ಚಾಮರಾಜನಗರ : ಒಂದು ವರ್ಷದ ಬಳಿಕ ಇಂದು ಚಾಮರಾಜನಗರ ಜಿಪಂ ಸಭಾಂಗಣದಲ್ಲಿ ಜಿಲ್ಲಾ ಉಸ್ತುವಾರಿ ಸಚಿವ ವಿ.ಸೋಮಣ್ಣ ಅಧ್ಯಕ್ಷತೆಯಲ್ಲಿ ಕೆಡಿಪಿ ಸಭೆ ನಡೆಯಿತು. ಒಂದೆಡೆ, ಅಧಿಕಾರಿಗಳಿಗೆ ಸಚಿವ ಹಿಗ್ಗಾಮುಗ್ಗಾ ತರಾಟೆಗೆ ತೆಗೆದುಕೊಂಡರೇ, ಮತ್ತೊಂದೆಡೆ ಅಧಿಕಾರಿಗಳು ನಿದ್ರೆಗೆ ಜಾರಿದ್ದರು.
ಸಭೆಯ ಆರಂಭದಲ್ಲೇ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ಅಧಿಕಾರಿಗಳನ್ನು ವೇದಿಕೆ ಬಳಿ ಕರೆಯಿಸಿಕೊಂಡ ಸಚಿವ ವಿ ಸೋಮಣ್ಣ, ಎರಡು ವರ್ಷಗಳಾದರೂ ಕೆಲಸ ಪ್ರಾರಂಭಿಸಿಲ್ಲ. ಅದಕ್ಕೇ ನಿಮ್ಮನ್ನು ಸನ್ಮಾನಿಸುತ್ತಿದ್ದೇನೆ ಎಂದು ವೇದಿಕೆ ಮುಂಭಾಗದ ಕುರ್ಚಿಯಲ್ಲಿ ಕೂರಿಸಿ ಜಾಡಿಸಿದರು.
ನೀವು ಮಾಡುವ ಕೆಲಸದಿಂದ ಶಾಸಕರು ನಿತ್ಯ ಬೈಸಿಕೊಳ್ಳುತ್ತಿದ್ದಾರೆ. ಕಳೆದ ಕೆಡಿಪಿ ಸಭೆಯಲ್ಲಿಯೂ ಕಾಮಗಾರಿ ಆರಂಭಿಸುವುದಾಗಿ ಹೇಳಿ ಈಗ ಸುಮ್ಮನಾಗಿದ್ದೀರಿ. ಕತ್ತೆ ಕಾಯಿರಿ, ಈಡಿಯಟ್ಸ್ ಎಂದು ತರಾಟೆಗೆ ತೆಗೆದುಕೊಂಡರು.
ಅಲ್ಲದೇ ಕೆಡಿಪಿ ಸಭೆಗೆ ಗೈರಾದ ಕೆ-ಶಿಪ್ ಅಧಿಕಾರಿಗೆ ಫೋನ್ ಮಾಡಿದ ಸಚಿವರು, ಸಭೆಯ ಮಾಹಿತಿ ಇದ್ದರೂ ಯಾಕೆ? ಬರಲಿಲ್ಲ ಎಂದು ಕ್ಲಾಸ್ ತೆಗೆದುಕೊಂಡರು. ಬಳಿಕ ಲೋಕೋಪಯೋಗಿ ಇಲಾಖೆ ಕಾರ್ಯದರ್ಶಿಗೆ ಕರೆ ಮಾಡಿ, ಕೆ-ಶಿಪ್ ಅಧಿಕಾರಿಗೆ ನೋಟಿಸ್ ಕೊಟ್ಟು ಸಂಜೆಯೊಳಗೆ ಅಮಾನತು ಮಾಡಬೇಕು. ಇಲ್ಲದಿದ್ದರೇ ಸದನದಲ್ಲಿ ನಾನೇ ಮಾತನಾಡಿ ಅಮಾನತು ಮಾಡಿಸುತ್ತೇನೆ ಎಂದು ಗರಂ ಆದರು.
ಬಲೆಗೆ ಸಿಲುಕಿದ ಮೀನುಗಾರಿಕಾ ಅಧಿಕಾರಿ : ಮೀನುಗಾರಿಕೆ ಇಲಾಖೆಯ ಉಪ ನಿರ್ದೇಶಕ ಗಿರೀಶ್ ತಮ್ಮ ಸಾಧನೆಯ ಬಗ್ಗೆ ಮಾತನಾಡುವಾಗ 10 ಬಲೆ ಹಾಗೂ 35 ಹರಿಗೋಲನ್ನು ಕೊಡಲಾಗಿದೆ ಎಂದು ಹೇಳುತ್ತಿದ್ದಂತೆ ಕುಪಿತಗೊಂಡ ಸಚಿವರು, ನಿಮ್ಮ ಇಲಾಖೆಯನ್ನು ಸಣ್ಣ ನೀರಾವರಿ ಇಲಾಖೆಯೊಟ್ಟಿಗೆ ಏಕೆ ವಿಲೀನ ಮಾಡಬಾರದು.
