ಬೆಂಗಳೂರು: ಐಎಂಎ ಬಹುಕೋಟಿ ವಂಚನೆ ಪ್ರಕರಣದಲ್ಲಿ ಮಾಜಿ ಸಚಿವ ರೋಷನ್ ಬೇಗ್ ಅವರನ್ನು ಸಿಬಿಐ ಅಧಿಕಾರಿಗಳು ಭಾನುವಾರ ಬಂಧಿಸಿದ್ದು, ಸದ್ಯ ಅವರು ಬೇಗ್ ನ್ಯಾಯಾಂಗ ಬಂಧನದಲ್ಲಿದ್ದಾರೆ. ಐಷಾರಾಮಿ ಜೀವನ ಸಾಗಿಸಿದ್ದ ಬೇಗ್ ಮೊದಲ ರಾತ್ರಿಯನ್ನು ಪರಪ್ಪನ ಅಗ್ರಹಾರದಲ್ಲಿ ಸಾಮಾನ್ಯ ವಿಚಾರಣಾಧೀನ ಕೈದಿಯಂತೆ ಕಳೆದಿದ್ದಾರೆ.
ಸದ್ಯ ಅಡ್ಮಿನಿಸ್ಟ್ರೇಷನ್ ಬ್ಯಾರಕ್ ಕ್ವಾರಂಟೈನ್ ಕೇಂದ್ರದಲ್ಲಿರುವ ರೋಷನ್ ಬೇಗ್ ಮುಂದಿನ 14 ದಿನಗಳ ಕಾಲ ಕ್ವಾರಂಟೈನ್ನಲ್ಲಿ ಕಳೆಯಲಿದ್ದಾರೆ. ಜೈಲಿನ ಅಧಿಕಾರಿಗಳು ರೋಷನ್ ಬೇಗ್ ಅವರಿಗೆ ಒಂದು ಚಾದರ್, ದಿಂಬು, ಬೆಡ್ ಶೀಟ್ ನೀಡಿದ್ದಾರೆ. ಬೇಗ್ ಆರೋಗ್ಯ ಸಮಸ್ಯೆ ಹಿನ್ನೆಲೆ, ರಾತ್ರಿ ಕುಟುಂಬಸ್ಥರು ನೀಡಿದ್ದ ಬ್ರೆಡ್ ಹಾಗೂ ಕುಷ್ಕ ತಿಂದಿದ್ದಾರೆ.
ಏನಿದು ಪ್ರಕರಣ?
ಐಎಂಎ ಪ್ರಕರಣದಲ್ಲಿ ರೋಷನ್ ಬೇಗ್ ಅವರು 400ಕೋಟಿ ರೂ. ಮನ್ಸೂರ್ನಿಂದ ಪಡೆದಿರುವ ಆರೋಪ ಈತನ ಮೇಲಿದೆ. ಈ ಹಿಂದೆ ಐಎಂಎ ಮುಖ್ಯಸ್ಥ ಮನ್ಸೂರ್ ಕೂಡ ವಿಡಿಯೋ ಮೂಲಕ ರೋಷನ್ ಬೇಗ್ ಹೆಸರನ್ನು ಹೊರಹಾಕಿದ್ದರು. ಈ ಸಂಬಂಧ ಬೇಗ್ ಬಂಧಿಯಾಗಿದ್ದು, ಸಿಬಿಐ ತನಿಖೆ ಮುಂದುವರೆದಿದೆ.
ಜೈಲಲ್ಲಿ ವಾಕಿಂಗ್ ಮಾಡಿದ ರೋಷನ್ ಬೇಗ್
ವಿಚಾರಣಾಧೀನ ಖೈದಿಯಾಗಿರುವ ರೋಷನ್ ಬೇಗ್ ಮೊದಲನೇ ಬಾರಿ ಜೈಲಿನ ಉಪ್ಪಿಟ್ಟನ್ನು ಸೇವಿಸಿದ್ದಾರೆ. ತಡ ರಾತ್ರಿ ಒಂದು ಗಂಟೆಗೆ ನಿದ್ದೆಗೆ ಜಾರಿರುವ ಬೇಗ್ ಮುಂಜಾನೆ 6 ಗಂಟೆಯ ಹೊತ್ತಿಗೆ ಎದ್ದು, ಕ್ವಾರಂಟೈನ್ ಸೆಲ್ನ ಒಳಗೆ ವಾಕಿಂಗ್ ಮಾಡಿದರು.
ಕೊರೊನಾ ನಿಯಮದ ಪ್ರಕಾರ ಕ್ವಾರಂಟೈನ್ ಆಗಿರುವುದರಿಂದ ರೋಷನ್ ಬೇಗ್ ಹೊರ ಬರುವಂತಿಲ್ಲ. ಹೀಗಾಗಿ ಸೇಲ್ನ ಒಳಗೆ ವಾಕಿಂಗ್ ಮಾಡುವುದು ಅನಿವಾರ್ಯವಾಗಿದೆ. ಇನ್ನು ಬೇಗ್ ಸುಮಾರು 60 ವರ್ಷ ವಯಸ್ಸಾಗಿರುವ ಕಾರಣ ಆರೋಗ್ಯದ ದೃಷ್ಟಿಯಿಂದ ಜೈಲಿನಲ್ಲಿರುವ ಆಸ್ಪತ್ರೆಯಲ್ಲಿ ತನ್ನ ಆರೋಗ್ಯದ ಬಗ್ಗೆ ತಪಾಸಣೆ ನಡೆಸಬಹುದು.
