ಬೆಂಗಳೂರು: ನಿವೃತ್ತಿ ಅಂಚಿನಲ್ಲಿದ್ದ ಐವರು ಸಹಾಯಕ ಸಬ್ ಇನ್ಸ್ಪೆಕ್ಟರ್ಗಳಿಗೆ ಪಿಎಸ್ಐ ಆಗಿ ಮುಂಬಡ್ತಿ ನೀಡಿ ಪ್ರಶಂಸೆಗೆ ಒಳಗಾಗಿದ್ದ ಕರ್ನಾಟಕ ರಾಜ್ಯ ಪೊಲೀಸ್ ಮೀಸಲು ಪಡೆ (ಕೆಎಸ್ಆರ್ಪಿ), ಇದೀಗ ಜೇಷ್ಠತಾ ಆಧಾರದ ಮೇಲೆ ಇಲಾಖೆಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಸುಮಾರು 500 ಕ್ಕೂ ಅಧಿಕ ಸಿಬ್ಬಂದಿಗೆ ಮುಂಬಡ್ತಿ ನೀಡಲು ಮುಂದಾಗಿದೆ.
ಮುಂದಿನ ಮೂರು ತಿಂಗಳಲ್ಲಿ ಕೆಎಸ್ಆರ್ಪಿಯಲ್ಲಿ ನಿವೃತ್ತಿಗೆ ಒಳಗಾಗುತ್ತಿರುವ 'ಡಿ' ದರ್ಜೆ ಸಿಬ್ಬಂದಿಯಿಂದ ಹಿಡಿದು 'ಡಿವೈಎಸ್ಪಿ' ದರ್ಜೆ ಅಧಿಕಾರಿಗಳಿಗೆ ಮೊದಲ ಹಂತದಲ್ಲಿ ಬಡ್ತಿ ನೀಡಲು ಉದ್ದೇಶಿಸಲಾಗಿದೆ. ಈ ಸಂಬಂಧ ಅಸಿಸ್ಟೆಂಟ್ ರಿಸರ್ವ್ ಪೊಲೀಸ್ ಇನ್ಸ್ಪೆಕ್ಟರ್ (ಎಆರ್ಎಸ್ಐ) ದರ್ಜೆಯಿಂದ ರಿಸರ್ವ್ ಸಬ್ ಇನ್ಸ್ಪೆಕ್ಟರ್ (ಆರ್ಎಸ್ಐ) ಹುದ್ದೆಯ 52 ಮಂದಿ ಹಾಗೂ 'ಡಿ' ದರ್ಜೆಯ ಫಾಲೋವರ್ ಹುದ್ದೆಯಿಂದ, ಫಾಲೋವರ್ ಜಾಮದಾರ್ ಹುದ್ದೆಯ 65 ಮಂದಿ ಸೇರಿದಂತೆ ಒಟ್ಟು 117 ಮಂದಿಗೆ ನಾಳೆಯೇ ಬಡ್ತಿ ಭಾಗ್ಯ ಸಿಗಲಿದೆ ಎಂದು 'ಈಟಿವಿ ಭಾರತ್'ಗೆ ಉನ್ನತ ಮೂಲಗಳು ಖಚಿತಪಡಿಸಿವೆ.
ಕೆಎಸ್ಆರ್ಪಿಯ ಎಡಿಜಿಪಿ ಭಾಸ್ಕರ್ ರಾವ್ ಅವರು ಮುತುವರ್ಜಿ ವಹಿಸಿ ಕಳೆದ ಶನಿವಾರ ನಿವೃತ್ತಿಗೆ ಎರಡು ಗಂಟೆ ಇರುವಾಗಲೇ ಐದು ಮಂದಿ ಎಆರ್ಎಸ್ಐಯಿಂದ ಆರ್ಎಸ್ಐ ಆಗಿ ಮುಂಬಡ್ತಿ ನೀಡಿದ್ದರು. ಸತತ 30 ವರ್ಷಗಳ ಸುದೀರ್ಘ ಸೇವೆ ಸಲ್ಲಿಸಿದ್ದರೂ ಮುಂಬಡ್ತಿ ಸಿಕ್ಕಿರಲಿಲ್ಲ. ಸೇವಾ ಹಿರಿತನದ ಆಧಾರದ ಮೇಲೆ ಐದು ಮಂದಿ ಸಬ್ ಇನ್ಸ್ಪೆಕ್ಟರ್ ಆಗಿ ಸಂತೋಷದಿಂದಲೇ ನಿವೃತ್ತಿಯಾಗುತ್ತಿದ್ದರು. ಬಳಿಕ ಮುಂಬಡ್ತಿ ನೀಡಿ ಮತ್ತಷ್ಟು ಸಂತೋಷ ತುಂಬಿದರು. ಇಲಾಖೆಯಲ್ಲಿ ಹತ್ತಾರು ವರ್ಷಗಳಿಂದ ಸೇವೆ ಸಲ್ಲಿಸುತ್ತಿರುವ ಹಾಗೂ ಮುಂಬಡ್ತಿಗೆ ಅರ್ಹ ಸಿಬ್ಬಂದಿಗೆ ಬಡ್ತಿ ಭಾಗ್ಯ ಸಿಕ್ಕಿರಲಿಲ್ಲ. ಇದರಿಂದ ಸಿಬ್ಬಂದಿ ತೀವ್ರ ಆತಂಕಕ್ಕೆ ಒಳಗಾಗಿದ್ದರು.
