ಬೆಂಗಳೂರು: ಸ್ಯಾಂಡಲ್ವುಡ್ ಡ್ರಗ್ಸ್ ದಂಧೆ ಬಗ್ಗೆ ನಿರ್ದೇಶಕ ಇಂದ್ರಜಿತ್ ವಿಚಾರಣೆಯನ್ನು ಸಿಸಿಬಿ ಪೊಲೀಸರು ಕಳೆದ ಕೆಲ ಗಂಟೆಗಳಿಂದ ನಡೆಸುತ್ತಿದ್ದಾರೆ. ಸದ್ಯ ಸಿಸಿಬಿಯ ಹೆಚ್ಚುವರಿ ಪೊಲೀಸ್ ಆಯುಕ್ತ ಸಂದೀಪ್ ಪಾಟೀಲ್ ಅವರು ಕೂಡ ಸಿಸಿಬಿ ಕಚೇರಿಗೆ ಆಗಮಿಸಿ ವಿಚಾರಣೆ ನಡೆಸಿದ್ದಾರೆ.
ಈಗಾಗಲೇ ಇಂದ್ರಜಿತ್ ಲಂಕೇಶ್ ಅವರ ವಿಚಾರಣೆಯನ್ನು ಎಸಿಪಿ ಗೌತಮ್ ಹಾಗೂ ಇನ್ಸ್ಪೆಕ್ಟರ್ ಬೋಳೆತ್ತಿನ್ ನಡೆಸುತ್ತಿದ್ದು, ಪ್ರಾಥಮಿಕವಾಗಿ ಇಂದ್ರಜಿತ್ ಲಂಕೇಶ್ ಬಳಿ ಇರುವ ಕೆಲ ದಾಖಲೆಗಳನ್ನು ಸಂದೀಪ್ ಪಾಟೀಲ್ ಪಡೆಯುವ ಸಾಧ್ಯತೆಯಿದೆ.
ಹಾಗೆ ನಗರದ ಐಷಾರಾಮಿ ಅಪಾರ್ಟ್ಮೆಂಟ್ವೊಂದರಲ್ಲಿ ನಟ ನಟಿಯರು ಭಾಗಿಯಾಗುತ್ತಿದ್ದ ಬಗ್ಗೆ ಪ್ರಾಥಮಿಕವಾಗಿ ಇಂದ್ರಜಿತ್ ಮಾಹಿತಿ ನೀಡಿದ್ದು, ಸದ್ಯ ಅದರ ಆಧಾರದ ಮೇರೆಗೆ ತನಿಖೆ ಮುಂದುವರೆದಿದೆ.
ಲಂಕೇಶ್ ವಿಚಾರಣೆ ಬಹುತೇಕ ಮುಕ್ತಾಯ ಹಂತಕ್ಕೆ
ಬೆಳಗ್ಗೆಯಿಂದ ಇನ್ಸ್ಪೆಕ್ಟರ್ ಹಾಗೂ ಎಸಿಪಿ ಅವರು ಇಂದ್ರಜಿತ್ ಅವರಿಂದ ಪಡೆದಿರುವ ಮಾಹಿತಿಯನ್ನು ಸಂದೀಪ್ ಪಾಟೀಲ್ಗೆ ವಿವರಿಸಿದ್ದಾರೆ. ವಿಚಾರಣೆ ಮುಗಿಯುವ ಹಂತ ತಲುಪಿದ್ದು, ಮುಂದಿನ ಕ್ರಮದ ಬಗ್ಗೆ ಸಂದೀಪ್ ಪಾಟೀಲ್ ಅವರೊಂದಿಗೆ ಮಾತುಕತೆ ನಡೆಸಲಾಗುತ್ತಿದೆ. ಈಗಾಗಲೇ ಇಂದ್ರಜಿತ್ ಹೇಳಿಕೆಯ ದಾಖಲೆಗಳಿಗೆ ಸಿಸಿಬಿ ಪೊಲೀಸರು ಸಹಿ ಪಡೆದಿದ್ದಾರೆ ಎಂದು ತಿಳಿದುಬಂದಿದೆ.
