ಬೆಂಗಳೂರು: ಲೋಕಸಭಾ ಚುನಾವಣೆ ಹಿನ್ನೆಲೆಯಲ್ಲಿ ಅಕ್ರಮ ಚಟುವಟಿಕೆಗಳಿಗೆ ಬ್ರೇಕ್ ಹಾಕುವ ಉದ್ದೇಶದಿಂದ ಮಟ ಮಟ ಮಧ್ಯಾಹ್ನವೇ ಸಿಸಿಬಿ ಎಡಿಜಿಪಿ ಅಲೋಕ್ ಕುಮಾರ್ ಸಿಟಿ ರೌಡಿಗಳಿಗೆ ಬೆಂಡೆತ್ತಿದ್ದಾರೆ.
ಸೈಲೆಂಟ್ ಸುನೀಲ, ಡಬಲ್ ಮೀಟರ್ ಮೋಹನ, ಕುಣಿಗಲ್ ಗಿರಿ, ಕೋತಿ ರಾಮ, ಮಾರ್ಕೆಟ್ ವೇಲು, ಗುಬ್ಬಚ್ಚಿ ಸೀನ, ವಿಲ್ಸನ್ ಗಾರ್ಡನ್, ಸಿಡಿ ನರಸಿಂಹ, ತಿಮ್ಮೇಶ ಹೀಗೆ ಸಿಟಿಯ ಪ್ರಮುಖ ರೌಡಿಗಳಿಗೆ ಸಿಸಿಬಿ ಅಧಿಕಾರಿ ಅಲೋಕ್ ಕುಮಾರ್ ಇಂದು ಬೆವರಿಸಿಳಿಸಿದ್ದಾರೆ.
ರೌಡಿಗಳಿಗೆ ತಮ್ಮ ಆ್ಯಕ್ಟಿವಿಟೀಸ್ಗೆ ಕೂಡಲೇ ಬ್ರೇಕ್ ಹಾಕಲು ವಾರ್ನ್ ಮಾಡಿದರು. ಅಲ್ಲದೆ ಕೆಲ ರೌಡಿಗಳ ಅವತಾರ ಕಂಡು ಕೆಂಡಾಮಂಡಲರಾದ ಅಲೋಕ್ ಕುಮಾರ್, ಶೋಕಿ ಮಾಡೋ ಗ್ಲಾಸ್ ಹಾಕೋತೀಯಾ? ಬಳೆ ಹಾಕೋತೀಯಾ? ಅಂತ ಆವಾಜ್ ಹಾಕಿದ್ದಾರೆ. ಈ ರೀತಿ ನಾಯಿಗಳ ಹಾಗೆ ತಲೆ ಕೂದಲು ಬಿಟ್ರೆ ಹುಷಾರ್ ಎಂದು ಎಚ್ಚರಿಸಿದ್ದಲ್ಲದೆ, ಎಲ್ಲರೂ ಕೂದಲು ಕಟ್ ಮಾಡಿ ವಾಟ್ಸಪ್ನಲ್ಲಿ ತಮ್ಮ ಫೋಟೋ ಕಳಿಸಬೇಕು ಎಂದು ಸೂಚಿಸಿದರು.
ಚುನಾವಣೆಯಲ್ಲಿ ಬಾಲ ಬಿಚ್ಚಿದ್ರೆ ಹುಷಾರ್ ಎಂದು ವಾರ್ನ್ ಮಾಡಿದ್ದಾರೆ. ಇದೆಲ್ಲದರ ನಡುವೆ ಅಲೋಕ್ ಕುಮಾರ್ ಕೋಪಕ್ಕೆ ಮತ್ತಷ್ಟು ತುಪ್ಪ ಸುರಿದಿದ್ದು ಸೈಲೆಂಟ್ ಸುನೀಲ್ ಹಾಗೂ ಕುಣಿಗಲ್ ಗಿರಿ. ಈಗಾಗಲೇ ನಾನಾ ಕೇಸಲ್ಲಿ ಅಂದರ್ ಆಗಿ ಹೊರ ಬಂದಿರುವ ಕುಣಿಗಲ್ ಗಿರಿ ಹಾಗೂ ಸೈಲೆಂಟ್ ಸುನೀಲ ತಮ್ಮ ಹಳೆ ಚಾಳಿ ಮುಂದುವರೆಸಿ ತಾವು ಮಾಡೋ ಕೆಲಸ ಪೊಲೀಸರಿಗೆ ಗೊತ್ತಾಗಲ್ಲ ಅಂದುಕೊಂಡಿದ್ರು. ಆದ್ರೆ ಮುಖ ನೋಡ್ತಿದ್ದಂತೆ ಅಲೋಕ್ ಕುಮಾರ್ ಜಾಲಾಡಿದ್ರು.
ಅಷ್ಟೆಲ್ಲಾ ಬೈತಿದ್ರು ಅಲೋಕ್ ಕುಮಾರ್ ಅವರನ್ನು ಗುರಾಯಿಸುತ್ತಿದ್ದ ಸೈಲೆಂಟ್ ಸುನೀಲನನ್ನು ಕಂಡು ಗರಂ ಆದ ಅಲೋಕ್ ಕುಮಾರ್, ನನ್ನೇ ಗುರಾಯಿಸ್ತೀಯಾ? ಸರಿಯಾಗಿ ನಿಂತ್ಕೊ ಅಂದ್ರೂ ಕ್ಯಾರೆ ಅನ್ನದ ಸುನೀಲನ ಕಂಡು ಕೆಂಡಾಮಂಡಲವಾದ ಅಲೋಕ್ ಕುಮಾರ್, ಅರೆಸ್ಟ್ ಮಾಡಿ ಇವನ ಹಳೆ ಕೇಸ್ಗಳನ್ನ ರೀ ಓಪನ್ ಮಾಡುವಂತೆ ಹೇಳಿದ್ರು.
ಒಟ್ಟಿನಲ್ಲಿ ಲೋಕಸಭಾ ಚುನಾವಣೆಗೆ ಯಾವುದೇ ಅಹಿತಕರ ಘಟನೆ ರೌಡಿಗಳಿಂದ ನಡೆಯಬಾರದು ಅನ್ನೋ ನಿಟ್ಟಿನಲ್ಲಿ ಸಿಸಿಬಿ ಪೊಲೀಸರು ರೌಡಿಗಳಿಗೆ ಸರಿಯಾಗಿ ಕ್ಲಾಸ್ ತೆಗೆದುಕೊಂಡಿದ್ದಾರೆ.
