ಅಮೆರಿಕಾದಲ್ಲಿರೋ ಮಗನ ನೆನದು ಭಾವುಕರಾದ ಶಾಸಕ ರೇಣುಕಾಚಾರ್ಯ

ನನ್ನ ಕುಟುಂಬದಷ್ಟೇ ಮುಖ್ಯ ಕ್ಷೇತ್ರದ ಜನರು. ಸೋಂಕಿನ ವಿರುದ್ಧ ಹೋರಾಡುವವರಿಗೆ ನಾವೆಲ್ಲ ಸಹಕರಿಸಬೇಕು. ತಬ್ಲಿಘಿ ಯಿಂದ ಬಂದವರನ್ನು ಗುಂಡಿಕ್ಕಿ ಎಂದು ಹೇಳಿದ್ದು ನೋವಿನಿಂದ ಎಂದು ಸಿಎಂ ರಾಜಕೀಯ ಕಾರ್ಯದರ್ಶಿ ಎಂ.ಪಿ.ರೇಣುಕಾಚಾರ್ಯ ಸಮರ್ಥಿಸಿಕೊಂಡರು.

ದಾವಣಗೆರೆ: ಅಮೆರಿಕದಲ್ಲಿ 3 ಲಕ್ಷ ಕೊರನಾ ಸೋಂಕಿತರಿದ್ದಾರೆ. ಅಲ್ಲಿಯೇ ನನ್ನ ಮಗ ಇರುವುದು. ಒಂದು ತಿಂಗಳಿನಿಂದ ಮನೆಯಲ್ಲಿಯೇ ಇದ್ದಾನೆ. ಸಹಜವಾಗಿದೆ ಆತಂಕ, ನೋವು ಕಾಡುತ್ತಿದೆ ಎಂದು ಸಿಎಂ ರಾಜಕೀಯ ಕಾರ್ಯದರ್ಶಿ ಎಂ.ಪಿ.ರೇಣುಕಾಚಾರ್ಯ ಭಾವುಕರಾದರು.

ನಗರದ ಜಿಲ್ಲಾ ಕಾರಾಗೃಹಕ್ಕೆ ಭೇಟಿ ನೀಡಿ, ಖೈದಿಗಳಿಗೆ ಮಾಸ್ಕ್ ಹಾಗೂ ಸ್ಯಾನಿಟೈಸರ್​ ವಿತರಿಸಿದ ಬಳಿಕ‌ ಮಾಧ್ಯಮದವರ ಜೊತೆ ಮಾತನಾಡಿದ ಅವರು, ನನಗೆ ಜನರು ಮುಖ್ಯ.‌ ನನ್ನ ಮಗನ ಪರಿಸ್ಥಿತಿ ಬಗ್ಗೆ ನನಗೂ ನೋವಿದೆ. ನನ್ನ ಖಾಸಗಿ ಬದುಕಿಗಿಂತ ಕ್ಷೇತ್ರದ ಜನರಿಗೆ ಸ್ಪಂದಿಸುವುದು ಸಹ ಅಷ್ಟೇ ಮುಖ್ಯ ಎಂದರು.

ತಬ್ಲಿಘಿ ಜಮಾತ್​ ಸಂಘಟನೆ ನಿಷೇಧ: ದೇಶಕ್ಕೆ ಮಾರಕವಾಗಿರುವ ತಬ್ಲಿಘಿ ಜಮಾತ್​ ಸಂಘಟನೆಯನ್ನು ನಿಷೇಧಿಸುವಂತೆ ಪ್ರಧಾನ ಮಂತ್ರಿ ಮೋದಿ ಹಾಗೂ ಗೃಹ ಸಚಿವ ಅಮಿತ್​ ಶಾ ಅವರಿಗೆ ಪತ್ರ ಬರದು. ಮನವಿ ಮಾಡುತ್ತೇನೆ ಎಂದರು.

