ಬೆಂಗಳೂರು ಡೈರಿ ಸರ್ಕಲ್​​​ ರಸ್ತೆ ಇನ್ನು ಹತ್ತು ದಿನದಲ್ಲಿ ಸಂಚಾರಕ್ಕೆ ಮುಕ್ತ

ಇಂದು ಸ್ಥಳೀಯ ಶಾಸಕ, ಮಾಜಿ ಸಚಿವ ರಾಮಲಿಂಗಾರೆಡ್ಡಿ, ಅಧಿಕಾರಿಗಳ ಜೊತೆ ಬೆಂಗಳೂರು ಡೈರಿ ಸರ್ಕಲ್ ರಸ್ತೆಯ ಕಾಮಗಾರಿ ಪರಿಶೀಲನೆ ನಡೆಸಿದರು.

ಬೆಂಗಳೂರು: ಆಮೆಗತಿಯಲ್ಲಿದ್ದ ಡೈರಿ ಸರ್ಕಲ್ ವೈಟ್ ಟಾಪಿಂಗ್ ಕಾಮಗಾರಿ ಹತ್ತು ದಿನದಲ್ಲಿ ಪೂರ್ಣಗೊಳ್ಳಲಿದೆ. ಆದರೆ ಮತ್ತೆ ಟ್ರಾಫಿಕ್ ಜಾಂ ಸಮಸ್ಯೆ ಬಿಗಡಾಯಿಸಲಿದೆ. ಯಾಕಂದ್ರೆ ಇದೇ ರಸ್ತೆಯ ಮತ್ತೊಂದು ಪಾರ್ಶ್ವದ ಕ್ರೈಸ್ಟ್ ಕಾಲೇಜು ರಸ್ತೆಯಲ್ಲಿ ವೈಟ್ ಟಾಪಿಂಗ್ ನಡೆಯಲಿದೆ.

ಹೌದು, ಇಂದು ಸ್ಥಳೀಯ ಶಾಸಕ, ಮಾಜಿ ಸಚಿವ ರಾಮಲಿಂಗಾರೆಡ್ಡಿ ಅಧಿಕಾರಿಗಳ ಜೊತೆ ರಸ್ತೆ ಕಾಮಗಾರಿ ಪರಿಶೀಲನೆ ನಡೆಸಿದರು. ಡೈರಿ ಸರ್ಕಲ್​​ನಿಂದ ಚೆಕ್ ಪೋಸ್ಟ್​​ವರೆಗೆ 1.2 ಕಿ.ಮೀ. ರಸ್ತೆಯ ವೈಟ್ ಟಾಪಿಂಗ್ ಮುಗಿದಿದ್ದು, ಇನ್ನೊಂದು ಪಾರ್ಶ್ವದ ರಸ್ತೆ ಕಾಮಗಾರಿಗೆ ಪೊಲೀಸ್ ಇಲಾಖೆಯ ಅನುಮತಿಯೂ ಸಿಕ್ಕಿದೆ. ರಸ್ತೆಯ ಫುಟ್​​​ಪಾತ್ ಕಾಮಗಾರಿ ಹಾಗೂ ಜಲಮಂಡಳಿಯ ಪೈಪ್ ಲೈನ್ ಕಾಮಗಾರಿಗಳು ಬಾಕಿ ಇದ್ದು, ಇನ್ನು ಕೆಲ ದಿನಗಳಲ್ಲಿ ಪೂರ್ಣಗೊಳಿಸುವುದಾಗಿ ಅಧಿಕಾರಿಗಳು ಮಾಹಿತಿ ನೀಡಿದರು.

ನಂತರ ಈಜಿಪುರದಲ್ಲಿದ್ದ ಹಳೆಯ ಟಾರ್ ಪ್ಲಾಂಟ್​ಗೆ ರಾಮಲಿಂಗಾರೆಡ್ಡಿ ಭೇಟಿ ನೀಡಿ ಅಭಿವೃದ್ಧಿ ಕಾಮಗಾರಿಗಳ ಪರಿಶೀಲನೆ ನಡೆಸಿದರು. ಈಜೀಪುರ ವಾರ್ಡ್​ನ ಸಿಎ ಸೈಟ್ ಎರಡು ಎಕರೆ ಜಾಗದಲ್ಲಿ ಆಸ್ಪತ್ರೆ, ಮಕ್ಕಳ ಆಟದ ಮೈದಾನ, ಕೆಇಬಿ, ಜಲಮಂಡಳಿ ಕಚೇರಿ ನಿರ್ಮಾಣ ಸ್ಥಳದ ಪರಿಶೀಲನೆ ನಡೆಸಿದರು.

ಬಳಿಕ ಮಾತನಾಡಿದ ಮಾಜಿ ಸಚಿವ ರಾಮಲಿಂಗಾರೆಡ್ಡಿ, ಕಾಂಕ್ರೀಟ್ ಕೆಲಸ ಮುಗಿದಿದ್ದು, ಇನ್ನೊಂದಿಷ್ಟು ಕೆಲಸ ಬಾಕಿ ಇದೆ. ಎಂಟತ್ತು ದಿನದಲ್ಲಿ ಕೆಲಸ ಮುಗಿಯಲಿದೆ. ಇನ್ನು ಎರಡು ತಿಂಗಳಲ್ಲಿ ಎರಡೂ ಭಾಗದ ಕೆಲಸ ಸಂಪೂರ್ಣವಾಗಲಿದೆ ಎಂದರು.