ಮಹಿಳಾ ಕಾಂಗ್ರೆಸ್​​​​​​ನಿಂದ 'ಇವಿಎಂ ತೊಲಗಿಸಿ' ಆಂದೋಲನ

ದಕ್ಷಿಣ ಕನ್ನಡ ಜಿಲ್ಲಾ ಮಹಿಳಾ ಕಾಂಗ್ರೆಸ್ ವತಿಯಿಂದ ಮಂಗಳೂರು ನಗರದಲ್ಲಿ 'ಇವಿಎಂ ತೊಲಗಿಸಿ ಮತ ಪತ್ರ ಬಳಸಿ' ಆಂದೋಲನ ನಡೆಸಲಾಯ್ತು.

ಮಂಗಳೂರು: ದ.ಕ. ಜಿಲ್ಲಾ ಮಹಿಳಾ ಕಾಂಗ್ರೆಸ್ ವತಿಯಿಂದ 'ಇವಿಎಂ ತೊಲಗಿಸಿ ಮತ ಪತ್ರ ಬಳಸಿ' ಆಂದೋಲನವು ಇಂದು ನಗರದ ಬಲ್ಮಠ ರಸ್ತೆಯಲ್ಲಿರುವ ಅಂಚೆ ಕಚೇರಿಯ ಮುಂಭಾಗ ನಡೆಯಿತು.

ಈ ಸಂದರ್ಭ ಮಹಿಳಾ ಕಾಂಗ್ರೆಸ್​​ನ ಸದಸ್ಯೆಯರು ಇವಿಎಂ ತೊಲಗಿಸಬೇಕೆಂದು ಪತ್ರಗಳನ್ನು‌ ಬರೆದು ಪೋಸ್ಟ್‌ ಬಾಕ್ಸ್ ಮುಖಾಂತರ ರಾಷ್ಟ್ರಪತಿ ಭವನಕ್ಕೆ ರವಾನಿಸಿದರು. ಈ ವೇಳೆ ದ.ಕ‌. ಜಿಲ್ಲಾ ಮಹಿಳಾ ಕಾಂಗ್ರೆಸ್ ಸಮಿತಿ ಅಧ್ಯಕ್ಷೆ ಶಾಲೆಟ್ ಪಿಂಟೊ ಮಾತನಾಡಿ, ದ.ಕ‌. ಜಿಲ್ಲಾ ಮಹಿಳಾ ಕಾಂಗ್ರೆಸ್​ ವತಿಯಿಂದ ಇವಿಎಂನ್ನು ತೊಲಗಿಸಿ, ಬ್ಯಾಲೆಟ್​ ಪೇಪರ್​​ ಮುಖಾಂತರವೇ ಚುನಾವಣೆ ನಡೆಸಬೇಕೆಂದು ರಾಷ್ಟ್ರಪತಿಗಳಿಗೆ ನಮ್ಮ ಬೇಡಿಕೆಗಳನ್ನು ಅಂಚೆ ಪತ್ರಗಳ ಮುಖಾಂತರ ಬರೆದು ರಾಷ್ಟ್ರಪತಿ ಭವನಕ್ಕೆ ಪೋಸ್ಟ್ ಮಾಡುತ್ತಿದ್ದೇವೆ ಎಂದ್ರು. ಇಂದು ಏಕಕಾಲದಲ್ಲಿ ಇಡೀ ಕರ್ನಾಟಕದ ಎಲ್ಲಾ ಜಿಲ್ಲೆಗಳಿಂದ ಸುಮಾರು 1 ಲಕ್ಷಕ್ಕೂ ಅಧಿಕ ಪೋಸ್ಟ್ ಕಾರ್ಡ್​ಗಳನ್ನು ರಾಷ್ಟ್ರಪತಿ ಭವನಕ್ಕೆ ಪೋಸ್ಟ್‌ ಮಾಡುತ್ತಿದ್ದೇವೆ. ಈ ದೇಶದಲ್ಲಿ ಪ್ರಜಾಪ್ರಭುತ್ವ ಉಳಿಯಬೇಕಾದರೆ ಮೊದಲಿನಿಂದ ಇರುವ ಬ್ಯಾಲೆಟ್​ ಪೇಪರ್​ ಚುನಾವಣೆಯೇ ಇರಲಿ ಎಂದು ಈ ಆಂದೋಲನ ನಡೆಸುತ್ತಿದ್ದೇವೆ ಎಂದ್ರು.

ಈ ನಮ್ಮ ಬೇಡಿಕೆಗೆ ಚುನಾವಣಾ ಆಯುಕ್ತರು, ಕೇಂದ್ರ ಸರ್ಕಾರ ಶೀಘ್ರವಾಗಿ ಸ್ಪಂದಿಸುವ ಮುಖಾಂತರ ಸೂಕ್ತ ನಿರ್ಣಯ ಕೈಗೊಳ್ಳಬೇಕು. ಇವಿಎಂ ಮೂಲಕ ಸುಲಭದಲ್ಲಿ ಮತಗಳನ್ನು ಹ್ಯಾಕ್ ಮಾಡಬಹುದು. ಮುಂದುವರಿದ ರಾಷ್ಟ್ರವಾದ ಅಮೆರಿಕ ಕೂಡ ಚುನಾವಣೆಗೆ ಇವಿಎಂ ಬಳಸದೆ ಬ್ಯಾಲೆಟ್​ ಪೇಪರ್​ ಅವಲಂಬಿಸಿದೆ. ಆದ್ದರಿಂದ ಭಾರತದಲ್ಲಿ ಸೂಕ್ತ ಅಭ್ಯರ್ಥಿ ಚುನಾವಣೆಯಲ್ಲಿ ಜಯ ಕಾಣಬೇಕಾದರೆ ಬ್ಯಾಲೆಟ್​ ಪೇಪರ್​ ಸೂಕ್ತ ಮಾರ್ಗ ಎಂದು ಪಿಂಟೊ ಹೇಳಿದ್ರು.