ಉದ್ದೇಶ ಪೂರ್ವಕವಾಗಿ ಸೋಂಕು ಹರಡುವಂತೆ ಕೆಲ ಸಮುದಾಯ ವ್ಯಕ್ತಿಗಳು ನಡೆದುಕೊಳ್ಳುತ್ತಿದ್ದಾರೆ. ನಮಗೆ ದೇಶ ಮೊದಲು ನಂತರ ಜಾತಿ-ಧರ್ಮಗಳು. ನಮ್ಮ ಪಕ್ಷ ನಮಗೆ ಇದನ್ನು ಹೇಳಿಕೊಟ್ಟಿದೆ ಎಂದರು.

ವಿಪಕ್ಷ ನಾಯಕ ಸಿದ್ದರಾಮಯ್ಯ ವಿರುದ್ಧ ಟೀಕೆ: ಸೋಂಕು ತಡೆಗೆ ಕೆಲಸ ಮಾಡುತ್ತಿರುವವರ ಮೇಲೆ ಹಲ್ಲೆ, ದೌರ್ಜನ್ಯ ಎಸಗುವವರನ್ನು ಏನು ಮಾಡಬೇಕು? ದೇಶವನ್ನು ಕಾಡುತ್ತಿರುವ ಕೊರೊನಾ ಹಿಮ್ಮೆಟ್ಟಿಸಲು ಹಗಲು ರಾತ್ರಿ ಕಾರ್ಯನಿರ್ವಹಿಸುತ್ತಿರುವ ವೈದ್ಯರು, ಆಶಾ ಕಾರ್ಯಕರ್ತೆಯರು, ನರ್ಸ್​ಗಳ ಜೊತೆ ಕೆಲ ಕಿಡಿಗೇಡಿಗಳು ಗೌರವವಾಗಿ ನಡೆದುಕೊಂಡಿಲ್ಲ. ಅಂಥವರ ವಿರುದ್ಧ ಕಾನೂನು ಕ್ರಮ ಅನಿವಾರ್ಯ ಎಂದು ಹೇಳಿದರು.

ಇನ್ನೂ ಕೆಲವು ಕಡೆ ಕರ್ತವ್ಯ ನಿರತ ಪೊಲೀಸ್ ಸಿಬ್ಬಂದಿ ಮೇಲೆ ಹಲ್ಲೆ ನಡೆಸಿದ್ದಾರೆ. ಮೊದಲು ನಿಮ್ಮ ಪಕ್ಷದ ಶಾಸಕ ಜಮೀರ್​ ಅಹ್ಮದ್​ರನ್ನು ಉಚ್ಛಾಟನೆಗೊಳಿಸಿ ಎಂದು ವಿಪಕ್ಷ ನಾಯಕ ಸಿದ್ದರಾಮಯ್ಯ ಅವರಿಗೆ ರೇಣುಕಾಚಾರ್ಯ ತಿರುಗೇಟು ನೀಡಿದರು.

ಗುಂಡಿಕ್ಕಿ ಎಂದದ್ದು ನಿಜ: ತಬ್ಲಿಘಿ ಜಮಾತ್​ ಸಂಘಟನೆ ಮಾಡುವ ಕೃತ್ಯ ನಾನು ಸಹಿಸಲ್ಲ.‌ ನಾನು ಅಲ್ಪ ಸಂಖ್ಯಾತರ ವಿರೋಧಿ ಅಲ್ಲ. ರಾಜ್ಯದಲ್ಲಿ ಅವರು ನಡೆದುಕೊಳ್ಳುತ್ತಿರುವ ರೀತಿ ಕಂಡು ಮನಸ್ಸಿಗೆ ನೋವಾಗಿ ತಬ್ಲಿಘಿಯಿಂದ ಬಂದವರನ್ನು ಗುಂಡಿಕ್ಕಿ ಎಂದು ಹೇಳಿದ್ದು ಸತ್ಯ ಎಂದು ತಮ್ಮ ಹೇಳಿಕೆಯನ್ನು‌‌ ಸಮರ್ಥಿಸಿಕೊಂಡರು.