ಬೆಂಗಳೂರು: ಸಂಶಯಾಸ್ಪದ ವ್ಯಕ್ತಿಯನ್ನು ಹಿಡಿದು ವಿಚಾರಣೆ ನಡೆಸಿ, ಅವನ ಬಳಿಯಿದ್ದ ಬ್ಯಾಗ್ ಚೆಕ್ ಮಾಡಿದ ಪೊಲೀಸರಿಗೆ ಆಶ್ಚರ್ಯ ಮೂಡಿಸುವ ಘಟನೆಯೊಂದು ನಗರದ ಕೊಡಿಗೇಹಳ್ಳಿ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ.
ಇಂದು ಮುಂಜಾನೆ ಬೀಟ್ ಪೊಲೀಸರು ಗಸ್ತು ನಡೆಸುತ್ತಿದ್ದ ವೇಳೆ, ಹೆಬ್ಬಾಳ ಫ್ಲೇ ಓವರ್ ಕೆಳ ಭಾಗದಲ್ಲಿರುವ ರಿಂಗ್ ರೋಡ್ ಬಳಿ ಅನುಮಾನ ಬರುವಂತೆ ನಡೆದುಕೊಂಡು ಹೋಗುತ್ತಿದ್ದ ಆರೋಪಿ ಇಮ್ರಾನ್ ಖಾನ್ ಅಲಿಯಾಸ್ ಇಲಿಯಾಸ್ ಖಾನ್ನನ್ನು ಬೀಟ್ ಪೊಲೀಸರು ವಶಕ್ಕೆ ಪಡೆದು, ಅವನನ್ನು ವಿಚಾರಣೆ ನಡೆಸಿ, ಅವನ ಬಳಿಯಿದ್ದ ಬ್ಯಾಗ್ ಪರಿಶೀಲನೆ ಮಾಡಿದಾಗ ಬಳಿ ಬೆಲೆಬಾಳುವ ಹಲವಾರು ಮೊಬೈಲ್ ಫೋನ್ಗಳು ಪತ್ತೆಯಾಗಿದೆ.
ಇನ್ನು ತನಿಖೆ ವೇಳೆ ಆರೋಪಿ ಸ್ನೇಹಿತರ ಜೊತೆ ಸೇರಿಕೊಂಡು ನಗರದ ವಿವಿಧ ಬಿಎಂಟಿಸಿ ಬಸ್ಗಳಲ್ಲಿ ಪ್ರಯಾಣಿಕರ ಸೋಗಿನಲ್ಲಿ ಪ್ರಯಾಣ ಮಾಡಿ ಇತರ ಪ್ರಯಾಣಿಕರ ಮೊಬೈಲ್ಗಳನ್ನು ಕಳ್ಳತನ ಮಾಡಿ, ನಂತರ ಒಂದು ಕಡೆ ಸಂಗ್ರಹಿಸಿಟ್ಟು ಅವುಗಳನ್ನು ಒಮ್ಮೆಗೆ ಹೈದರಾಬಾದ್ ತೆಗೆದುಕೊಂಡು ಹೋಗಿ ಅಲ್ಲಿ ಮಾರಾಟ ಮಾಡಲು ತೆರಳ್ತಿದ್ದಾಗ ಆರೋಪಿ ತಪ್ಪೊಪ್ಪಿಕೊಂಡಿದ್ದಾನೆ.
ಸದ್ಯ ಆರೋಪಿಯ ಬಳಿಯಿಂದ ವಿವೋ, ಓಪ್ಪೋ, ರೆಡ್ ಮಿ, ಸ್ಯಾಮ್ಸಂಗ್ ಸೇರಿದಂತೆ ಇತರ ಬ್ರ್ಯಾಂಡ್ನ 109 ಮೊಬೈಲ್ ಫೋನ್ಗಳನ್ನು ಪೊಲೀಸರು ವಶಪಡಿಸಿಕೊಂಡು ತನಿಖೆ ಮುಂದುವರೆಸಿದ್ದಾರೆ. ಹಾಗೇ ಈತನ ಜಾಲ ದೊಡ್ಡ ಮಟ್ಟದಲ್ಲಿರುವಂತೆ ಕಾಣುವುದರಿಂದ ಉಳಿದ ಆರೋಪಿಗಳಿಗೂ ಹುಡುಕಾಟ ನಡೆಸುತ್ತಿದ್ದಾರೆ.