10 ಬಲೆ, 30 ಹರಿಗೋಲು ಕೊಡಲು ಲಕ್ಷ ಸಂಬಳ ತೆಗೆದುಕೊಳ್ಳುವ ಡಿಡಿ, 3 ಎಡಿಗಳು ಬೇಕೆ? ಎಂದು ಪ್ರಶ್ನಿಸಿ ಅನುದಾನ ಕೊರತೆಯಿದ್ದರೇ ಕೇಳಿ ಜನರಿಗೆ ಒಳಿತು ಮಾಡಿ ಎಂದು ಸೂಚಿಸಿದರು.
ಈಗ ಅನುಮೋದನೆಗೊಂಡಿರುವ ಒಂದು ಕೋಟಿ ರೂ. ವೆಚ್ಚದ ಗ್ರಂಥಾಲಯದ ಬದಲು 10 ಕೋಟಿ ರೂ. ವೆಚ್ಚದ ಗ್ರಂಥಾಲಯ ನಿರ್ಮಿಸಿ, ಡಿಜಿಟಲೀಕರಣ ಮಾಡಿ. ಅದಕ್ಕೆ ಬೇಕಾದ ಅನುದಾನ ಕೊಡಿಸಲಾಗುವುದು ಎಂದು ಗ್ರಂಥಾಲಯ ಅಧಿಕಾರಿಗೆ ಸಚಿವರು ಭರವಸೆ ನೀಡಿದರು. ಅಲ್ಲದೇ ಒಂದು ಜಿಲ್ಲೆ-ಒಂದು ಉತ್ಪನ್ನ ಕಾರ್ಯಕ್ರಮದಲ್ಲಿ ರಪ್ತು ಕೇಂದ್ರ ಸ್ಥಾಪನೆ ಮಾಡಲು ಕೃಷಿ ಇಲಾಖೆಯು ವ್ಯಾಪಾಕ ಪ್ರಚಾರ ಕೈಗೊಳ್ಳಬೇಕು ಎಂದು ಕೃಷಿ ಜೆಡಿಗೆ ಸೂಚಿಸಿದರು.
ನನ್ನ ವಿರೋಧದ ನಡುವೆಯೂ ಜಿಲ್ಲೆಗೆ ಬಂದಿದ್ದೀರಿ, ಚೆನ್ನಾಗಿ ಕೆಲಸ ಮಾಡಿಕೊಂಡು ಹೋಗಿ. ನಾನು ಯಾರನ್ನೂ ಟಾರ್ಗೆಟ್ ಮಾಡಲ್ಲ. ಮಾಡಿದರೇ ಶನಿ ಮಹಾತ್ಮನ ತರ ಎಂದು ನೂತನವಾಗಿ ಜಿಲ್ಲಾ ಎಸ್ಪಿಯಾಗಿರುವ ಟಿ.ಪಿ.ಶಿವಕುಮಾರ್ ಅವರಿಗೆ ಕಿವಿಮಾತು ಹೇಳಿದರು.
ನಿದ್ರೆಗೆ ಜಾರಿದ ಅಧಿಕಾರಿಗಳು : ಒಂದೆಡೆ ಸಚಿವರು, ಶಾಸಕರು, ಉನ್ನತ ಮಟ್ಟದ ಅಧಿಕಾರಿಗಳು ಗಂಭೀರವಾದ ಚರ್ಚೆಯಲ್ಲಿ ತೊಡಗಿದರೇ, ಮತ್ತೊಂದೆಡೆ ಹತ್ತಾರು ಮಂದಿ ಜಿಲ್ಲಾ ಮಟ್ಟದ ಅಧಿಕಾರಿಗಳು ಲೋಕದ ಪರಿವೇ ಇಲ್ಲದೇ ನಿದ್ರೆಗೆ ಜಾರಿದ್ದರು. ಸಚಿವರ ಅಣತಿ ದೂರದಲ್ಲಿ ಕುಳಿತವರೇ ತೂಕಡಿಸುತ್ತಿದ್ದರೇ. ಕೆಲವರು ಟೇಬಲ್ ಮೇಲೆ ಮುಖ‌ವಿಟ್ಟು ನಿದ್ರೆಸುತ್ತಿರುವುದು ಕಂಡು ಬಂದಿತು.
ಇದನ್ನೂ ಓದಿ: ಅಟ್ರಾಸಿಟಿ ಪ್ರಕರಣದಲ್ಲಿ ಶಿಕ್ಷೆ ಪ್ರಮಾಣ ಕಡಿಮೆ: ಕೇಂದ್ರ ಸಚಿವ ಎ. ನಾರಾಯಣಸ್ವಾಮಿ
