ಬೆಂಗಳೂರು: ಕಳೆದ ಮೂರು ವರ್ಷಗಳಿಂದ ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ 79 ವರ್ಷದ ವೃದ್ಧನೋರ್ವ ವಿವಿಧ ಬಗ್ಗೆ ಸಸಿಗಳನ್ನಿಟ್ಟು ಮಾರಾಟ ಮಾಡ್ತಿದ್ದ. ಕಳೆದ ಮೂರು ದಿನಗಳ ಹಿಂದೆ ಈತನ ಫೋಟೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿತ್ತು. ಇದೀಗ ಆತನಿಗೆ ಸ್ಥಳೀಯರಿಂದ ಸಹಾಯ ಒದಗಿ ಬಂದಿದೆ.
ಬೆಂಗಳೂರಿನ ಜೆ.ಪಿ. ನಗರದ ಕನಕಪುರ ರಸ್ತೆಯ ಸಾರಕ್ಕಿ ಸಿಗ್ನಲ್ ಬಳಿ ವೃದ್ಧ ರೇವಣಸಿದ್ದಪ್ಪ ಸಸಿ ಮಾರಾಟ ಮಾಡುತ್ತಿದ್ದ. ಪ್ರತಿ ಸಸಿವೊಂದಕ್ಕೆ 10ರಿಂದ 30ರೂ.ವರೆಗೆ ಮಾರುತ್ತಿದ್ದ. ಈ ವೃದ್ಧನ ಬಗ್ಗೆ ಐಂ ಶುಭಂ ಎಂಬುವರು ತಮ್ಮ ಟ್ವಿಟರ್ ಖಾತೆಯಲ್ಲಿ ಫೋಟೋ ಟ್ವೀಟ್ ಮಾಡಿದ್ದರು. ಜೊತೆಗೆ ಇವರಿಗೆ ಸಹಾಯ ಮಾಡಿ ಎಂದು ಬಾಲಿವುಡ್ ನಟ ಸೋನು ಸೂದ್, ಮಾಧವನ್, ಕಾಂಚನಾ ಗುಪ್ತ ಹಾಗೂ ಪ್ರವೀಣ್ ಕಸ್ವನ್ ಎಂಬುವರಿಗೆ ಟ್ಯಾಗ್ ಮಾಡಲಾಗಿತ್ತು.
ಬೆಂಗಳೂರಿನಲ್ಲಿ ರಸ್ತೆ ಬದಿ ಸಸಿ ಮಾರಾಟ ಮಾಡುವ ವೃದ್ಧನ ಫೋಟೋ ವೈರಲ್, ಬಾಲಿವುಡ್ ನಟನಿಂದ ಸ್ಪಂದನೆ!
ವೃದ್ಧ ಸಸಿ ಮಾರಾಟ ಮಾಡುವ ಪೋಸ್ಟ್ ವೈರಲ್ ಆಗುತ್ತಿದ್ದಂತೆ ಪೋಸ್ಟ್ಗೆ ನಟ ರಣದೀಪ್ ಹೂಡಾ ಪ್ರತಿಕ್ರಿಯಿಸಿ, 'ಹೇ ಬೆಂಗಳೂರು ಸ್ವಲ್ಪ ಪ್ರೀತಿಯನ್ನು ಮಾಡಿ. ಇವರು ವುಲಾರ್ ಪ್ಯಾಷನ್ ಫ್ಯಾಕ್ಟರಿ, ಜೆ.ಪಿ.ನಗರ, ಸಾರಕ್ಕಿ ಸಿಗ್ನಲ್, ಕನಕಪುರ ರೋಡ್ ಬೆಂಗಳೂರು ವಿಳಾಸದಲ್ಲಿ ಸಸಿ ಮಾರಾಟ ಮಾಡುತ್ತಿದ್ದಾರೆ' ಎಂದು ಮನವಿ ಮಾಡಿದ್ದರು.
ಹರಿದು ಬಂದ ಸಹಾಯಹಸ್ತ:
ಸಾಮಾಜಿಕ ಜಾಲತಾಣದಲ್ಲಿ ಫೋಟೋ ವೈರಲ್ ಆಗುತ್ತಿದ್ದಂತೆ ಈತನಿಗೆ ಸ್ಥಳೀಯರು ಸಹಾಯ ಮಾಡಿದ್ದು, ಹೆಚ್ಚಿನ ಸಂಖ್ಯೆಯಲ್ಲಿ ಜನರು ಇಲ್ಲಿಗೆ ಆಗಮಿಸಿ ಸಸಿ ಖರೀದಿ ಮಾಡುತ್ತಿದ್ದಾರೆ. ಮಾರಾಟವಿಲ್ಲದ ಕಾರಣ ನಾನು ಮನೆ ನಡೆಸಲು ಹೆಣಗಾಡುತ್ತಿದ್ದೆನು. ಆದರೆ ಇದೀಗ ಹೆಚ್ಚಿನ ಸಸಿ ಖರೀದಿ ಮಾಡಲು ಜನರು ಆಗಮಿಸುತ್ತಿದ್ದಾರೆ ಎಂದು ರೇವಣಸಿದ್ದಪ್ಪ ಹೇಳಿಕೊಂಡಿದ್ದಾರೆ.
