ಆನೇಕಲ್ : ಬಾರ್ನಲ್ಲಿ ಕೆಲಸಕ್ಕೆ ಬಳಸಿಕೊಂಡಿದ್ದ ಇಬ್ಬರು ಬಾಲ ಕಾರ್ಮಿಕರನ್ನು ರಕ್ಷಣೆ ಮಾಡಿರುವ ಘಟನೆ ಆನೇಕಲ್ ತಾಲೂಕಿನಲ್ಲಿ ನಡೆದಿದೆ.
ಬಾಲ ಕಾರ್ಮಿಕರು ಸೇಫ್
ಚಂದಾಪುರ ರಸ್ತೆಯ ಆವಡದೇನಹಳ್ಳಿ ಗೋಪಾಲ್ ಎಂಬುವವರ ಬಾರಿನಲ್ಲಿ ಕೆಲಸ ನಿರ್ವಹಿಸುತ್ತಿದ್ದ ಬಾಲಕರನ್ನು ಕಾರ್ಮಿಕ ಇಲಾಖೆ - ಚೈಲ್ಡ್ ಹೆಲ್ಪ್ ಲೈನ್ ಮತ್ತು ಆನೇಕಲ್ ಪೊಲೀಸರು ಸೇರಿಕೊಂಡು, ಸಾರ್ವಜನಿಕರ ಖಚಿತ ಮಾಹಿತಿ ಮೇರೆಗೆ ದಿಢೀರ್ ದಾಳಿ ನಡೆಸಿ ರಕ್ಷಿಸಿದ್ದಾರೆ.
ನಿಖರ ಮಾಹಿತಿಯ ಬೆನ್ನೇರಿದ ಇಲಾಖೆಯವರು ಮಕ್ಕಳನ್ನು ರಕ್ಷಿಸಿ ಆನೇಕಲ್ ಪೊಲೀಸ್ ಠಾಣೆಗೆ ಕರೆತಂದರು. ನಂತರ ಬೆಂಗಳೂರಿನ ಸರ್ಕಾರಿ ಬಾಲಕರ ಬಾಲ ಮಂದಿರಕ್ಕೆ ಬಾಲಕರನ್ನು ಒಪ್ಪಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಇನ್ನು ಬಾಲಕಾರ್ಮಿಕ ಮತ್ತು ಶಿಶು ಕಾರ್ಮಿಕರ ಹಕ್ಕು ಕಸಿದ ಪ್ರಕರಣಕ್ಕೆ ಸಂಬಂಧಿಸಿದ ಮಾಲಿಕರ ಮೇಲೆ ದೂರು ದಾಖಲಿಸಲಾಗಿದೆ.