ಅಲ್ಲದೆ, ಬಿ.ಕೆ.ಪವಿತ್ರ ಅರ್ಜಿ ಪ್ರಕರಣ ಹಿನ್ನೆಲೆಯಲ್ಲಿ ಸುಪ್ರೀಂಕೋರ್ಟ್ ತೀರ್ಪು ಬಡ್ತಿಗೆ ಅಡ್ಡಿಯಾಗಿ ಪರಿಣಮಿಸಿತ್ತು. ಈ ಎಲ್ಲಾ ಕಾರಣಗಳಿಂದಾಗಿ ನಿಯಾಮನುಸಾರ ಹಾಗೂ ಜೇಷ್ಠತಾ ಆಧಾರದ ಮೇಲೆ ಸಿಬ್ಬಂದಿಗೆ ಮುಂಬಡ್ತಿ ನೀಡಲು ಸಾಧ್ಯವಾಗಿರಲಿಲ್ಲ. ಸದ್ಯ ಎದುರಾಗಿದ್ದ ಸಮಸ್ಯೆಗಳು ದೂರವಾದ ಹಿನ್ನೆಲೆ 500 ಮಂದಿಗೆ ಶೀಘ್ರದಲ್ಲೇ ಬಡ್ತಿ ನೀಡಲು ಕೆಎಸ್ಆರ್ಪಿ ಉದ್ದೇಶಿಸಿದೆ.
ಬಡ್ತಿ ಪಡೆದ ಸ್ಥಳದಲ್ಲೇ ಸೇವೆ ಮುಂದುವರಿಕೆ: ನಾಳೆ ಬಡ್ತಿ ಪಡೆಯುತ್ತಿರುವ 117 ಸಿಬ್ಬಂದಿ ಹಾಗೂ ಮುಂಬರುವ ದಿನಗಳಲ್ಲಿ ಮುಂಬಡ್ತಿ ಪಡೆಯಲಿರುವ 500ಕ್ಕಿಂತ ಹೆಚ್ಚು ಮಂದಿ ನೌಕರರಿಗೆ ಬಡ್ತಿ ಸಿಗಲಿದ್ದು, ಬಡ್ತಿ ಬಳಿಕ ಬೇರೆಡೆಗೆ ವರ್ಗಾವಣೆ ಮಾಡದಂತೆ ತೀರ್ಮಾನಿಸಲಾಗಿದೆ. ಕಾರ್ಯನಿರ್ವಹಿಸುತ್ತಿರುವ ಸ್ಥಳದಲ್ಲೇ ಸೇವೆ ಮುಂದುವರಿಸುವಂತೆ ಇಲಾಖೆ ನಿರ್ಧರಿಸಿದೆ. ಇದರಿಂದ ನಿವೃತ್ತಿ ಅಂಚಿನಲ್ಲಿರುವ ನೌಕರರಿಗೆ ಬಡ್ತಿ ಸಿಹಿ ಸವಿಯಲು ಸಾಧ್ಯವಾಗಲಿದೆ ಎನ್ನುತ್ತಾರೆ ಎಡಿಜಿಪಿ ಭಾಸ್ಕರ್ ರಾವ್.
| ಬಡ್ತಿ ಪಡೆಯಲಿರುವವರು | ಸದ್ಯಕ್ಕಿರುವ ವೇತನ ಶ್ರೇಣಿ | ಬಡ್ತಿ ನಂತರ ವೇತನ ಶ್ರೇಣಿ |
| ಫಾಲೋವರ್ ಟೂ ಫಾಲೋವರ್ ಜಮದಾರ್ | 18600-32600 | 21400-42000 |
| ಎಆರ್ಎಸ್ಐಯಿಂದ ಆರ್ಎಸ್ಐ | 27650-52650 | 17900-70850 |
