ಬೆಂಗಳೂರು: ಸರ್ಕಾರಿ ಕಚೇರಿಗಳಲ್ಲಿ ಸಂಘ ಸಂಸ್ಥೆಗಳ ಅಥವಾ ಖಾಸಗಿ ವ್ಯಕ್ತಿಗಳ ಫೋಟೋ ಲಗತ್ತಿಸಬಾರದು ಎಂಬ ಕಡ್ಡಾಯ ನಿಯಮವಿದೆ. ಆದ್ರೂ ಕಾನೂನುಬಾಹಿರವಾಗಿ ಆರ್ಎಸ್ಎಸ್ ಸಂಘಟನೆ ಮುಖಂಡರ ಫೋಟೋಗಳನ್ನು ಬಿಬಿಎಂಪಿ ಕಚೇರಿಯಲ್ಲಿ ಇಟ್ಟು ಪೂಜಿಸುತ್ತಿರುವ ವಿಚಾರ ಗೊತ್ತಾಗಿದೆ.
ಇತ್ತೀಚೆಗಷ್ಟೇ ಬಿಬಿಎಂಪಿಯ ಆಡಳಿತ ಪಕ್ಷದ ನಾಯಕನಾಗಿ ಆರ್ಎಸ್ಎಸ್ ಹಿನ್ನೆಲೆಯುಳ್ಳ ಜಕ್ಕೂರು ವಾರ್ಡ್ನ ಮುನೀಂದ್ರ ಕುಮಾರ್ ಅವರನ್ನು ಸಂಘದ ಸೂಚನೆ ಮೇರೆಗೆ ಆಯ್ಕೆ ಮಾಡಲಾಗಿತ್ತು. ಇಂದು ಕಚೇರಿ ಪೂಜೆ ವೇಳೆ, ದೇವರ ಫೋಟೋದೊಂದಿಗೆ ಆರ್ಎಸ್ಎಸ್ ಸಂಸ್ಥಾಪಕರಾದ ಕೆ.ಬಿ. ಹೆಡಗೆವಾರ್, ಎಮ್. ಎಸ್. ಗೋಲ್ವಾಲ್ಕರ್ ಭಾವಚಿತ್ರ ಇಟ್ಟು ಪೂಜೆ ಸಲ್ಲಿಸಲಾಗಿದೆ. ಜೊತೆಗೆ ಆರ್ಎಸ್ಎಸ್ ಸಂಘ ಪೂಜಿಸುವ ಭಾರತ ಮಾತೆಯ ಫೋಟೋ ಕೂಡಾ ಇಟ್ಟಿರುವುದು ವಿವಾದಕ್ಕೆ ಕಾರಣವಾಗಿದೆ.
ಸರ್ಕಾರಿ ಕಚೇರಿಯ‌ನ್ನು ಆರ್ಎಸ್ಎಸ್ ಕಚೇರಿಯನ್ನಾಗಿ ಪರಿವರ್ತಿಸಿದ ಕುಮಾರ್ ನಡೆಗೆ ತೀವ್ರ ವಿರೋಧ ವ್ಯಕ್ತವಾಗಿದೆ. ಇನ್ನು ಬಿಬಿಎಂಪಿಯ ಕೆಎಂಸಿ ಕಾಯ್ದೆ ಪ್ರಕಾರವೂ ಇದು ಕಾನೂನು ಬಾಹಿರವಾಗಿದೆ. ಗಾಂಧೀಜಿ, ಬಸವಣ್ಣ, ಸಿಎಂ, ಪಿಎಂ ಭಾವಚಿತ್ರಗಳನ್ನು ಬಿಟ್ಟರೆ, ಬೇರೆ ಯಾರ ಭಾವಚಿತ್ರವನ್ನೂ ಸರ್ಕಾರಿ ಕಚೇರಿಯಲ್ಲಿ ಲಗತ್ತಿಸುವ ಹಾಗಿಲ್ಲ.
ಈ ಬಗ್ಗೆ ಪ್ರತಿಕ್ರಿಯಿಸಿರುವ ಮುನೀಂದ್ರ ಕುಮಾರ್, ಗುರುಗಳಿಗೆ ವಂದನಾ ಅರ್ಪಣೆ ಹಿನ್ನೆಲೆಯಲ್ಲಿ ನಮ್ಮ ಸಂಘಟನೆಗೆ ಶಕ್ತಿ ನೀಡಿದಂತಹ ಹಾಗೂ ದಾರಿ ತೋರಿಸಿದವರ ಫೋಟೋ ಇಟ್ಟು ಪೂಜೆ ಸಲ್ಲಿಸಿದ್ದೇನೆ ಎಂದಿದ್ದಾರೆ. ಆರ್ಎಸ್ಎಸ್ ಯಾವಾಗಲೂ ರಾಜಕೀಯದಲ್ಲಿ ಬೆರೆತಿಲ್ಲ. ಸಾಮಾಜಿಕ ಚಟುವಟಿಕೆಯನ್ನೇ ನಡೆಸಿಕೊಂಡು ಬಂದಿದೆ ಎಂದು ಸಮರ್ಥಿಸಿಕೊಂಡರು.
