ಲಾಕ್ ಡೌನ್ ಉಲ್ಲಂಘಿಸಿ ರಸ್ತೆಗಿಳಿದ ವಾಹನಗಳು ಸೀಝ್

ಲಾಕ್​ ಡೌನ್ ಉಲ್ಲಂಘಿಸಿ ಬಳ್ಳಾರಿ ನಗರದಲ್ಲಿ ಓಡಾಡ್ತಿದ್ದ ವಾಹನಗಳನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.

ಬಳ್ಳಾರಿ : ಲಾಕ್​ ಡೌನ್ ಉಲ್ಲಂಘಿಸಿ ಅನಾವಶ್ಯಕವಾಗಿ ಓಡಾಡ್ತಿದ್ದ ವಾಹನಗಳನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.

ನಗರ ಮೋತಿ ಸರ್ಕಲ್ ನಲ್ಲಿ ಕಾರ್ಯಚರಣೆ ನಡೆಸಿದ ಪೊಲೀಸರು, ವಾಹನಗಳನ್ನು ವಶಪಡಿಸಿಕೊಂಡು ಠಾಣೆಯಲ್ಲಿಟ್ಟಿದ್ದಾರೆ. ಹೀಗಾಗಿ ನಗರದ ಗಾಂಧಿ ನಗರ, ಬ್ರೂಸ್ ಪೇಟ್ ಪೊಲೀಸ್​ ಠಾಣೆ ಮತ್ತು ಸಂಚಾರಿ ಪೊಲೀಸ್ ಠಾಣೆಗಳ ಆವರಣದಲ್ಲಿ ವಾಹನ ಚಾಲಕರು ಜಮಾಯಿಸಿದ್ದರು.

ಈ ಕುರಿತು ಪ್ರತಿಕ್ರಯಿಸಿದ ಜಿಲ್ಲಾ ಪೊಲೀಸ್​ ವರಿಷ್ಟಾಧಿಕಾರಿ ಸಿ.ಕೆ ಬಾಬಾ, ಅಂತರ್​ ಜಿಲ್ಲೆ ಮತ್ತು ರಾಜ್ಯ ಗಡಿಗಳು ಸಂಪೂರ್ಣ ಬಂದ್ ಆಗಿವೆ. ಈ ನಡುವೆ ಬೆಂಗಳೂರಿನಿಂದ ನೂರಾರು ಟಾಟಾ ಸುಮೋ, ಕ್ರೂಷರ್ ವಾಹನಗಳು ನಗರದಲ್ಲಿ ಹೇಗೆ ಬಂದಿವೆ ಎಂದು ತಿಳಿಯುತ್ತಿಲ್ಲ. ವಶಪಡಿಸಿಕೊಂಡ ವಾಹನಗಳನ್ನು ಯಾವುದೇ ಕಾರಣಕ್ಕೂ ಕೊರೊನಾ ವೈರಸ್ ಮುಕ್ತಾಯವಾಗುವವರೆಗೂ ವಾಪಸ್ ನೀಡಲ್ಲ. ನಂತರ ಅದಕ್ಕೆ ದಂಡ ಕಟ್ಟಿಸಿಕೊಂಡು ಕೊಡುತ್ತೇವೆ ಎಂದರು‌.