ಬೆಳಗಾವಿ: ಮಹಾ ಮಳೆಗೆ ಜಿಲ್ಲೆಯ ಸಾವಿರಾರು ಜನರ ಬದುಕು ಕೊಚ್ಚಿಕೊಂಡು ಹೋಗಿದೆ. ಜನ ಜಾನುವಾರುಗಳ ಪರಿಸ್ಥಿತಿ ಹೇಳತೀರದಂತಾಗಿದೆ. ಜೊತೆಗೆ ನೂರಾರು ವಿದ್ಯಾರ್ಥಿಗಳ ಅಪಾರ ಪರಿಶ್ರಮವೂ ನೀರು ಪಾಲಾಗಿದೆ.
ಪ್ರವಾಹ ಕಡಿಮೆಯಾದಂತೆ ನಿತ್ಯವೂ ಒಂದೊಂದು ಸಂಕಟದ ಕಥೆಗಳು ಹೊರಬರುತ್ತಿವೆ. ಅಥಣಿ ತಾಲೂಕಿನ ದರೂರ ಗ್ರಾಮದ ಪ್ರಥಮ ಪಿಯುಸಿಯಲ್ಲಿ ವ್ಯಾಸಂಗ ಮಾಡುತ್ತಿರುವ ಮಲ್ಲಿಕ್ ಎಂಬಾತನ ಪುಸ್ತಕಗಳು ನೀರಲ್ಲಿ ನೆಂದು ಹೋಗಿವೆ. ಇದರಿಂದ ವರ್ಷವಿಡೀ ಕಷ್ಟಪಟ್ಟು ಓದಿ, ಬರೆದ ನೋಟ್ಬುಕ್ಗಳೇ ನೀರುಪಾಲಾಗಿವೆ. ಮಾರ್ಕ್ಸ್ ಕಾರ್ಡ್ಗಳು ಸಹ ನೀರಿನಲ್ಲಿ ನೆಂದಿವೆ ಎಂದು ವಿದ್ಯಾರ್ಥಿ ಅಳಲನ್ನು ತೋಡಿಕೊಂಡಿದ್ದಾನೆ.
ಸರ್...ಒಂದು ವರ್ಷದಿಂದ ಕಷ್ಟಪಟ್ಟು ಓದಿದ್ದ ಪುಸ್ತಕಗಳೆಲ್ಲ ಒದ್ದೆಯಾಗಿವೆ. ಅವು ಏನಕ್ಕೂ ಪ್ರಯೋಜನವಾಗುವುದಿಲ್ಲ. ತುಂಬಾ ನೋವಾಗುತ್ತಿದೆ ಎಂದು ಬೇಸರ ವ್ಯಕ್ತಪಡಿಸಿದ್ದಾನೆ ವಿದ್ಯಾರ್ಥಿ ಮಲ್ಲಿಕ್.
ಈ ಮಧ್ಯೆ ಇಂದು ಪದವಿಪೂರ್ವ ಮಂಡಳಿ ವಿದ್ಯಾರ್ಥಿಗಳು ಮತ್ತೆ ಹೊಸ ಮಾರ್ಕ್ ಕಾರ್ಡ್ಸ್ ಮತ್ತು ಮೂಲ ದಾಖಲಾತಿಗಳನ್ನು ಉಚಿತವಾಗಿ ಪಡೆಯಲು ಅವಕಾಶ ಕಲ್ಪಿಸಿದೆ. ಆಯಾ ಜಿಲ್ಲಾ ಡಿಡಿಪಿಯು ಕಚೇರಿಗೆ ಭೇಟಿ ನೀಡಿ ವಿದ್ಯಾರ್ಥಿಗಳು ಈ ಕುರಿತು ಅರ್ಜಿ ಸಲ್ಲಿಸಬೇಕಿದೆ.
