ಚಿಕ್ಕಮಗಳೂರು: ಆಗಾಗ್ಗೆ ದೇವಸ್ಥಾನ, ಪೂಜೆ, ಜಪ-ತಪ ಅಂತ ದೇವರುಗಳ ಮೊರೆ ಹೋಗುವ ಮುಖ್ಯಮಂತ್ರಿ ಕುಮಾರಸ್ವಾಮಿ, ಇದೀಗ ಜಿಲ್ಲೆಯ ಮತ್ತೊಂದು ದೇವರನ್ನು ಕಾಣಲು ಬರುತ್ತಿದ್ದಾರೆ ಎಂಬ ಸುದ್ದಿ ಹರಿದಾಡುತ್ತಿದೆ. ಆ ದೇವಸ್ಥಾನ ಎಲ್ಲಿದೆ? ಸಿಎಂ ಇದೇ ದೇವಸ್ಥಾನಕ್ಕೆ ಏಕೆ ಬರುತ್ತಿದ್ದಾರೆ ಅನ್ನೋದು ಮಾತ್ರ ನಿಗೂಢವಾಗಿದೆ.
ಆಗಾಗ್ಗೆ ಶೃಂಗೇರಿ ಶಾರದಾ ಪೀಠಕ್ಕೆ ಬಂದು ದೇವಿಯ ದರ್ಶನ ಪಡೆದು ಹೋಗುವ ಕುಮಾರಸ್ವಾಮಿ, ಇದೀಗ ಋಷ್ಯ ಶೃಂಗೇಶ್ವರನನ್ನು ಕಾಣಲು ಆಗಮಿಸುತ್ತಿದ್ದಾರೆ ಎಂಬ ಸುದ್ದಿ ಹರಿದಾಡುತ್ತಿದೆ. ಈವರೆಗೆ ಶಾರದಾ ಪೀಠಕ್ಕೆ ಭೇಟಿ ನೀಡಿ ವಿವಿಧ ಪೂಜೆ ಸಲ್ಲಿಸಿ ದೇವಿಯ ಕೃಪೆಗೆ ಪಾತ್ರರಾಗಿದ್ದರು. ಆದರೆ, ಇದೀಗ ಋಷ್ಯ ಶೃಂಗೇಶ್ವರನನ್ನು ದರ್ಶನಕ್ಕೆ ಬರಲು ಕಾರಣವೇನು ಅನ್ನೋದು ಮಾತ್ರ ತಿಳಿದು ಬಂದಿಲ್ಲ. ಋಷ್ಯ ಶೃಂಗೇಶ್ವರ ಸಚಿವ ಡಿ.ಕೆ. ಶಿವಕುಮಾರ್ ಅವರು ನಂಬಿದ ದೇವರು ಅನ್ನೋದು ವಿಶೇಷವಾದ್ರೆ ಇದು ಮಳೆ ತರಿಸುವ ದೇವರು ಅನ್ನೋದು ಮತ್ತೊಂದು ವಿಶೇಷ.
ಋಷ್ಯ ಶೃಂಗೇಶ್ವರನನ್ನು ಕಾಣಲು ಕಾರಣ..?
ಮಳೆ ಪ್ರಮಾಣ ಕಡಿಮೆ ಆಗಿದ್ದರಿಂದ ರಾಜ್ಯದಲ್ಲಿ ಭೀಕರ ಬರಗಾಲ ಆವರಿಸುವ ಲಕ್ಷಣಗಳು ಗೋಚರಿಸುತ್ತಿವೆ. ಹಾಗಾಗಿ ಇದರಿಂದ ಪಾರು ಮಾಡುವಂತೆ ಸಿಎಂ ಕುಮಾರಸ್ವಾಮಿ ಋಷ್ಯ ಶೃಂಗನ ಮೊರೆ ಹೋಗಲಿದ್ದಾರೆ ಎಂದು ತಿಳಿದು ಬಂದಿದೆ. ಋಷ್ಯ ಶೃಂಗ ಮಳೆ ಸುರಿಸುವ ದೇವರು ಅನ್ನೋದು ಸ್ಥಳೀಯರ ನಂಬಿಕೆ. ಈ ನಂಬಿಕೆಯಿಂದಲೇ ಕುಮಾರಸ್ವಾಮಿ ಇಲ್ಲಿಗೆ ಆಮಿಸಿ ವಿಶೇಷ ಪೂಜೆ ಸಲ್ಲಿಸಲಿದ್ದಾರೆ ಎನ್ನಲಾಗುತ್ತಿದೆ. ಅಲ್ಲದೆ ಬರ ನಿವಾರಿಸುವಂತೆ ಆ ದೇವನಲ್ಲಿ ಪ್ರಾರ್ಥನೆಯನ್ನು ಸಹ ಸಲ್ಲಿಸಲಿದ್ದಾರಂತೆ.
ಇನ್ನು ಇದೇ ರೀತಿ ನಾಡಿಗೆ ಬರ ಬಂದಾಗ ಕರ್ನಾಟಕ ಅಲ್ಲದೇ ಹಲವು ರಾಜ್ಯದ ಮುಖ್ಯಮಂತ್ರಿಗಳು ಇಲ್ಲಿಗೆ ಆಗಮಿಸಿ ಪೂಜೆ ಸಲ್ಲಿಸಿದ್ದಾರಂತೆ. ಸಚಿವ ಡಿ.ಕೆ. ಶಿವಕುಮಾರ್ ಕೂಡ ಮಳೆಗಾಗಿ ವಿಶೇಷ ಪೂಜೆ ಸಲ್ಲಿಸಿ, ಮಳೆಯಾದ ಮೇಲೆ ದೇವಸ್ಥಾನಕ್ಕೆ ತ್ರಿನೇತ್ರ ಮುಖವಾಡ ನೀಡಿ ಹರಕೆಯನ್ನು ಸಹ ತೀರಿಸಿದ್ದರು ಎಂದು ತಿಳಿದುಬಂದಿದೆ.
