕೆಯ ಮೊರೆ ಹೋಗಿದ್ದಾರೆ.
ಇಲ್ಲಿನ ಶಕ್ತಿ ದೇವತೆ ದುರ್ಗಾಂಬಿಕೆಗೆ ಹೋಳಿಗೆ, ಮೊಸರನ್ನ, ಕಡಬು ಸೇರಿದಂತೆ ಬಗೆಬಗೆಯ ಖಾದ್ಯಗಳನ್ನು ಸಿದ್ದಪಡಿಸಿ ನೈವೇದ್ಯ ಸಮರ್ಪಿಸಿ ಭಕ್ತರು ಎಡೆ ಜಾತ್ರೆ ಆಚರಿಸಿದರು. ಮಹಿಳೆಯರು ಹೆಚ್ಚಿನ ಸಂಖ್ಯೆ ಭಾಗವಹಿಸಿದ್ದರು. ಮಳೆ ಇಲ್ಲದೆ ಬರಗಾಲ ಉಂಟಾದ ಸಂದರ್ಭದಲ್ಲಿ ದೇವಾಲಯದ ಕಮಿಟಿಯವರು ಜಾತ್ರೆಯನ್ನು ತಲೆತಲಾಂತರಗಳಿಂದ ಮಾಡುತ್ತಾ ಬಂದಿರುವುದು ವಿಶೇಷ. ಜಾತ್ರೆ ನಡೆದ ಕೆಲವೇ ದಿನಗಳಲ್ಲಿ ಮಳೆಯಾದ ಉದಾಹರಣೆಗಳಿವೆ ಎಂದು ಇಲ್ಲಿನ ಹಿರಿಯರು ಹೇಳುತ್ತಾರೆ.
ದೇವಾಲಯದ ಧರ್ಮದರ್ಶಿ ಚನ್ನಬಸಪ್ಪ ಮಾತನಾಡಿ, "1934ರಲ್ಲಿ ದುರ್ಗಾಂಬಿಕಾ ದೇವಿಯನ್ನು ಇಲ್ಲಿ ಪ್ರತಿಸ್ಠಾಪಿಸಲಾಗಿದೆ. ಮಳೆ ಬಾರದೆ ಕಂಗಾಲಾದ ಸಂದರ್ಭದಲ್ಲಿ ದೇವಸ್ಥಾನದ ಎಲ್ಲ ಟ್ರಸ್ಟಿಗಳು ಸೇರಿ ಎಡೆ ಜಾತ್ರೆ ನಡೆಸುತ್ತಿದ್ದೇವೆ. ಜಿಲ್ಲೆಯಾದ್ಯಂತ ಭಕ್ತರು ತಮ್ಮ ಮನೆಗಳಿಂದ ಎಡೆ ಮಾಡಿಕೊಂಡು ಬಂದು ಅ ಎಡೆಯನ್ನು ದೇವರಿಗೆ ಅರ್ಪಿಸಿ ಮಳೆಯಾಗಲಿ ಎಂದು ಪ್ರಾರ್ಥನೆ ಸಲ್ಲಿಸುತ್ತಾರೆ. ಎಡೆ ಜಾತ್ರೆಯ ನಂತರವೂ ಮಳೆಯಾಗಲಿಲ್ಲ ಎಂದರೆ ಭಾನುವಾರದಿಂದ ಐದು ವಾರಗಳ ಕಾಲ ಸಂತೆ ಆಯೋಜಿಸಿ ಮಳೆಗಾಗಿ ಪೂಜೆ ಸಲ್ಲಿಸುತ್ತೇವೆ" ಎಂದು ತಿಳಿಸಿದರು.
ಭಕ್ತರಾದ ಧನಲಕ್ಷ್ಮಿ ಮಾತನಾಡಿ, "ಮಳೆಗಾಗಿ ಶ್ರೀ ದುರ್ಗಾಂಬಿಕಾ ದೇವಿಗೆ ಎಡೆ ಜಾತ್ರೆ ಮಾಡುತ್ತಿದ್ದೇವೆ. ಇಲ್ಲಿ ಪೂಜೆ ಸಲ್ಲಿಸಿದ ಎರಡು ವಾರಗಳಲ್ಲಿ ಮಳೆ ಬರುತ್ತದೆ. ಮೊಸರನ್ನ, ಹೋಳಿಗೆ ಕಡುಬು, ಬಗೆ ಬಗೆಯ ಖಾದ್ಯಗಳನ್ನು ನೈವೇದ್ಯವಾಗಿ ದೇವಿಗೆ ಎಡೆ ಇಟ್ಟು ಪ್ರಾರ್ಥಿಸುತ್ತೇವೆ" ಎಂದು ಹೇಳಿದರು.
ಇನ್ನೋರ್ವ ಭಕ್ತರಾದ ಸುಶೀಲಮ್ಮ ಮಾತನಾಡಿ, "ನಮ್ಮೂರ ಗ್ರಾಮ ದೇವತೆ ಶ್ರೀ ದುರ್ಗಾಂಬಿಕಾ ದೇವಿಗೆ ಮೊಸರನ್ನ, ಹೋಳಿ ಅಕ್ಕಿ ಬೆಲ್ಲವನ್ನು ನೈವೇದ್ಯವಾಗಿ ನೀಡಿ ಪ್ರಾರ್ಥಿಸುತ್ತೇವೆ. ಮಳೆಯಾಗಲಿಲ್ಲ ಎಂದರೆ ಐದು ವಾರಗಳ ಕಾಲ ಸಂತೆ ನಡೆಸಲಾಗುತ್ತದೆ. ಬಳಿಕ ಮಳೆಯಾಗುತ್ತದೆ ಎಂಬ ನಂಬಿಕೆ ಇದೆ" ಎಂದು ತಿಳಿಸಿದರು.
ಎಡ ಜಾತ್ರೆಗೆ ಸಾವಿರಾರು ಸಂಖ್ಯೆಯಲ್ಲಿ ಭಕ್ತರು ಆಗಮಿಸಿ ದೇವಿಗೆ ತಮ್ಮ ಮನೆಯಿಂದ ಮಾಡಿಕೊಂಡು ಬಂದಿದ್ದ ಖಾದ್ಯಗಳ ಎಡೆ ಅರ್ಪಿಸಿ ಮಳೆಗಾಗಿ ಮತ್ತು ಇಷ್ಟಾರ್ಥ ಸಿದ್ದಿಗಾಗಿ ಬೇಡಿಕೊಂಡರು.
ಇದನ್ನೂ ಓದಿ: ಏಷ್ಯಾ, ಇಂಟರ್ನ್ಯಾಷನಲ್‌ ಬುಕ್‌ ಆಫ್‌ ರೆಕಾರ್ಡ್ ಸೇರಿದ 'ವಿಷ್ಣುವರ್ಧನ್‌ ಕಟೌಟ್ ಜಾತ್ರೆ'
