ಬೆಂಗಳೂರು: ಮುಂಜಾನೆ ಆಗುತ್ತಿದ್ದಂತೆ ದೇವಾಲಯಗಳಿಗೆ ಭಕ್ತರ ದಂಡೇ ಹರಿದು ಬರುತ್ತಿತ್ತು. ದೇವರಿಗೆ ವಿಶೇಷ ಪೂಜೆ ಕೈಂಕರ್ಯಗಳು ಸಲ್ಲಿಸುತ್ತಿದ್ದರು. ಆದ್ರೆ ಮಹಾಮಾರಿ ಕೋವಿಡ್ ಬಂದ ನಂತರ ಬಹುತೇಕರ ಮನಸ್ಥಿತಿ ಬದಲಾಗಿದೆ. ಸರ್ಕಾರ ಲಾಕ್‌ಡೌನ್‌ ಸಡಿಲಿಕೆ ಮಾಡಿ ದೇವಾಲಯಗಳಿಗೆ ಪ್ರವೇಶ ನೀಡಿದರೂ ಭಕ್ತರ ಸಂಖ್ಯೆಯಲ್ಲಿ ಗಣನೀಯವಾಗಿ ಇಳಿಕೆಯಾಗಿದೆ ಎನ್ನಲಾಗುತ್ತಿದೆ.
ಸಿಲಿಕಾನ್‌ ಸಿಟಿ ಬೆಂಗಳೂರಿನ ದೇವಸ್ಥಾನಗಳಲ್ಲಿ ನಿತ್ಯ ನೂರಾರು ಮಂದಿ ಭಕ್ತರು ದೇವಾಲಯಗಳಿಗೆ ಭೇಟಿ ನೀಡಿ ಪೂಜೆ ಪುನಸ್ಕಾರಗಳನ್ನು ಮಾಡುತ್ತಿದ್ದರು. ಆದರೆ, ಇದೀಗ ಕೆೊರೊನಾ ಈ ಚಿತ್ರಣವನ್ನು ಬದಲಾಯಿಸಿದೆ. ನಗರದ ಇಸ್ಕಾನ್ ದೇವಾಲಯ ಹೊರತುಪಡಿಸಿ ಉಳಿದೆಲ್ಲ ಪ್ರಸಿದ್ಧ ದೇವಸ್ಥಾನಗಳು ಬಾಗಿಲು ತೆರೆದಿದ್ದರೂ ಭಕ್ತರ ಕೋವಿಡ್ ಭಯದಿಂದ ದೇವಸ್ಥಾನಗಳತ್ತ ಮುಖ ಮಾಡ್ತಿಲ್ಲ.
ಜೂನ್ ಎಂಟರಿಂದ ದೇವರ ದರ್ಶನ ಆರಂಭವಾಗಿದೆ. ಮಲ್ಲೇಶ್ವರಂನ ಕಾಡು ಮಲ್ಲೇಶ್ವರ ದೇವಸ್ಥಾನ, ದೊಡ್ಡಗಣಪತಿ ದೇವಸ್ಥಾನ, ಬನಶಂಕರಿ ದೇವಾಲಯಗಳಲ್ಲೂ ನಿತ್ಯ ಪೂಜೆ ನಡೆಯುತ್ತಿದೆ. ಆದ್ರೆ ಭಕ್ತರು ಮಾತ್ರ ಹಿಂದಿನಂತೆ ಇಲ್ಲ. ಕೇವಲ ಹತ್ತು ಇಪ್ಪತ್ತು ಮಂದಿ ಮಾತ್ರ ಬೆಳಗಿನ ಜಾವ ಹಾಗೂ ಸಂಜೆಯೊಳಗೆ ನೂರಕ್ಕಿಂತ ಕಡಿಮೆ ಭಕ್ತರು ಬರುತ್ತಿದ್ದಾರೆ ಕಾಡು ಮಲ್ಲೇಶ್ವರ ದೇವಸ್ಥಾನದ ಪ್ರಧಾನ ಅರ್ಚಕರಾದ ಗಂಗಾಧರ ಅವರು.
ಸಾವಿರಾರು ಮಂದಿ ಬರುತ್ತಿದ್ದ ದೇವಾಲಯಕ್ಕೆ ಈಗ ಬೆರಳೆಣಿಕೆ ಜನ ಬಂದು ದೇವರ ದರ್ಶನ ಪಡೆದು ಹೋಗುತ್ತಿದ್ದಾರೆ. ನಗರದಲ್ಲಿ ನಿತ್ಯ 40ಕ್ಕೂ ಹೆಚ್ಚು ಕೋವಿಡ್ ಪಾಸಿಟಿವ್ ಕೇಸ್‌ಗಳು ಕಂಡುಬರುತ್ತಿವೆ. ಮನೆಯಿಂದ ಹೊರಬಂದ್ರೆ , ಸಾರ್ವಜನಿಕ ಸ್ಥಳಗಳಲ್ಲಿ ಓಡಾಟ ಮಾಡಿದ್ರೆ ಕೋವಿಡ್ ಹರಡುವ ಭೀತಿ ಇದೆ. ಹೀಗಾಗಿ ಜನ ಅನಿವಾರ್ಯವಾಗಿ ಕಚೇರಿ ಮತ್ತು ಮನೆಗಷ್ಟೇ ಸೀಮಿತವಾಗುತ್ತಿದ್ದಾರೆ.
ಬನಶಂಕರಿ ದೇವಾಲಯದಲ್ಲಿ ನಿಂಬೆಹಣ್ಣಿನ ದೀಪ ಹಚ್ಚುವ ಸಂಪ್ರದಾಯವನ್ನೂ ನಿಲ್ಲಿಸಲಾಗಿದೆ. ಕೇವಲ ಕೈ ಮುಗಿದು ಹೋಗಬೇಕು. ಪೂಜೆ ಮಾಡಿಸುವಂತಿಲ್ಲ. ಹೂವು, ಹಣ್ಣು, ಮೊಸರು ಸಮರ್ಪಿಸುವ ಹಾಗಿಲ್ಲ. ದೇವಾಲಯದ ಗರ್ಭಗುಡಿಗೆ ಪ್ರದಕ್ಷಿಣೆ ಮಾಡುವ ಹಾಗಿಲ್ಲ. ಆಂಜನೇಯ, ಗಣಪತಿ ಗುಡಿಗಳಲ್ಲೂ ಮುಟ್ಟಿ ನಮಸ್ಕರಿಸುವ ಹಾಗಿಲ್ಲ. ತೀರ್ಥ, ಪ್ರಸಾದವೂ ಇಲ್ಲದ ಕಾರಣ ಭಕ್ತರ ಸಂಖ್ಯೆ ಕಡಿಮೆಯಾಗಿರಬಹುದು ಎಂದು ಸ್ಥಳೀಯರು ತಿಳಿಸುತ್ತಾರೆ.
ಎಲ್ಲ ದೇವಾಲಯಗಳಲ್ಲೂ ಮಾಸ್ಕ್‌, ಸ್ಯಾನಿಟೈಸರ್‌, ಥರ್ಮಲ್‌ ಸ್ಕ್ಯಾನಿಂಗ್‌ ಸೇರಿದಂತೆ ಮುಂಜಾಗ್ರತಾ ಕ್ರಮಗಳನ್ನು ಕೈಗೊಳ್ಳಲಾಗಿದೆ. ಆದ್ರೂ ಕೂಡ ಭಕ್ತರು ದೇವಾಲಯಗಳಿಗೆ ಬರಲು ಹಿಂದೇಟು ಹಾಕುತ್ತಿದ್ದಾರೆ.
